CAB. XV

1As haink goo yn Chiarn hym’s, gra, 2Vac y dooinney, cre-woad share ta’n billey-feeyney na billey erbee elley, na banglane mastey biljyn ny keylley? 3Vod y fuygh echey ve goit son obbyr erbee? ny, jean deiney jannoo pin jeh dy chroghey saagh erbee er? 4Cur-my-ner te tilgit ’syn aile dy lostey; ta’n aile dy stroie eh bun as baare, as ta’n mean echey losht. Vel eh cooie son obbyr erbee? 5Cur-my-ner, tra ve slane, cha row eh cooie son obbyr erbee, cre-woad sloo eisht vees ymmyd ayn son obbyr erbee, tra ta’n aile er stroie eh, as te er ny lostey?

6Shen-y-fa myr shoh ta’n Chiarn Jee dy ghra, Myr ta mee er choyrt yn billey-feeyney mastey biljyn ny keylley da’n aile son lostey, er yn aght cheddin ver-ym cummaltee Yerusalem. 7As soie-yms my eddin nyn ’oï, nee ad chea veih un aile, agh nee aile elley ad y stroie: as bee fys eu, dy nee mish y Chiarn, tra ta mee soiaghey my eddin nyn ’oï. 8As ver-ym naardey yn thalloo, er-yn-oyr dy vel ad er n’yannoo peccah, ta’n Chiarn Jee dy ghra.