CAB. XX

1As haink eh gy-kione ayns y chiaghtoo vleïn, ayns y wheiggoo vee, ’sy jeihoo laa jeh’n vee, dy daink deiney dy row jeh shanstyr Israel, dy vriaght jeh’n Chiarn, as hoie ad kiongoyrt rhym. 2Eisht haink goo yn Chiarn hym’s, gra, 3Vac y dooinney, loayr rish shanstyr Israel, as obbyr roo, Myr shoh ta’n Chiarn Jee dy ghra, Vel shiu er jeet dy vriaght jeem’s? myr ta mee bio, ta’n Chiarn Jee dy ghra, cha beem’s er my vriaght jeh lieriu. 4Nagh jean oo ad y vriwnys, vac y dooinney, nagh jean oo ad y vriwnys? cur orroo dy hoiggal peccaghyn eajee nyn ayraghyn:

5As abbyr roo, Myr shoh ta’n Chiarn Jee dy ghra, Er y laa reih mee Israel, as hrog mee seose my laue gys sluight thie Yacob, as hoilshee mee mee-hene daue ayns cheer Egypt, tra hrog mee seose my laue huc, gra, Mish y Chiarn nyn Yee, 6Er y laa cheddin, er hrog mee seose my laue huc, dy chur lhiam ad magh veih cheer Egypt, gys cheer va mee er chronnaghey er nyn son, taal lesh mill as bainney; ta gloyr dagh cheer: 7Eisht dooyrt mee roo, Tilg-jee ersooyl veue dy chooilley ghooinney peccaghyn dwoaiagh e hooillyn, as ny tayrn-jee peccah erriu hene liorish jallooyn Egypt: mish y Chiarn nyn Yee. 8Agh dirree adsyn magh m’oï, as cha jinnagh ad clashtyn rhym: cha ren ad dy chooilley ghooinney tilgey voue peccaghyn dwoaiagh e hooillyn, chamoo hreig ad jallooyn Egypt: eisht dooyrt mee, Deayrt-yms magh my eulys orroo, dy chooilleeney my yymmoose nyn ’oï ayns mean cheer Egypt. 9Agh dobbree mee er graih m’ennym hene, nagh beagh eh er ny oltooaney kiongoyrt rish ny ashoonee, nyn mastey v’ad, ayns y chilley oc ren mee mee-hene y hoilshaghey daue, ayns coyrt lhiam ad magh ass cheer Egypt.

