CAB. XXI

1As haink goo yn Chiarn hym’s, gra, 2Vac y dooinney, chyndaa dty eddin er Jerusalem, as lhig da dty ghoo shilley neose lesh ny ynnydyn casherick, as jean phadeyrys noi thalloo Israel, 3As abbyr rish cheer Israel, Myr shoh ta’n Chiarn dy ghra, Cur-my-ner ta mish dt’oï, as tayrn-ym my chliwe ass e fine, as giare-ym voïd ny crauee as ny mee-chrauee. 4Fakin eisht dy giare-ym voïd ny crauee as ny mee-chrauee, shen-y-fa hed my chliwe ass e fine noi dy chooilley eill veih’n jiass gys y twoaie. 5Dy vod fys ’ve ec dy chooilley eill dy vel mish y Chiarn er hayrn my chliwe ass e fine: cha jyndaa eh arragh. 6Jean gosnaghey er-y-fa shen, uss vac y dooinney, lesh angaish dty veeghyn; as lesh osnaghyn sharroo kiongoyrt rish nyn sooillyn. 7As hig eh gy-kione, tra jir ad rhyt, Cre’n-fa t’ou gosnaghey? dy dreggyr oo, Son ny naightyn ta cheet, ver er dy chooilley chree lheïe ersooyl, as bee dy chooilley laue annoon, as hed dy chooilley spyrryd naardey, as bee dy chooilley ghlioon faase myr ushtey: cur-my-ner, te cheet, as hig eh gys kione, ta’n Chiarn Jee dy ghra.

8Reesht haink goo yn Chiarn hym’s, gra, 9Vac y dooinney, jean phadeyrys, as abbyr, Myr shoh ta’n Chiarn dy ghra, Abbyr, Ta cliwe, ta cliwe shleeuit, as myrgeddin er ny ghlenney. 10Te shleeuit dy yannoo cragh baasoil, te er ny ghlenney dy vod eh soilshean: nee shoh eisht traa son reaïd? te soiaghey beg jeh lorg-reill my vac myr billey cadjin. 11As t’eh er choyrt eh dy ve er ny ghlenney, cour y loaghtey: ta’n cliwe shleeuit, te er ny ghlenney cour laue y stroider. 12Jean gyllagh as geam, vac y dooinney, son hig eh er my phobble, hig eh er ooilley princeyn Israel: bee atchim er my phobble kyndagh rish y chliwe: bwoaill er-y-fa shen er dty lheayst. 13Er-yn-oyr, dy vel eh son prowal, as cre my nee yn cliwe soiaghey beg jeh’n lorg-reill? cha bee arragh jeh, ta’n Chiarn Jee dy ghra. 14Uss er-y-fa shen, vac y dooinney, jean phadeyrys, as bwoaill dty vassyn dy cheilley, as lhig da’n chliwe ve er ny ghoobley yn trass cheayrt, cliwe ny merriu, te cliwe ny deiney mooarey ta stroit, te goll stiagh gys nyn shamyryn follit. 15Ta mee er hoiaghey baare y chliwe noi ooilley nyn yiattyn, dy chur er nyn gree ve faiynt, as nyn dhieyn ayns ymmodee tholtanyn: aless, te er ny yannoo sollys, te shleeuit cour stroie. 16Gow yn raad sailt, edyr gys y laue yesh ny gys y laue chiare, raad erbee ver oo dty eddin. 17Neem’s myrgeddin my vassyn y woalley dy cheilley, as ver-ym er my eulys dy ghoaill fea: mish y Chiarn t’er loayrt eh.

18Haink goo yn Chiarn hym’s reesht, gra, 19Myrgeddin, uss vac y dooinney, tayrn magh dhyt hene daa raad, dy vod cliwe ree Vabylon cheet: lhig daue nyn-neesht cheet magh ass yn un cheer, as reih uss boayl [dy hyndaa]; reih eh ec kione y raad gys yn ard-valley. 20Jean magh raad, dy vod y cliwe cheet gys Rabbath jeh ny Ammoniteyn, as gys Judah t’ayns Jerusalem yn ard-valley voallit. 21Son hass ree Vabylon ec chyndaa yn raad, ec kione y daa raad, dy hirrey lurg obbeeys: ren eh sollys e hideyn, ren eh coyrle y ghoaill rish jallooyn, yeeagh eh son cowrey ’syn aane. 22Ec y laue yesh va’n oalys son Jerusalem, dy phointeil captanyn, dy osley yn veeal ayns y dunverys, dy hroggal seose coraa lesh yllaghey, dy oardaghey greïnyn brishee noi ny giattyn, dy cheau seose carnane, as dy hroggal toor-caggee. 23As bee eh dauesyn myr faishnys foalsey ayns nyn shilley, dauesyn t’er loo breearraghtyn: agh nee eh cooinaghtyn er y vee-chairys, dy vod ad ve goit. 24Shen-y-fa myr shoh ta’n Chiarn Jee dy ghra, Er-yn-oyr dy vel shiu er chur er nyn mee-chairys dy heet ayns cooinaghtyn, myr shen dy vel nyn ghrogh-yannoo er ny hoilshaghey, dy vel nyn beccaghyn er ny akin ayns ooilley ny ta shiu jannoo: er-yn-oyr, ta mee gra, dy vel shiu er jeet gys cooinaghtyn, bee shiu goit lesh y laue.

25As uss phrince mee-chrauee olk dy Israel, ta’n laa er jeet, ver jerrey er dty vee-chairys. 26Myr shoh ta’n Chiarn Jee dy ghra, Scugh voish yn attey reeoil, gow jeh yn chrown: cha bee eh myr v’eh: trog-jee eshyn ta injil, as cur-jee sheese eshyn ta ard. 27Tilg-yms eh bun-ry-skyn, bun-ry-skyn, bun-ry-skyn, as cha bee arragh jeh, derrey hig eshyn, e chairys te, as dasyn ver-ym eh.

28As uss, vac y dooinney, jean phadeyrys, as abbyr, Myr shoh ta’n Chiarn Jee dy ghra, mychione ny Ammoniteyn, as mychione yn oghsan: eer abbyr uss, Ta’n cliwe, ta’n cliwe er ny hayrn, cour stroie te glen shleeuit, lesh e hollyssid dy varroo sleih: 29Choud’s t’ad fakin fardalys er dty hon, choud’s t’ad faishnys breagyn dhyt, dy jean oo greimmey ny mwannallyn ocsyn ta craghit, ny mee-chrauee ta’n laa trome er jeet orroo, as nyn mee-chairys ec kione. 30Der-yms reesht eh ayns y fine? nee mish uss y vriwnys raad v’ou er dty chroo, ayns cheer dty ghooie. 31As deayrt-yms magh ort my yymmoose, neem’s sheidey dt’oï ayns aile my eulys, as livrey-ym oo gys laue deiney dewil, as schleioil dy stroie, 32Bee oo son stoo da’n aile: bee dty uill ayns mean y thalloo, cha bee cooinaghtyn sodjey jeed: son mish y Chiarn t’er loayrt eh.