CAB. XVI

1Reesht haink goo yn Chiarn hym’s, gra, 2Vac y dooinney, cur er Jerusalem dy hoiggal e pheccaghyn eajee, 3As abbyr, Myr shoh ta’n Chiarn Jee dy ghra rish Jerusalem, Ta dty ruggey as dty ghooghys jeh thalloo Chanaan, Amorite va dty ayr, as Hittite dty voir. 4As er son dty heet er y theihll, ’sy laa ruggyr oo, cha row dty imleig giarit, chamoo v’ou nieet ayns ushtey dy dty ooraghey: cha r’ou edyr sailt ny soïlit. 5Cha row sooill erbee ghow chymmey jeed, dy yannoo veg jeu shoh er dty hon, dy ghoaill erreeish jeed; agh v’ou tilgit magh ayns y vagher foshlit, gys dwoaie dty phersoon, ayns y laa ruggyr oo. 6As tra hie mee shaghyd, as tra honnick mee oo sollit ayns dty uill hene, dooyrt mee rhyt, tra v’ou lhie ayns dty uill hene, Dy r’ou bio: dy feer, dooyrt mee rhyt, tra v’ou ayns dty uill hene, Dy r’ou bio! 7Hug mee ort dy vishaghey myr faiyr y vagheragh, as t’ou er vishaghey, as er n’aase stoamey, as soit magh lesh coamrey ooasle: ta dty cheeaghyn er nyn gummey, as dty olt er n’aase, ga dy r’ou rooisht as meayl. 8Nish tra hie mee shaghyd, as tra yeeagh mee ort, cur-my-ner v’ou ec eash lowal-poosee, as ren mee dty phoosey, as choodee mee dty nearey, dy feer, hug mee dhyt my vreearrey, as ren mee conaant rhyt, ta’n Chiarn Jee dy ghra, as haink oo dy ve lhiam pene. 9Eisht niee mee oo lesh ushtey: dy jarroo, ren mee dy glen dty uill y niee ersooyl, as ren mee oo y ooilaghey lesh ooil. 10Ren mee oo myrgeddin y choamrey lesh obbyr-snaidey, as hooar mee dhyt braagyn dy liare broc, as chryss mee aanrit keyl mysh dty veeghyn, as choodee mee oo lesh sheeidey. 11Hoie mee magh oo myrgeddin dy stoamey, as hug mee braceletyn er dty laueyn, as boandey airhey mysh dty wannal. 12As hug mee jewel er glaare dty eddin, as fainaghyn ayns dty chleayshyn, as attey aalin er dty chione. 13Shoh myr v’ou soit magh lesh airh as argid, as va dty choamrey dy aanrit keyl, as sheeidey, as obbyr-snaidey; va dty veaghey flooyr meein, as mill, as ooil: as v’ou erskyn-towse aalin, as ren oo girree gys reeriaght. 14As hie goo dty aalid magh mastey ny ashoonee: son ve yindyssagh, trooid stoamid my choamrey stow mee ort, ta’n Chiarn Jee dy ghra.

15Agh hreisht oo ayns dty aalid hene, as chloie oo yn streebagh er barrant dty ghoo, as gheayrt oo magh dty streebeeys gys dy chooilley unnane va goll shaghey; leshyn ve.

