CAB. XVIII

1Haink goo yn Chiarn hym’s reesht, gra, 2Cre ta shiu dy hoiggal dy vel eu yn chenn raa-cadjin shoh mychione cheer Israel, gra, Ta ny ayraghyn er n’ee berrishyn-feeyney soor, as ta feeacklyn y chloan er n’gholl jeaid? 3Myr ta mee bio, ta’n Chiarn Jee dy ghra, cha bee oyr sodjey eu dy chliaghtaghey yn raa-cadjin shoh ayns Israel. 4Cur-my-ner, ta dy chooilley annym lhiam’s, myr ta annym yn ayr, myr shen ta annym y vac lhiam’s: yn annym ta jannoo peccah, yiow eh baase.

5Agh my ta dooinney cairagh, as jannoo shen ny ta lowal as jeeragh. 6As nagh vel er n’ee er ny sleityn, ny er hroggal seose e hooillyn gys jallooyn thie Israel, chamoo t’er n’yannoo peccah rish ben e naboo, ny er jeet coair ben veeoil: 7As nagh vel er n’yannoo tranlaase er dooinney erbee, agh t’er chur reesht da’n jatter e yioal, nagh vel er spooilley dooinney erbee liorish aggair, er hirveish e arran er ny accryssee, as choodaghey yn roosteeyn lesh coamrey. 8Eshyn nagh vel er chur magh er use, ny er n’ghoaill bishaghey, t’er reayll e laue veih mee-chairys, t’er n’yannoo briwnys firrinagh eddyr dooinney as dooinney, 9Ta er n’immeeaght ayns my lattyssyn, as er reayll my vriwnyssyn, dy ghellal dy firrinagh; t’eh shen cairal, bee eh son shickyrys bio, ta’n Chiarn Jee dy ghra.

10My nee eh mac y gheddyn ta ny roosteyr, dooinney folley, as ta cur-rish veg jeh lheid ny cliaghtaghyn shoh, 11As nagh vel cooilleeney veg jeh ny curmyn shoh, agh t’er n’ee er ny sleityn, as er n’yannoo peccah rish ben e naboo, 12T’er n’êginagh yn voght as yn ymmyrchagh, t’er roostey lesh laue lajer, nagh vel er jyndaa yn yioal, as t’er hroggal seose e hooillyn gys ny jallooyn, t’er n’yannoo ard-pheccah, 13T’er chur magh er use, as er n’ghoaill bishaghey: bee y lheid echeysyn bio? Cha bee eh bio: t’eh er n’yannoo ooilley ny ard-pheccaghyn shoh, yiow eh son shickyrys baase, bee yn uill echey er e chione hene.

14Nish cur-my-ner, my nee eshyn mac y gheddyn, ta fakin ooilley peccaghyn e ayr, t’eh er n’yannoo, as smooinaghtyn er hene, as nagh vel cur-rish y lheid, 15Nagh vel er n’ee er ny sleityn, chamoo er hroggal seose e hooillyn gys jallooyn thie Israel, ny er n’yannoo peccah rish ben e naboo, 16Chamoo t’er n’êginagh dooinney erbee, nagh vel er reayll yn yioal, ny er roostey lesh laue lajer, agh er hirveish e arran er ny accryssee, as er choodaghey yn roosteeyn lesh coamrey, 17Ta er lhiettal e laue veih chennid er y voght, nagh vel er n’ghoaill use ny tack, ta er chooilleeney my vriwnyssyn, ta er n’immeeaght ayns my lattyssyn; cha vow eh shoh baase son mee-chairys e ayr, bee eh son shickyrys bio. 18Er son e ayr, er-yn-oyr dy row eh ny hranlaasagh dewil, as spooilley e vraar lesh laue lajer, as dy ren eh shen nagh row dy mie mastey e phobble, cur-my-ner, yiow eh shen baase ayns e vee-chairys hene.

19Ny-yeih ta shiu gra, Cammah? nagh vel y mac gymmyrkey mee-chairys yn ayr? Tra ta’n mac er n’yannoo shen ta lowal as jeeragh, as er reayll ooilley my lattyssyn, as er n’immeeaght ayndoo, bee eh son shickyrys bio. 20Yn annym ta cur-rish peccah, yiow eh baase: cha jean y mac gymmyrkey mee-chairys yn ayr, chamoo nee yn ayr gymmyrkey mee-chairys y vac; bee cairys yn er-cairal er hene, as mee-chairys yn drogh-yantagh ersyn. 21Agh my nee yn dooinney mee-chrauee chyndaa veih ooilley ny peccaghyn t’eh er ny ve cur-rish, as freayll ooilley my lattyssyn, as jannoo shen ny ta lowal as jeeragh, bee eh son shickyrys bio, cha vow eh baase. 22Ooilley yn drogh-yannoo t’eh er ny ve cur-rish, cha bee eh enmyssit huggey: ayns e chairys t’eh er n’yannoo bee eh bio. 23Vel taitnys erbee aym’s ayns baase y drogh-yantagh? ta’n Chiarn Jee dy ghra: agh dy jinnagh eh chyndaa veih eh raaidyn, as ve bio?

24Agh tra ta’n dooinney cairal chyndaa ersooyl veih e chairys, as cur-rish mee-chairys, as jannoo lurg ooilley ny peccaghyn eajee ta’n drogh ghooinney cur-roo, bee y lheid echeysyn bio? ooilley’n chairys t’eh er n’yannoo, cha bee eh enmyssit da: ayns e loghtyn t’eh er n’yannoo, as ayns e pheccah t’eh er ny ve cur-rish, ayndoosyn yiow eh baase.

25Ny-yeih, ta shiu gra, Cha vel raad y Chiarn corrym-kiart. Clasht nish, O hie Israel, nagh vel my raad’s corrym-kiart? nagh vel ny raaidyn euish neu-chorrym? 26Tra ta dooinney cairal chyndaa ersooyl veih e chairys, as jannoo olk, as geddyn baase ayn; son yn olk t’eh er n’yannoo, yiow eh baase. 27Reesht tra ta’n dooinney mee-chrauee chyndaa ersooyl veih’n vee-chraueeaght t’eh er ny ve cur-rish, as jannoo shen ny ta lowal as jeeragh, saue-ee eh e annym bio. 28Er-yn-oyr dy vel eh smooinaghtyn er hene, as chyndaa veih ooilley e ghrogh-yannoo, t’eh er ny ve cur-rish, bee eh son shickyrys bio, cha vow eh baase. 29Ny-yeih, ta thie Israel gra, Cha vel raad y Chiarn corrym-kiart: O hie Israel, nagh vel my raaidyn’s corrym-kiart? nagh vel ny raaidyn euish an-chiart? 30Shen-y-fa neem’s shiuish y vriwnys, O hie Israel, dagh unnane cordail rish e raaidyn, ta’n Chiarn Jee dy ghra: gow-jee arrys, as chyndaa-jee shiu hene veih ooilley nyn ghrogh-yannoo: myr shen cha bee mee-chairys nyn doyrt-mow.

31Scarr-jee rish ooilley nyn loghtyn, lioroo ta shiu er ve foiljagh, as jean-jee diu hene cree noa, as spyrryd noa; son cre’n-fa yioghe shiu baase, O hie Israel? 32Son cha vel taitnys erbee aym’s ayns y vaase echeysyn ta cherraghtyn, ta’n Chiarn Jee dy ghra: shen-y-fa chyndaa-jee shiu hene, as bee-jee bio.