CAB. XXIV

1Reesht ayns y nuyoo vleïn, ayns y jeihoo vee, ’sy jeihoo laa jeh’n vee, haink goo yn Chiarn hym’s, gra, 2Vac y dooinney, scrieu sheese ennym y laa, eer y laa t’ayn jiu: er yn eer laa shoh hene ta ree Vabylon er hoiaghey eh-hene noi Jerusalem. 3As cur magh coraa-dorraghey gys y thie mee-viallagh, as abbyr roo, Myr shoh ta’n Chiarn Jee dy ghra, Soie pot er yn aile, soie er eh, as myrgeddin deayrt ushtey ayn. 4Chaggle ny peeshyn ny chour dy ve ayn, eer dy chooilley reih peesh, yn shleayst, as y clingan; lhieen eh lesh ny reih juntyn. 5Gow reih maase y chioltane, as losht myrgeddin ny craueyn fo, as cur er dy chloie dy mie, as lhig daue ny juntyn y vroie ayn.

6Shen-y-fa myr shoh ta’n Chiarn Jee dy ghra, Smerg da’n ard-valley folley, da’n phot, ta’n veeaylys echey ayn, as nagh vel y veeaylys echey er n’gholl magh ass, cur-jee lhieu magh eh, peesh as peesh, ny lhig da cronney erbee tuittym er. 7Son ta’n uill eck ’sy vean eck, daag ee eh er mullagh y chreg, cha gheayrt ee er y thalloo eh, dy choodaghey eh lesh ooir: 8Son eulys dy heet seose, dy ghoaill kerraghey: ta mee er hoiaghey yn uill eck er baare ny creggey, nagh beagh eh er ny choodaghey. 9Shen-y-fa, myr shoh ta’n Chiarn Jee dy ghra, Smerg da’n ard-valley folley! neem’s dy jarroo yn chreagh son yn aile mooar. 10Tilg-jee er fuygh, cur-jee er yn aile dy lostey, broie-jee yn eill, as spice-jee eh dy mie, as lhig da ny craueyn ve losht. 11Eisht soie-jee eh follym er ny smarageyn echey, dy vod yn prash echey ve jiarg cheh, as lostey, as dy vod e vroïd ve lheït ayn, dy vod y scum echey ve er ny ghlenney dy bollagh ass. 12S’mooar t’ee seaghnit lesh ny breagyn eck hene, as cha jagh y scum vooar eck magh veih: bee’n scum eck ’syn aile. 13Ayns dty vroïd ta rouanys; er-yn-oyr dy vel mee er dty ghlenney, as cha beagh oo er dty ghlenney; cha bee oo er dty ghlenney veih dty vroïd arragh, derrey ver-ym er my eulys dy hannaghtyn ort. 14Mish y Chiarn t’er loayrt eh, hig eh gys kione, as neem’s eh y chooilleeney, cha jean-ym chyndaa, chamoo nee’m chymmey y hoilshaghey, chamoo caghlaa-ym my aigney: cordail rish dty raaidyn, as cordail rish dty obbraghyn, nee ad uss y vriwnys, ta’n Chiarn Jee dy ghra.

15Myrgeddin haink goo yn Chiarn hym’s, gra, 16Vac y dooinney, cur-my-ner, ta mee goaill ersooyl voïd yeearree dty hooillyn ec builley: ny-yeih cha jean oo dobberan, ny keayney, chamoo nee dty yheïr roie sheese. 17Shaghyn dty cheayney, ny jean dobberan erbee son ny merriu, kiangle ort coamrey dty chione, as cur dty vraagyn er dty chassyn, as ny coodee dty veillyn, as ny ee arran ny trimshee. 18Myr shen loayr mee rish y pobble ’sy voghrey, as ec yn astyr hooar my ven baase: as ren mee ’sy voghrey myr ve oardit dou.

19As dooyrt y pobble rhym’s, Nagh n’insh oo dooin cre ta ny reddyn shoh dooinyn, dy vel oo jannoo myr shoh? 20Eisht dreggyr mee ad, Haink goo yn Chiarn hym’s, gra, 21Abbyr rish thie Israel, Myr shoh ta’n Chiarn dy ghra, Cur-my-ner, neem’s my ynnyd casherick ny hraartys, ard-vooaralys nyn niart, yeearree jeean nyn sooillyn, as shen ta nyn annym soit er: as nee ny mec, as ny inneenyn eu t’er-mayrn, tuittym liorish y chliwe. 22As nee shiuish myr ta mish er n’yannoo, cha jean shiu nyn meillyn y choodaghey, chamoo nee shiu gee arran ny trimshee. 23As nee shiu nyn ghing y choamrey, as bee nyn mraagyn er nyn gassyn; cha jean shiu dobberan ny keayney, agh nee shiu shymley ersooyl son nyn mee-chraueeaght, as dobberan y derrey yeh gys y jeh elley. 24Myr shoh ta Ezekiel son cowrey diuish: cordail rish ooilley ny t’eshyn er n’yannoo, nee shiuish myrgeddin: as tra hig shoh gys kione, bee fys eu dy nee mish y Chiarn. 25Myrgeddin, uss vac y dooinney, nagh jig eh gys kione er y laa shen, tra goym voue nyn niart, ard-vooaralys nyn ghloyr, yeearree nyn sooillyn, as shen ta nyn aignaghyn soit er, nyn mec, as nyn inneenyn; 26Dy jig scapailtagh hood’s er y laa shen, dy chur ort dy chlashtyn eh lesh dty chleayshyn? 27Er y laa shen bee dty veeal er ny osley huggeysyn t’er scapail, as loayrys oo, as cha bee oo ny-sodjey balloo, as bee oo son cowrey daue, as bee fys oc dy nee mish y Chiarn.