16As t’ou er ghoaill jeh dty choamraghyn, as er hoiaghey magh dty ard-ynnydyn lesh caghlaaghyn daah, as er n’yannoo maarderys orroo: y lheid nagh lhisagh ve jeant, chamoo lhisagh y ve. 17T’ou er ghoaill myrgeddin dty yewellyn costal, my airh, as my argid, hug mee dhyt, as er n’yannoo dhyt hene jallooyn dy gheiney, as ren oo maarderys roo. 18As t’ou er ghoaill dty gharmadyn dy obbyr-snaidey, as er choamrey ad: as t’ou er hoiaghey my ooil, as my incense kiongoyrt roo. 19My vee myrgeddin hug mee dhyt, flooyr meein, as ooil, as mill, lesh ren mee uss y veaghey, t’ou eer er vaarail shen orroosyn son cuirraghyn costal; as shoh myr ve, ta’n Chiarn Jee dy ghra. 20Ny-sodjey, t’ou er ghoaill dty vec, as dty inneenyn t’ou er n’ymmyrkey dooys, as ad shoh t’ou er hebbal myr oural daue dy ve stroit: vel shoh dty vaarderys red eddrym, 21Dy vel oo er stroie my chloan, as er livrey ad seose huc, dy gholl trooid yn aile er nyn son? 22As ayns ooilley dty olkys as dty vaarderys cha vel oo er chooinaghtyn er laghyn dty aegid, tra v’ou rooisht, as meayl, as sollit ayns dty uill hene. 23As haink eh gy-kione lurg ooilley dty vee-chraueeaght (smerg, smerg dhyt’s, ta’n Chiarn Jee dy ghra!) 24Dy vel oo er hroggal dhyt hene thie streebee, as er n’yannoo er dty hon hene ard-ynnyd ayns dy chooilley straïd. 25T’ou er hroggal dty ard-ynnyd ec kione dagh raad, as er n’yannoo dwoaiagh dty aalid, as er vosley dty chassyn da dy chooilley unnane va goll shaghey, as er vishaghey dty vaarderys. 26T’ou er n’yannoo maarderys myrgeddin rish ny Egyptianee dty naboonyn, mooar ayns feill; as t’ou er vishaghey dty streebeeys, dy my vrasnaghey gys corree. 27Cur-my-ner, er-y-fa shen ta mee er heeyney magh my laue harryd, as er leodaghey dty veaghey gagh-laa, as er dty livrey gys aigney dty noidyn, gys inneenyn ny Philistinee, ta goaill nearey jeh dty aghtyn rouanagh. 28T’ou er n’yannoo maarderys myrgeddin rish ny Assyrianee, er-yn-oyr dy r’ou jollyssagh; t’ou er n’yannoo maarderys roo, as ny-yeih cha voddagh oo ve jeant magh. 29T’ou ny-sodjey er vishaghey dty vaarderys ayns thalloo Chanaan gys Caldea, as ny-yeih cha r’ou er dty wooiys lesh shen. 30Cre cha faase ta dty chree, ta’n Chiarn Jee dy ghra, fakin dy vel oo cur-rish ooilley ny reddyn shoh, obbyr ben-streebee ard-vooaralagh! 31Er-yn-oyr dy vel oo troggal dty hie streebee ec kione dagh raad, as jannoo dty ard-ynnyd ayns dy chooilley straïd, as cha vel oo er ve myr streebagh elley (er-yn-oyr dy vel oo gobbal faill). 32Agh myr ben-phoost ta brishey, poosey, ta goaill joarreeyn ayns ynnyd e sheshey. 33T’ad cur faill da streebeeyn elley, agh t’ou uss stowal dty yiootyn da ooilley dty ghimmanyn, as failley ad dy heet hood veih dy chooilley ard, son dty vaarderys. 34As cha vel uss goll-rish mraane elley ayns dty vaarderys, er-yn-oyr nagh vel fer erbee geiyrt ort’s dy yannoo maarderys: as er-yn-oyr dy vel oo coyrt leagh, as cha vel leagh erbee er ny choyrt dhyt’s; shen-y-fa cha vel oo goll-roo. 35Shen-y-fa, O ven streebee, clasht rish goo yn Chiarn. 36Myr shoh ta’n Chiarn Jee dy ghra, Er-yn-oyr dy row dty vroïd er ny gheayrtey magh, as dty nearey er ny akin, kyndagh rish dty vaarderys rish dty ghimmanyn, as rish ooilley dty yallooyn eajee, as liorish fuill dty chloan t’ou er choyrt daue; 37Cur-my-ner, er-y-fa shen neem’s ooilley dty vaarderyn y haglym cooidjagh, ayndoo t’ou er ghoaill taitnys, as adsyn ooilley t’ou er ve graihagh orroo, mâroosyn ooilley va dwoaie ayd orroo: neem’s dy feer ad y haglym cooidjagh cruin mygeayrt dt’oï, as neem’s dty nearey y roostey roue, dy vaik ad ooilley dty nearey. 38As neem’s uss y vriwnys, myr ta ny mraane ta brishey poosey, as deayrtey fuill er nyn mriwnys, as deayrt-yms dty uill ayns eulys as eadolys. 39As livrey-yms oo seose myrgeddin gys ny laueyn oc, as lhieggee ad dty hie streebee, as brishee ad sheese dty ard-ynnydyn; nee ad uss y roostey myrgeddin jeh dty choamraghyn, as gowee ad voïd dty yewellyn aalin, as faagee ad uss rooisht as meayl. 40Ver ad lhieu seose myrgeddin sheshaght dt’oï, as nee ad oo y chlaghey gy-baase, as oo y hoylley trooid lesh nyn gliwenyn. 41As nee ad dty hieyn y lostey lesh aile, as briwnyssyn y chooilleeney ort’s ayns shilley ymmodee mraane: as ver-yms ort’s dy scuirr veih dty vaarderys, as cha der uss myrgeddin faill erbee arragh. 42Myr shen bee my eulys dt’oï ec fea, as hed my eadolys voïd, as bee’m ec m’aash, as cha bee’m arragh jymmoosagh rhyt. 43Er-yn-oyr nagh vel oo er chooinaghtyn er laghyn dty aegid, agh er chur sneih er my aigney ayns ooilley ny reddyn shoh; cur-my-ner, er-y-fa shen, neem’s myrgeddin dty raad y chooilleeney er dty chione hene, ta’n Chiarn Jee dy ghra, as cha n’eiyr oo ny-sodjey er yn neu-heeltys shoh, marish ooilley dty aghtyn dwoaiagh.

