CAB. XIII

1As haink goo yn Chiarn hym, gra, 2Vac y dooinney, jean uss phadeyrys noi phadeyryn Israel, ta jannoo phadeyrys, as abbyr uss roosyn, ta phadeyrys ass nyn gree hene, Clasht-jee rish goo yn Chiarn. 3Myr shoh ta’n Chiarn Jee dy ghra, Smerg da ny phadeyryn ommijagh, ta geiyrt er nyn spyrryd hene, as nagh vel er vakin monney. 4O Israel, ta dty adeyryn goll-rish ny shynnee ayns yn aasagh. 5Cha vel shiu er n’gholl seose gys ny doarlishyn, chamoo ta shiu er n’yannoo seose yn chleiy son thie Israel, dy hassoo ’sy chaggey ayns laa yn Chiarn. 6T’ad er vakin fardalys, as phadeyrys breagagh, gra, Ta’n Chiarn dy ghra; as cha vel eh er choyrt ad; as t’ad er chur er feallagh elley dy hreishteil, dy jinnagh ad yn goo y chooilleeney. 7Nagh vel shiu er vakin ashlish fardalagh, as nagh vel shiu er loayrt phadeyrys breagagh, son wheesh as ta shiu dy ghra, Ta’n Chiarn er ghra eh, ny-yeih cha vel mish er loayrt? 8Shen-y-fa, myr shoh ta’n Chiarn Jee dy ghra, Er-yn-oyr dy vel shiu er loayrt fardalys, as er vakin breagyn, shen-y-fa, cur-my-ner, ta mee nyn ’oï, ta’n Chiarn Jee dy ghra. 9As bee my laue er ny phadeyryn ta fakin fardalys, as ta jannoo phadeyrys breagagh, cha bee ad mastey sheshaght my phobble, chamoo vees ad er nyn scrieu ayns recortyssyn thie Israel, chamoo hed ad stiagh ayns thalloo Israel, as bee fys eu dy nee mish y Chiarn Jee.

10Er-yn-oyr, dy feer, er-yn-oyr dy vel ad er chur shaghrynys er my phobble, gra, Shee, tra nagh row shee ayn; as hrog fer voalley, as cur-my-ner va feallagh elley dy laa harrish eh lesh morter gyn-bree. 11Abbyr roosyn ta dy laa eh lesh morter dyn-bree, Dy jean eh tuittym: hig thooilley hrome-liaghee, as tuittee shiuish, O chlaghyn mooarey sniaghtee, as nee geay rastagh eh y scoltey. 12Cur-my-ner, tra ta’n voalley er duittym, nagh bee eh er ny ghra riuish, Cre’n erree t’er y vorter lesh ta shiu er laa eh? 13Shen-y-fa, myr shoh ta’n Chiarn Jee dy ghra, Lhieg-yms eh dy jarroo lesh geay rastagh ayns my eulys, as bee deayrtey trome-liaghee ayns my yymmoose, as claghyn mooarey sniaghtee ayns eulys dy chur mow eh. 14Myr shen neem’s y voalley y vrishey neose ta shiuish er laa lesh morter gyn-bree, as lhieg-yms eh kiart rish y thalloo, myr shen dy bee yn undin echey rish, as nee eh tuittym, as bee shiuish stroit fo’n vrishey echey: as bee fys eu dy nee mish y Chiarn. 15Myr shoh neem’s my yymmoose y chooilleeney er y voalley, as orroosyn t’er laa eh lesh morter gyn-bree, as jir-ym riu, Ta’n voalley rey, as ny masoonee hrog eh; 16Eer phadeyryn Israel, ta phadeyrys mychione Jerusalem, as ta fakin ashlishyn dy hee er e son, tra nagh vel shee erbee ny cour, ta’n Chiarn Jee dy ghra.

17Myrgeddin uss vac y dooinney, soie dty eddin noi inneenyn dty phobble, ta jannoo phadeyrys ass nyn gree hene; as jean uss phadeyrys nyn ’oï: 18As abbyr, Myr shoh ta’n Chiarn Jee dy ghra, Smerg da ny mraane ta whaaley pillaghyn [obbee] fo dagh uillin, as jannoo breidyn [obbee] son king jeh dy chooilley eash, dy chleayney anmeenyn! jean shiuish anmeenyn my phobble y chleayney, as jean shiu ny anmeenyn ta cheet hiuish y hauail bio? 19As der shiu orrym’s dy ve beg soit jee’m mastey my phobble son basslagh dy oarn, as son greme dy veer, dy stroie ny anmeenyn nagh lhisagh baase y gheddyn, as dy hauail bio ny anmeenyn nagh lhisagh ve bio, liorish nyn mreagyn gys my phobble, ta geaishtagh rish ny breagyn eu? 20Shen-y-fa, myr shoh ta’n Chiarn Jee dy ghra, Cur-my-ner, ta mee noi ny pillaghyn [obbee] eu, lioroo ta shiu cleayney anmeenyn gys garaghyn nyn yallooyn, as neem’s ad y raipey veih ny roihaghyn eu, as lhig-ym y raad da ny anmeenyn, eer da ny anmeenyn, ta shiu cleayney dy chur ad er-shaghryn. 21Ny breidyn eu myrgeddin neem’s y raipey, as livrey-ym my phobble ass nyn laue, as cha bee ad arragh fo nyn rere dy ve cleaynit, as bee fys eu, dy nee mish y Chiarn. 22Er-yn-oyr dy vel shiu lesh breagyn er n’yannoo cree yn er-crauee trimshagh, nagh vel mish er n’yannoo trimshagh; as er niartaghey laueyn ny mee-chrauee, gyn eh dy hyndaa veih e ghrogh raad, liorish gialdynys bea da: 23Shen-y-fa, cha vaik shiu arragh jeh’n ardalys shoh, chamoo eiyrys shiu er phadeyrys foalsey; son neem’s my phobble y livrey ass nyn laueyn, as bee fys eu, dy nee mish yn Chiarn.