CAB. II

1As dooyrt eh rhym, Vac y dooinney, shass er dty chassyn, as loayr-yms rhyt. 2As hie yn spyrryd stiagh aynym, tra loayr eh rhym, as hoie eh mee er my chassyn, dy geayll mee eshyn va loayrt rhym. 3As dooyrt eh rhym, Vac y dooinney, ta mee dy dty choyrt gys cloan Israel, gys ashoon mee-viallagh, t’er n’irree-magh m’oï: t’adsyn as nyn ayraghyn er n’irree-magh m’oï, eer gys y laa t’ayn jiu. 4Son t’ad cloan ghaaney as creoi-chreeagh: ta mee dy dty chur hucsyn, as jir oo roo, Myr shoh ta’n Chiarn Jee dy ghra. 5As adsyn, lhig daue clashtyn, ny gyn clashtyn, (son t’ad thie mee-viallagh) ny-yeih yiow ad fys dy vel phadeyr er ve ny mast’ oc.

6As uss, vac y dooinney, ny gow aggle roue hene, ny roish ny goan oc, ga dy vel dressyn as drineyn mayrt, as dy vel oo cummal mastey ard-nieughyn: ny gow aggle roish ny goan oc, chamoo bee atchimagh roish y chilley oc, ga dy vel ad thie mee-viallagh. 7As nee uss my ghoan’s y loayrt roo, lhig daue clashtyn, ny gyn clashtyn, son t’ad ard-vee-viallee. 8Agh uss, vac y dooinney, eaisht rish shen, ny ta mee gra rhyt, ny bee uss mee-viallagh, myr y thie mee-viallagh shen: foshil dty veeal, as ee shen ny ver-ym dhyt.

9As tra yeeagh mee, cur-my-ner, va laue er ny roshtyn hym, as cur-my-ner va lioar ayn. 10As skeayl eshyn eh kiongoyrt rhym, as ve scruit cheu-sthie as cheu-mooie, as va scruit ayn, keayney, as dobberan, as trimshey.