CAB. XIX

1Ny-sodjey, trog uss seose bardoon son princeyn Israel. 2As abbyr, Cre ta dty voir? Lion bwoirryn: lhie ee sheese mastey lionyn, hrog ee seose ny quallianyn eck mastey lionyn aegey. 3As hrog ee seose fer jeh ny quallianyn eck: as haink eh dy ve lion aeg, as dynsee eh dy hayrtyn y chragh; stroie eh deiney. 4Cheayll ny ashoonyn myrgeddin jeh, v’eh goit ayns nyn ribbey, as hug ad lhieu eh ayns geulaghyn gys cheer Egypt. 5Nish tra honnick ee dy row ee er farkiaght foddey, as dy row e treishteil ayns fardail, eisht ghow ee fer elley jeh ny quallianyn eck, as hrog ee eh son lion aeg. 6As hie eh noon as noal mastey ny lionyn, as haink eh dy ve lion aeg, as dynsee eh dy hayrtyn y chragh, as stroie eh deiney. 7As ren eh ny cummallyn reeoil y spooilley, as ren eh ny ard-valjyn oc nyn draartys, as va’n cheer feayn-follym, as e verchys naardey liorish feiyr e gharveigagh. 8Eisht hoie ny ashoonyn er, veih ny rheamyn mygeayrt er dy chooilley heu, as skeayl ad nyn lieen harrish: v’eh goit ayns nyn ribbey. 9As hug ad eh ayns pryssoon ayns geulaghyn, as hug ad lhieu eh gys ree Vabylon; as ren ad shickyr jeh ayns diunid y phryssoon, nagh beagh e choraa arragh er ny chlashtyn er sleityn Israel.

10Ta dty voir goll-rish billey-feeyney ayns dty chynney, soit liorish ny ushtaghyn, v’ee messoil, as lane dy vanglaneyn veih mooarane ushtey. 11As hug ee magh slattagyn lajer, son luirg-reill dauesyn va gymmyrkey reill, as va’n troshid eck cronnal mastey ny banglaneyn choo, as yn yrjid eck ry-akin lesh ymmodee banglaneyn. 12Agh v’ee er ny astyrt ayns eulys, v’ee tilgit sheese gys y thalloo, as ren y gheay-niar shirgaghey seose ny messyn eck: va ny slattagyn lajer eck brisht as fiojit, stroie yn aile ad. 13As nish t’ee soit ayns yn aasagh, ayns thalloo chirrym gaagit. 14As ta aile er n’gholl magh ass slattag jeh ny banglaneyn eck, t’er stroie e mess, myr shen nagh vel slattag lajer faagit eck son lorg-reill. Ta shoh yn bardoon, as bee eh son bardoon.