44Cur-my-ner, dy chooilley unnane ta cliaghtey coraaghyn-dorraghey, bee yn raa shoh oc dt’oï, gra, Myr ta’n voir, myr shen ta’n inneen. 45T’ou uss inneen dty vayrey, ta dwoaie eck er e sheshey, as e cloan, as t’ou uss shuyr dty hayraghyn, oc va dwoaie er nyn sheshaghyn, as er nyn gloan: Hittite va nyn moir, as Amorite nyn ayr. 46As ta dty huyr shinney Samaria, ish as ny inneenyn eck ta cummal er dty laue chiare: as ta dty huyr saa, ta cummal er dty laue yesh, Sodom as ny inneenyn eck. 47Ny-yeih, cha vel oo er n’immeeaght lurg ny raaidyn ocsyn, ny er n’yannoo cordail rish nyn mee-chraueeaght, agh myr dy beagh shen red feer fardalagh, t’ou uss er ve ny smessey na adsyn ayns ooilley dty raaidyn. 48Myr ta mee bio, ta’n Chiarn Jee dy ghra, cha vel Sodom dty huyr, ee hene, ny e inneenyn er n’yannoo, myr t’ou uss er n’yannoo, oo hene, as dty inneenyn. 49Cur-my-ner, shoh va loght dty huyr Sodom, moyrn, sonnys arran, as litcheraght lhome va aynjee, as ayns ny inneenyn eck, chamoo ren ee laueyn yn voght as yn ymmyrchagh y niartaghey. 50As v’ad ard-chreeagh, as chur ad rish peccaghyn eajee kiongoyrt rhym: shen-y-fa scugh mee voym ad myr honnick mee cooie. 51Chamoo ta Samaria er n’yannoo yn derrey lieh jeh dty pheccaghyn; agh t’ou uss er vishaghey dty pheccaghyn eajee ny smoo na t’adsyn, as er heyrey dty hayraghyn ayns ooilley dty aghtyn dwoaiagh, t’ou er chur roo. 52Uss myrgeddin t’er vriwnys dty hayraghyn, jean dty nearey hene y ymmyrkey, son ny peccaghyn t’ou er ny ve cur-roo, ny s’eajee na t’adsyn: cha vel adsyn cha foiljagh rhyt’s: dy feer, bee uss er dty naaraghey myrgeddin, as jean dty nearey hene y ymmyrkey, ayns dy vel oo son leshtal da dty hayraghyn. 53Tra neem’s yn chappeeys ocsyn y hyndaa, eer cappeeys Sodom as ny inneenyn eck, cappeeys Samaria as ny inneenyn ecksh, eisht ver-yms lhiam reesht cappeeys ny cappeeyn ayd’s ny mast’ oc. 54Dy vod oo dty nearey hene y ymmyrkey, as atchim’ ve ort son ooilley ny t’ou er n’yannoo, ayns dy vel oo son leshtal daue. 55Tra nee dty hayraghyn, Sodom, as ny inneenyn eck, chyndaa gys nyn ghied stayd, as Samaria, as ny inneenyn ecksh, chyndaa gys y stayd v’ad ayn roïe, eisht nee uss, as dty inneenyn, chyndaa reesht gys nyn ghied stayd. 56Son cha row dty huyr Sodom enmyssit liorish dty veeal, ayns laa dty vooaralys. 57Roish my daink briaght er dty ghrogh-yannoo, myr eck earish dty oltooan veih inneenyn Syria, as ooilley e naboonyn, inneenyn ny Philistinee, ta soiaghey beg jeed ooilley mygeayrt. 58T’ou er n’ymmyrkey dty rouanys, as dty aghtyn eajee ta’n Chiarn dy ghra. 59Son myr shoh ta’n Chiarn Jee dy ghra, Neem’s dellal rhyt rere dty yannoo, ta er hoiaghey beg jeh dty vreearrey, ayns brishey yn conaant.

60Ny-yeih, neem’s cooinaghtyn er my chonaant rhyt’s ayns laghyn dty aegid, as neem’s conaant dy bragh farraghtyn y hickyraghey rhyt. 61Eisht nee oo cooinaghtyn er dty raaidyn, as nee oo nearey y ghoaill, tra yiow dty hayraghyn reesht, shinney as saa: as ver-ym ad dhyt son inneenyn, agh cha nee liorish dty chonaant’s. 62As neem’s my chonaant y hickyraghey rhyt, as bee fys ayd, dy nee mish y Chiarn. 63Dy vod oo cooinaghtyn as ve dty host, as gyn dy bragh dty veeal y osley arragh er coontey dty nearey, tra ta mee coardit rhyt, son ooilley ny t’ou er n’yannoo, ta’n Chiarn Jee dy ghra.