CAB. XXIII

1Haink goo yn Chiarn hym’s, keayrt elley, gra, 2Vac y dooinney, va ayn daa ven, inneenyn jeh’n un voir: 3As deiyr ad er streebeeys ayns Egypt, hug ad rish maarderys ayns nyn aegid, ayns shen va nyn geeaghyn er ny hionney, as shen y raad va sheeintyn nyn moidynys er nyn mroo. 4As va ny enmyn oc Aholah, yn unnane shinney, as Aholibah e shuyr: as v’ad lhiam’s, as ren ad mec as inneenyn y ymmyrkey: shoh myr va nyn gowrey; ta Samaria Aholah, as Jerusalem Aholibah. 5As ren Aholah maarderys m’oï tra v’ee lhiam’s, as va’n aigney eck soit er e graihderyn, er ny Assyrianee ny naboonyn eck: 6V’er ny choamrey ayns gorrym, captanyn, as fir-chaggee, ad ooilley deiney aegey stoamey, markiagh er mooin cabbil. 7Eisht ren ee maarderys roo, rish ooilley deiney reiht Assyria, as mâroosyn ooilley, orroo va’n aigney eck soit, ren ee scammyltagh j’ee hene lesh ooilley ny jallooyn oc. 8Chamoo daag ee jeh yn vaarderys dynsee ee ayns Egypt: son ayns e aegid lhie ad mâree, as vroo ad keeaghyn e moidynys, as ren ad maarderys cadjin r’ee. 9Shen-y-fa ta mee er livrey seose ee gys laue ny deiney-sooree eck, gys laue ny Assyrianee, orroo va’n aigney ec soit. 10Ren ad shoh yn nearey eck y roostey, ghow ad ny mec as ny inneenyn eck, as ren ad ee hene y stroie lesh y chliwe: as haink ee dy ve scammyltagh mastey mraane, son v’ad er chooilleeney briwnys urree. 11As ga dy vaik e shuyr Aholibah shoh, v’ee eer ny smessey na ish, ayns saynt foalley mee-reiltagh, as ayns maarderys erskyn maarderys e shuyr. 12V’ee er-cannoo lurg ny Assyrianee e naboonyn, captanyn as fir-reill, coamrit yindyssagh stoamey, markiagh er cabbil, ad ooilley deiney aegey aalin. 13Eisht honnick mee dy row ish ny smessey as ny smessey, dy ghow ad nyn-neesht yn un raad, 14As dy row ee ny s’daaney ayns e maarderys: son tra honnick ee deiney paintit er ny voallaghyn, jallooyn ny Caldeanee er ny chowraghey lesh vermilion, 15Coamrit lesh cryssyn mysh nyn meeghyn, as nyn ghing soit magh lesh cullyryn ass-towse moyrnagh, ad ooilley myr princeyn dy yeeaghyn orroo, lurg aght ny Babylonianee ayns Caldea, cheer nyn ghooie. 16As cha leah as honnick ee ad lesh e sooillyn, va yn aigney eck soit orroo, as hug ee chaghteryn huc gys Caldea. 17As haink ny Babylonianee stiagh huic gys y lhiabbee dy ghraih, as ren ad peccah r’ee lesh nyn maarderys, as v’ec scammyltagh lioroo, derrey va’n aigney eck er ny hyndaa voue. 18Myr shoh ren ee yn maarderys eck hene y vrah, as va’n nearey eck er ny akin: eisht va my aigney’s chyndaït vo-eeish myr ve chyndaït voish e shuyr. 19Ny-yeih, hie ee er e toshiaght ayns maarderys, ayns tayrn gys cooinaghtyn laghyn e aegid, tra ren ee maarderys ayns cheer Egypt. 20Son va’n aigney eck soit er e graihderyn, yn eill oc ta myr feill assylyn, as y dooghys oc myr dooghys cabbil. 21Myr shoh t’ou tayrn gys cooinaghtyn rouanys dty aegid, ayns broo dty cheeaghyn liorish ny Egyptianee, as sheeintyn dty voidynys.