10Shen-y-fa hug mee orroo dy gholl magh ass cheer Egypt, as leeid mee ad gys yn aasagh. 11As hug mee daue my lattyssyn, as hoilshee mee daue my vriwnyssyn, adsyn my nee dooinney y chooilleeney, bee eh dy jarroo bio ayndoo. 12Ny sodjey na shoh, hug mee daue my ghooneeyn, dy ve son cowrey eddyr mish as adsyn, dy voddagh fys y ve oc, dy nee mish y Chiarn, ta dy chasherickey ad. 13Agh dirree thie Israel magh m’oï ayns yn aasagh: cha jimmee ad ayns my lattyssyn, as hoie ad beg jeh my vriwnyssyn: adsyn my nee dooinney y chooilleeney, bee eh dy jarroo bio ayndoo; as my ghooneeyn ren ad dy naareydagh y vrishey: eisht dooyrt mee, dy jinnin my eulys y gheayrtey magh orroo ayns yn aasagh, dy stroie ad. 14Agh dobbree mee er graih my ennym hene, nagh beagh eh er ny oltooaney mastey ny ashoonee, ayns y chilley oc hug mee lhiam ad magh. 15Ny-yeih hrog mee seose my laue myrgeddin huc ayns yn aasagh, nagh jinnin ad y chur lhiam gys y cheer shen, chiare mee daue, va taal bainney as mill, ta gloyr dy chooilley heer. 16Er-yn-oyr dy hoie ad beg jeh my vriwnyssyn, as cha jimmee ad ayns my lattyssyn, agh ren ad my ghooneeyn y vrishey: son va nyn greeaghyn lhiantyn gys ny jallooyn oc. 17Ny-yeih dymmyrk my hooill lhieu veih stroie ad, chamoo ren mee jerrey jeu ’syn aasagh. 18Agh dooyrt mee rish nyn gloan ayns yn aasagh, Ny immee-jee shiuish ayns slattyssyn ny ayraghyn eu, chamoo cur-jee geill da ny briwnyssyn oc, chamoo tayrn-jee peccah erriu hene lesh nyn yallooyn. 19Mish y Chiarn nyn Yee; shooill-jee ayns my lattyssyn, as freill-jee my vriwnyssyn, as jean-jee ad. 20As freill-jee casherick my ghooneeyn, as bee ad son cowrey eddyr mysh as shiuish, dy vod fys y ve eu, dy nee mish y Chiarn nyn Yee. 21Ny-yeih dirree yn chloan magh m’oï: cha jimmee ad ayns my lattyssyn, chamoo dreill ad my vriwnyssyn, dy yannoo ad, ad shen my nee dooinney y chooilleeney, bee eh eer bio lioroo; vrish ad my ghooneeyn: eisht dooyrt mee, dy deayrtin magh my eulys orroo, dy chooilleeney my yymmoose nyn ’oï ayns yn aasagh. 22Ny-yeih, dreill mee my laue voue, as dobbree mee er graih my ennym hene, nagh beagh eh er ny oltooaney ayns shilley ny ashoonee, ayns nyn venish hug mee lhiam ad magh. 23Hrog mee seose my laue huc myrgeddin ayns yn aasagh, dy skeayley ad mastey ny ashoonee, as dy eiyrt ad noon as noal trooid ny cheeraghyn; 24Er-yn-oyr, nagh row ad er chooilleeney my vriwnyssyn, agh er hoiaghey beg jeh my lattyssyn, as er vrishey my ghooneeyn as dy row nyn sooillyn rouail lurg jallooyn nyn ayraghyn. 25Shen-y-fa hug mee daue myrgeddin slattyssyn nagh row mie, as briwnyssyn lioroo nagh voddagh ad beaghey. 26As daag mee ad fo peccah ayns ny ourallyn oc hene, ayns shen dy dug ad er ooilley ny ta fosley yn vreïn dy gholl trooid yn aile, myr shoh dy leodaghey ad-hene, as fys dy ve oc, dy nee mish y Chiarn.

27Shen-y-fa, vac y dooinney, loayr rish thie Israel, as abbyr roo, Myr shoh ta’n Chiarn Jee dy ghra, Ny-yeih ayns shoh ta nyn ayraghyn er m’y oltooaney, ayns dy vel ad er n’yannoo loght m’oï. 28Son tra hug mee lhiam ad stiagh ’sy cheer, er y hon ren mee breearrey, dy chur daue eh, eisht honnick ad dy chooilley chronk ard, as ooilley ny biljyn choo, as heb ad ayns shen nyn ourallyn, as ayns shen heb ad brasnaghey nyn jebballyn: ayns shen myrgeddin hoie ad magh nyn oural-arran, as gheayrt ad magh ayns shen nyn ourallyn-feeyney. 29Eisht dooyrt mee roo, Cre ta’n ard-ynnyd shen ta shiu dy haaghey? te er ny enmys Bamah, gys y laa t’ayn jiu. 30Shen-y-fa, abbyr rish thie Israel, Myr shoh ta’n Chiarn Jee dy ghra, Vel shiu oolee ayns cliaghtaghyn eajee nyn ayraghyn? as vel shiu cur-rish maarderys [spyrrydoil] lurg ny obbraghyn dwoaiagh ocsyn? 31Son tra ta shiu chebbal nyn yiootyn, tra ta shiu cur er nyn mec dy gholl trooid yn aile, ta shiu jannoo shiu hene eajee lesh ooilley nyn yallooyn, eer gys y laa t’ayn jiu: as jig shiu dy vriaght jeem’s, O hie Israel? myr ta mee bio, ta’n Chiarn Jee dy ghra; cha beem’s er my vriaght jeh lieriu. 32As shen ny ta cheet ayns nyn aigney, cha bee eh jeant mie, dy vel shiu gra, Bee mayd myr ny ashoonee, myr kynneeyn ny cheeraghyn dy hirveish fuygh as clagh.

