CAB. XIV

1Eisht haink hym deiney dy row jeh shanstyr Israel, as hoie ad kiongoyrt rhym. 2As haink goo yn Chiarn hym, gra, 3Vac y dooinney, ta ny deiney shoh er hoiaghey seose ny jallooyn oc ayns nyn gree, as t’ad freayll oyr scammyltagh nyn mee-chairys kiongoyrt rish nyn eddin: as vel y daanys ayndoo dy vriaght jeem’s? 4Shen-y-fa, loayr roo, as abbyr roo, Myr shoh ta’n Chiarn Jee dy ghra, Dy chooilley ghooinney jeh thie Israel, ta soiaghey seose e yallooyn ayns e chree, as freayll oyr scammyltagh e vee-chairys roish e eddin, as cheet gys y phadeyr, mish y Chiarn nee freggyrt eshyn higgys, cordail rish earroo y yallooyn. 5Dy voddym thie Israel y ghoaill ayns nyn gree hene, er-yn-oyr dy vel ad ooilley jannoo quaagh jee’m, trooid nyn yallooyn.

6Shen-y-fa, abbyr rish thie Israel, Myr shoh ta’n Chiarn Jee dy ghra, Gow-jee arrys, as scarr-jee rish nyn yallooyn, as chyndaa-jee nyn eddin veih ooilley nyn beccaghyn eajee. 7Son dy chooilley ghooinney jeh thie Israel, ny t’er e yoarreeaght ayns Israel, ta scarrey eh-hene voym’s, as soiaghey seose e yallooyn ayns e chree, as freayll oyr scammyltagh e vee-chairys kiongoyrt rish e eddin, as cheet gys phadeyr dy vriaght er my-mychione’s; mish y Chiarn ver ansoor da liorym pene. 8As soie-yms my eddin noi yn dooinney shen, as ver-ym er, dy bee eh son oltooan as imraa, as nee’m eshyn y yiarey jeh veih mastey my phobble, as bee fys eu dy nee mish y Chiarn. 9As my ta’n phadeyr mollit tra t’eh er n’ockley magh nhee erbee, mish yn Chiarn t’er choyrt shaghrynys er y phadeyr cheddin, as sheeyn-yms magh my laue er, as stroie-ym eh veih mastey my phobble Israel. 10As nee adsyn kerraghey nyn mee-chairys hene y ymmyrkey: bee kerraghey yn adeyr, eer myr y kerraghey echeysyn ta shirrey huggey: 11Nagh jed thie Israel arragh er-shaghryn voym’s, chamoo jannoo ad-hene dwoaiagh lesh obbraghyn eajee, agh dy bee adsyn yn pobble aym’s, as mish yn Jee ocsyn, ta’n Chiarn Jee dy ghra.

12Haink goo yn Chiarn reesht hym’s, gra, 13Vac y dooinney, tra ta’n cheer jannoo peccah m’oï liorish ard-loghtynys, eisht sheeyn-yms magh my laue er, as brish-ym bun yn arran echey, as ver-ym er yn ghortey, as giare-ym jeh veih shen dooinney as baagh. 14Ga dy beagh ny three deiney shoh, Noah, Daniel, as Job ayn, cha jinnagh ad livrey agh nyn anmeenyn hene liorish nyn gairys, ta’n Chiarn Jee dy ghra.

15My ver-ym beishtyn dewilley trooid y cheer, as ad dy chur mow eh, myr shen dy bee eh ny hraartys, nagh vod dooinney erbee goll ny hrooid, kyndagh rish ny beishtyn: 16Ga dy beagh ny three deiney shoh ayn, myr ta mee bio, ta’n Chiarn Jee dy ghra, cha jean ad mec ny inneenyn y livrey; bee ad-hene ny-lomarcan er ny livrey, agh bee yn cheer ny hraartys.

17Er-nonney, my ver-ym lhiam cliwe er y cheer shen, as my jir-ym, Chliwe, gow trooid y cheer; myr shen dy giare-ym jeh deiney as maase: 18Ga dy beagh ny three deiney shoh ayn, myr ta mee bio, ta’n Chiarn Jee dy ghra, cha jean ad mec ny inneenyn y livrey, agh ad-hene ny-lomarcan vees er ny livrey.

19Er-nonney, my ver-ym lhiam paitt er y cheer shen, as deayrtey magh my eulys er ayns fuill, dy yiarey jeh dooinney as baagh: 20Ga dy beagh Noah, Daniel, as Job ayn, myr ta mee bio, ta’n Chiarn Jee dy ghra, cha jean ad mac ny inneen y livrey; cha jean ad agh ny anmeenyn oc hene y livrey, liorish nyn gairys. 21Son shoh myr ta’n Chiarn Jee dy ghra, Cre-woad smoo, tra ver-ym my chiare briwnyssyn trome er Jerusalem, yn cliwe, as y ghortey, as ny beishtyn dewilley, as y phaitt, dy yiarey jeh dooinney as baagh?

22Ny-yeih cur-my-ner, bee fooilliagh faagit ayn, hig magh, chammah mec as inneenyn: cur-my-ner, hig ad magh hiu, as hee shiu nyn raad, as nyn obbraghyn: as bee shiu er nyn gherjaghey son yn olk shen ta mee er choyrt lhiam er Jerusalem, eer son ooilley ny ta mee er choyrt er. 23As nee ad shiuish y gherjaghey, tra hee shiu nyn raaidyn as nyn obbraghyn: as bee fys eu, nagh vel mee er n’yannoo gyn oyr, ooilley ny ta mee er n’yannoo ayn, ta’n Chiarn Jee dy ghra.