22Shen-y-fa, O Aholibah, myr shoh ta’n Chiarn Jee dy ghra, Cur-my-ner, brasnee-ym seose dty gheiney-sooree dt’oï, voue ta dty aigney er ny scarrey, as ver-ym lhiam ad dt’oï, er dy chooilley heu; 23Ny Babylonianee, as ooilley ny Caldeanee, Pekod, as Shoa, as Koa, as ooilley ny Assyrianee mâroo; ad ooilley reih deiney aegey, captanyn, as fir-reill, chiarnyn mooarey as ooasle, ad ooilley markiagh er cabbil. 24As hig ad dt’oï lesh fainee, lesh waggonyn, as queeylyn, as lesh armee dy phobble nee soiaghey ort, lesh buckler, as scape, as helmet, cruin mygeayrt: as neem’s briwnys y hoiaghey kiongoyrt roo, as nee ad uss y vriwnys cordail rish nyn mriwnyssyn hene. 25As soie-ym my eadolys dt’oï, as dellee ad dy eulyssagh rhyt: as giaree ad jeed dty stroin, as dty chleayshyn, as shen ny vees er-mayrn jeed nee eh tuittym liorish y chliwe: nee ad dty vec as dty inneenyn y ghoaill, as bee yn fooilliagh er ny stroie lesh aile. 26Nee ad myrgeddin uss y roostey jeh dty choamraghyn, as dty yewellyn stoamey y raipey lhieu. 27Shoh myr ver-ym er dty neu-heeltys dy scuirr voïd, as dty vaarderys dynsee oo ayns cheer Egypt: myr shen nagh jean oo dty hooillyn y hroggal seose huc, ny cooinaghtyn er Egypt arragh. 28Son myr shoh ta’n Chiarn Jee dy ghra, Cur-my-ner, livrey-ym oo gys y laue ocsyn, ta dwoaie ayd orroo, gys y laue ocsyn, voue ta dty aigney er ny harbaa. 29As dellee ad dy feohdagh rhyt, as nee ad ooilley dty laboraght y ghoaill ersooyl, as faagee ad oo rooisht as lhome, as bee nearey dty vaarderys er ny akin, chammah dty yollys as dty vaarderys. 30As neem’s ny reddyn shoh y yannoo rhyt, er-yn-oyr dy vel oo er n’eiyrt er maarderys rish ny ashoonee, er-yn-oyr dy vel oo jeant dwoaiagh lesh nyn yallooyn. 31T’ou er n’immeeaght ayns raad dty huyr, shen-y-fa ver-ym yn cappan ecksh ayns dty laue. 32Myr shoh ta’n Chiarn Jee dy ghra, Iu-ee oo jeh cappan dty huyr, dowin as lhean: bee oo er ny chraidey mysh, as ayns faghid; s’mooar te dy chummal. 33Bee oo er dty laadey lesh meshtallys as trimshey, lesh y cappan dy atchim as toyrt-mow, eer lesh cappan dty huyr Samaria. 34Nee oo dy jarroo giu jeh, as jeegey ass eh, as nee oo brishey ayns peeshyn myn eh, as nee oo dty cheeaghyn hene y raipey jeed, son ta mee er loayrt eh, ta’n Chiarn Jee dy ghra. 35Shen-y-fa, myr shoh ta’n Chiarn Jee dy ghra, Er-yn-oyr dy vel oo er my yarrood, as er chur cooyl rhym, shen-y-fa nee oo gymmyrkey kerraghey dty neu-heeltys, as dty vaarderys.

36Dooyrt y Chiarn rhym’s ny-sodjey, Vac y dooinney, nagh jean uss Aholah as Aholibah y vriwnys? dy jarroo, soilshee daue nyn aghtyn eajee; 37Dy vel ad er chur-rish brishey-poosey, as ta fuill ayns nyn laueyn, as lesh nyn yallooyn t’ad er vrishey poosey, as er chur er nyn mec myrgeddin, t’ad er n’ymmyrkey dooys, dy gholl trooid yn aile er nyn son dy stroie ad. 38Ny-sodjey, shoh t’ad er n’yannoo rhym: t’ad er hollaghey my ynnyd’s casherick er y laa cheddin, as er vrishey my ghooneeyn. 39Son tra v’ad er varroo nyn gloan son oural gys nyn yallooyn, eisht haink ad er y laa cheddin stiagh ayns my hiamble, dy yannoo neu-ghlen jeh; as cur-my-ner myr shoh t’ad er n’yannoo ayns mean my hie. 40As ny-sodjey, dy vel shiu er chur fys er deiney dy heet veih foddey, hucsyn va chaghter er ny choyrt; as cur-my-ner, haink ad: er nyn son, ren oo oo-hene y oonlagh, phaint oo dty hooillyn, as hoie oo magh oo hene dy stoamey. 41As hoie oo er lhiabbee staydoil, as va boayrd soit magh er dty veealloo, er t’ou er choyrt my incense as my ooil. 42As va coraa earroo mooar dy leih rouanagh mâree, as marish y chiartanse haink seose, marish ny Sabeanee veih’n aasagh, lesh braceletyn er nyn laueyn, as atteeyn aalin er nyn ghing. 43Eisht dooyrt mee reeish, va er n’aase shenn ayns maarderys, Jean ad nish maarderys reeish, as ish roosyn? 44Ny-yeih, hie ad stiagh myr gys strumpag ghaaney: er yn aght cheddin va oc dy yannoo rish Aholah as Aholibah, ny mraane gyn-nearey shoh.

45As nee deiney ynrick ad y vriwnys, myr adsyn ta brishey-poosey, as rere loght ny mraane ta deayrtey fuill; er-yn-oyr dy nee maarderee ad, as fuill er nyn laueyn. 46Son myr shoh ta’n Chiarn Jee dy ghra, Ver-ym lhiam sheshaght orroo, as livrey-ym seose ad gys cappeeys as spooilley. 47As nee yn cheshaght ad y chlaghey lesh claghyn, as stroie ad lesh nyn gliwenyn, nee ad ny mec as ny inneenyn oc y stroie, as lostey ny thieyn oc lesh aile. 48Myr shoh, ver-ym er maarderys dy scuirr ass y cheer, dy vod dy chooilley ven goaill raaue, gyn dy yannoo lurg ny aghtyn naareydagh euish. 49As nee ad nyn neu-heeltys y cherraghey erriu, as nee shiu peccaghyn nyn yallooyn y ymmyrkey: as bee fys eu, dy nee mish y Chiarn Jee.