33Myr ta mee bio ta’n Chiarn Jee dy ghra, son shickyrys, lesh laue niartal, as lesh roih sheeynt magh, as lesh eulys trome reill-yms harrystiu. 34As ver-ym lhiam shiu magh veih’n pobble, as neem’s shiu y haglym ass ny cheeraghyn raad va shiu er nyn skeayley, lesh laue lajer, as lesh roih sheeynt magh, as lesh eulys trome. 35As ver-ym lhiam shiu gys faasagh yn phobble, as shen y raad neem’s pleadeil riu eddin ry eddin. 36Myr phlead mee rish nyn ayraghyn ayns cheer Egypt, myr shen plead-ym riuish, ta’n Chiarn Jee dy ghra. 37As ver-ym erriu dy gholl fo yn clatt, as ver-ym lhiam shiu fo kiangley yn chonaant. 38As nee’m y ghlenney veih ny mast’ eu ny mee-viallee, as adsyn ta girree-magh m’oï: as ver-ym lhiam ad magh ass y cheer raad t’ad er nyn yoarreeaght, as cha jed ad stiagh ayns cheer Israel, as bee fys eu dy nee mish y Chiarn. 39Mychione euish, O hie Israel, myr shoh ta’n Chiarn Jee dy ghra, Immee-jee, shirveish-jee dagh unnane e yallooyn hene, as ny lurg shoh myrgeddin, mannagh n’eaisht shiu rhym’s: agh ny jean-jee arragh my ennym’s casherick y vee-ooashlaghey lesh nyn ourallyn, as lesh nyn yallooyn. 40Son er my lieau’s casherick, ayns yrjid slieau Israel, ta’n Chiarn Jee dy ghra, ayns shen nee slane lught-thie Israel, veih dy chooilley ashoon, mish y hirveish: shen y raad neem’s soiaghey j’iu, as shen y raad goym’s rish nyn ourallyn, as y chied-vess jeh nyn jebballyn, marish ooilley nyn nheeghyn casherick. 41Neem’s soiaghey jiuish lesh blass millish [nyn ourallyn], tra ver-ym lhiam shiu magh veih’n pobble, as shiu y haglym ass ny cheeraghyn, raad va shiu er nyn skeayley, as beem’s er my chasherickey ayndiu kiongoyrt rish ny ashoonee. 42As bee fys eu, dy nee mish y Chiarn, tra ver-ym lhiam shiu gys thalloo Israel, gys y cheer my-e-chione ren mee breearrey dy choyrt eh da nyn ayraghyn. 43As ayns shen nee shiu cooinaghtyn er nyn raaidyn, as ooilley nyn yannoo, ayndoo ta shiu er ve oolee, as bee shiu dwoaiagh ayns ny sooillyn eu hene, son ooilley ny huilk ta shiu er chur-rish. 44As bee fys eu dy nee mish y Chiarn, tra ta mee er ghellal riuish er graih my ennym, cha nee cordail rish nyn raaidyn mee-chrauee, ny cordail rish nyn ghrogh-yannoo O shiuish hie Israel, ta’n Chiarn Jee dy ghra.

45Ny-sodjey, haink goo yn Chiarn hym’s, gra, 46Vac y dooinney, chyndaa dty eddin my-yiass, as lhig da dty ghoo shilley er y jiass, as jean phadeyrys noi keyll y vagher jiass. 47As abbyr rish keyll y jiass, Clasht rish goo yn Chiarn, Myr shoh ta’n Chiarn Jee dy ghra, Cur-my-ner, neem’s aile y ghoostey aynyd, as nee eh stroie dy chooilley villey glass aynyd, as dy chooilley villey creen: cha bee bree yn aile er ny vooghey, as bee dy chooilley eddin veih’n jiass gys y twoaie er ny lostey ayn. 48As nee dy chooilley eill fakin, dy nee mish y Chiarn t’er voaddey eh: cha bee eh er ny vooghey. 49Eisht dooyrt mee, Ah Hiarn Yee! t’ad gra my-mychione’s, Nagh vel eh loayrt raaghyn-dorraghey?