CAB. XVII

1As haink goo yn Chiarn hym’s gra, 2Vac y dooinney, cur magh feysht, as loayr coraa-dorraghey rish thie Israel; 3As abbyr, Myr shoh ta’n Chiarn Jee dy ghra, Haink gys Lebanon urley mooar lesh skianyn lheaney, liauyr skianagh, lane fedjagyn, aalin schimmeigagh, as ghow eh yn vanglane syrjey jeh’n cedar: 4Yiare eh jeh baare ny banganyn aegey, as hug eh lesh eh gys cheer margee, as hoie eh eh ayns ard-valley ny marchanyn. 5Ghow eh myrgeddin sett jeh mess y cheer, as phlant eh eh ayns magher messoil, hoie eh eh myr billey-shellagh liorish ushtaghyn mooarey. 6As daase eh, as haink eh dy ve billey-feeyney injil, skeayley magh, ny banglaneyn echey va chyndaït stiagh er hene, as ny fraueyn fo: myr shen haink eh dy ve billey-feeyney, as dymmyrk eh magh banglaneyn, as hug eh magh slattagyn. 7Va myrgeddin urley mooar elley ayn lesh skianyn lheaney, as lane fedjagyn; as cur-my-ner, ren y billey-feeyney shoh ny fraueyn eck y hyndaa huggeysyn, as heeyn ee magh e banglaneyn huggeysyn, dasyn dy ushtagh eh liorish creaghyn e garey-feeyney. 8V’eh soit ayns thalloo menoyr liorish ushtaghyn mooarey, dy chur magh banglaneyn, as dy ymmyrkey mess, as dy ve ny villey-feeyney aalin. 9Abbyr uss, Myr shoh ta’n Chiarn Jee dy ghra, Jig eh er-ash? nagh jean eshyn eh y astyrt ass ny fraueyn, as e vess y yiarey jeh, dy jean eh fioghey? nee eh creenagh ayns ooilley ny duillagyn ver eh magh, eer fegooish pooar niartal, ny mooarane pobble, dy astyrt eh ass ny fraueyn. 10Dy jarroo, cur-my-ner, nish te soit, jig eh er y hoshiaght? nagh jean eh dy bollagh fioghey, tra ta’n gheay-niar dy lomman eh? nee eh creenagh ayns ny creaghyn raad daase eh.

11Ny-sodjey haink goo yn Chiarn hym’s, gra, 12Abbyr nish rish y thie mee-viallagh, Nagh vel shiu toiggal bun ny reddyn shoh? insh daue, Cur-my-ner, ta ree Vabylon er jeet gys Jerusalem, as er ghoaill y ree eck, as ny princeyn eck, as er chur lesh mârish ad gys Babylon. 13As t’eh er ghoaill jeh’n sluight reeoil, as er n’yannoo conaant rish, as er n’ghoaill breearrey jeh: t’eh er n’ghoaill myrgeddin mârish deiney niartal y cheer. 14Dy reayll yn reeriaght fo-chosh, gyn dy irree-magh n’oï, agh dy voddagh eh shassoo liorish freayll e chonaant. 15Agh dirree eh magh n’oï, ayns cur e haghteryn reeoil gys Egypt, son cabbil, as niart sleih: jean eh bishaghey, vod aïgh mie ve leshyn ta jannoo lheid shoh? as bee eshyn er ny livrey ta brishey yn conaant? 16Myr ta mee bio, ta’n Chiarn Jee dy ghra, son shickyrys ayns yn ynnyd cheddin, raad ta’n ree shen cummal, ren eshyn ny ree, e vreearrey hoie eh beg jeh, as e chonaant vrish eh, eer mârishyn, ayns mean Vabylon, yiow eh baase. 17Chamoo nee Pharaoh, lesh ny sheshaghtyn-caggee niartal, as ny earrooyn mooarey echey jannoo er e hon ayns y chaggey, liorish ceau seose carnaneyn, as troggal tooryn-caggee, dy yiarey jeh ymmodee sleih: 18Fakin dy vel eh er hoiaghey beg jeh yn vreearrey, liorish brishey yn conaant (tra, cur-my-ner, ren eh e laue y ghialtaghey) as er n’yannoo ooilley ny reddyn shoh, cha jean eh scapail. 19Shen-y-fa myr shoh ta’n Chiarn Jee dy ghra, Myr ta mee bio, son shickyrys, my vreearrey t’eh er hoiaghey beg jeh, as my chonaant t’eh er vrishey, eer shen neem’s y chooilleeney er e chione hene. 20As neem’s my lieen y skeayley er, as bee eh goit ayns my ribbey, as ver-ym lhiam eh gys Babylon, as shen y raad neem’s y chooish y reaghey rish, son e loghtyn t’eh er n’yannoo m’oï. 21As ooilley e vooinjer t’er roie er-chea, marish ooilley e heshaghtyn-caggee, nee ad tuittym liorish y chliwe, as bee yn chooid elley jeu er nyn skeayley lesh dy chooilley gheay, as bee fys oc, dy nee mish y Chiarn t’er loayrt eh.

22Myr shoh ta’n Chiarn Jee dy ghra, Goym’s myrgeddin banglane syrjey yn cedar ard, as soie-ym eh, buinn-ym veih baare ny slattagyn aegey fer meiygh, as soie-ym eh er slieau ard as cronnal. 23Er yrjid slieau Israel soie-ym eh: as ver eh magh banganyn, as gymmyrkey mess, as bee eh ny cedar aalin: as fo nee dy chooilley cheint dy eeanlee skianagh taaghey, ayns scadoo e vanglaneyn nee ad fastee y ghoaill. 24As bee fys ec ooilley biljyn y vagher, dy nee mish y Chiarn, t’er lhieggal y billey ard, as t’er hroggal y billey injil, t’er fioghey yn billey glass, as er chur er y billey creen dy vlaaghey: mish y Chiarn t’er loayrt, as er chooilleeney eh.