CAB. XXII

1Ny-sodjey haink goo yn Chiarn hym’s, gra, 2Nish, uss vac y dooinney, nagh jean oo briwnys, nagh jean oo briwnys yn ard-valley folley? dy jarroo shegin dhyt soilshaghey jee ooilley yn vee-chairys eck. 3Eisht abbyr uss, Myr shoh ta’n Chiarn Jee dy ghra, Ta’n ard-valley deayrtey fuill ayns e mean, dy vod yn traa eck ve er ny chooilleeney, as ta jannoo jallooyn noi eck hene, dy hayrn loght urree hene. 4T’ou foiljagh ’syn uill t’ou er gheayrtey, as t’ou er dayrn loght ort hene, liorish dty yallooyn t’ou er n’yannoo: t’ou er chur dty laghyn er nyn doshiaght, as er jeet gys slane earroo dty vleeantyn; shen-y-fa ta mee er dty yannoo son oltooan da ny ashoonee, as son faghid da ooilley ny cheeraghyn. 5Adsyn ta er-gerrey, as adsyn ta foddey voïd, craidee ad mood, uss ta drogh ghoo jeed, as dy mooar seaghnit. 6Cur-my-ner princeyn Israel, va dagh fer jeu mayrt’s rere nyn booar, son deayrtey fuill. 7Aynyd’s t’ad er hoiaghey beg jeh ayr as moir: ayns dty vean t’ad er n’yannoo tranlaase er y joarree: aynyd’s t’ad er heaghney yn chloan gyn ayr, as y ven-treoghe. 8T’ou er hoiaghey beg jeh my reddyn casherick, as er vrishey my ghooneeyn. 9Aynyd’s ta deiney, ta gymmyrkey feanish foalsey, dy gheayrtey fuill: as aynyd’s t’ad gee er ny sleityn: aynyd’s t’ad lhie ayns rouanys. 10Aynyd’s t’ad er roostey nearey nyn ayr: aynyd’s t’ad er injillaghey ish, va soit er-lheh son e neu-ghlennid. 11As ta fer er n’yannoo peccah eajee rish ben e naboo, as ta fer elley dy naareydagh er ve foiljagh rish e inneen-’sy-leigh, as ta fer elley aynyd er injillaghey e huyr, inneen e ayrey. 12Aynyd’s t’ad er ghoaill leagh son deayrtey fuill, t’ou er ghoaill use as bishaghey, as t’ou dy sondagh er ghoaill vondeish er-êgin dty naboonyn, as t’ou er my yarrood, ta’n Chiarn Jee dy ghra.

13Cur-my-ner, er-y-fa shen, ta mee er woalley my vassyn noi an-chiartys dty chosney, as noi yn uill t’er ny ve deayrtit aynyd. 14Vod dty chree surranse, ny dty laueyn ve lajer, er ny laghyn ayndoo dellym rhyt? mish y Chiarn t’er loayrt eh, as cooilleen-ym eh. 15As skeayl-ym oo mastey ny ashoonee, as eiyr-ym noon as noal oo fud ny cheeraghyn, as neem’s dty neu-ghlennid dy bollagh y chastey. 16As bee uss son an-ghoo as oltooan ayns shilley ny ashoonee, as bee fys ayd dy nee mish y Chiarn. 17As haink goo yn Chiarn hym’s, gra, 18Vac y dooinney, ta thie Israel er jeet dy ve dross hym’s, t’ad ooilley prash, as stainney, as yiarn, as leoaie, ayns y choirrey, t’ad eer dross argid. 19Shen-y-fa myr shoh ta’n Chiarn Jee dy ghra, Er-yn-oyr dy vel shiu er jeet dy ve dross, cur-my-ner, er-y-fa shen, neem’s shiu y haglym ayns mean Yerusalem. 20Myr t’ad chaglym argid, as prash, as yiarn, as leoaie, as stainney ayns mean y choirrey, dy heidey yn aile er, dy lheïe eh; myr shen neem’s shiu y haglym ayns my yymmoose, as ayns my eulys, as faag-ym shiu ayns shen, as shen y raad bee shiu lheït. 21Dy jarroo neem’s shiu y haglym, as sheid-ym erriu ayns aile my yymmoose, as bee shiu lheït ayns y vean echey. 22Myr ta’n argid lheït ayns mean y choirrey, myr shen bee shiuish lheït ayns y vean echey; as bee fys eu, dy nee mish y Chiarn t’er gheayrtey magh my eulys erriu.

23As haink goo yn Chiarn hym’s, gra, 24Vac y dooinney, abbyr r’ee, T’ou uss yn thalloo nagh vel er dty ooraghey, chamoo ta fliaghey er jeet neose ort ayns laa yn chorree dewil. 25Ta coardail follit mastey ny phadeyryn eck cheu-sthie j’ee, myr lion garveigagh lheim er y spooilley: t’ad er stroie anmeenyn: t’ad er ghoaill yn verchys, as yn chooid chostal: t’ad er n’yannoo ymmodee mraane-treoghe cheu-sthie j’ee. 26Ta ny saggyrtyn eck er vrishey my leigh, as my reddyn casherick t’ad er vee-ooashlaghey: cha vel ad er n’yannoo soiaghey erbee eddyr casherick as neu-chasherick, chamoo ta scansh oc eddyr glen as neu-ghlen, as t’ad er n’ollaghey nyn sooillyn veih my ghooneeyn, as ta mee er my oltooaney by-chyndagh roo. 27Ta ny princeyn eck ayns e mean, myr moddee-oaldey jollyssagh lurg y spooilley, dy gheayrtey fuill, as dy stroie anmeenyn, dy gheddyn cosney neu-chairagh. 28As ta ny phadeyryn er laa ad lesh morter moal, fakin fardalys, as faishnys breagyn daue, gra, Myr shoh ta’n Chiarn Jee dy ghra, tra nagh vel y Chiarn er loayrt. 29Ta pobble y cheer er chliaghtaghey tranlaase, as dy chur-rish roosteyrys, as er chraghey yn voght as yn ymmyrchagh: dy feer t’ad er n’êginaghey yn joarree dy neu-chairagh. 30As hir mee son dooinney ny mast’ oc, yinnagh yn cleiy y yannoo seose, as shassoo ’sy doarlish roym’s son y cheer, nagh jinnin eh y stroie: agh cha row fer ry-gheddyn. 31Shen-y-fa ta mee er gheayrtey magh my yymmoose orroo, ta mee er chur mow ad lesh aile my eulys: nyn raad hene ta mee er chooilleeney er nyn ghing hene, ta’n Chiarn Jee dy ghra.