CAB. XXV

1Haink goo yn Chiarn hym’s reesht, gra, 2Soie uss dty eddin noi ny Ammoniteyn, as jean phadeyrys noi ocsyn; 3As abbyr rish ny Ammoniteyn, Clasht-jee goo yn Chiarn Jee, Myr shoh ta’n Chiarn Jee dy ghra, Er son dy vel uss er ghra, Aha, noi yn ynnyd casherick aym’s, ec y traa ve er ny choyrt naardey, as noi thalloo Israel, tra ve treigit, as noi thie Yudah, tra v’ad goit ersooyl ayns cappeeys; 4Cur-my-ner, er-y-fa shen, neem’s uss y livrey gys deiney yn niar son eiraght, as nee ad soiaghey ny plaaseyn oc aynyd’s, as troggee ad nyn dhieyn aynyd: nee adsyn gee yn mess ayd’s, as nee ad giu dty vainney. 5As ver-yms Rabbah dy ve stabyl son camelyn, as ny Ammoniteyn son ynnyd fynneraght da shioltaneyn: as bee fys eu dy vel mish y Chiarn. 6Son myr shoh ta’n Chiarn Jee dy ghra, Er-yn-oyr dy vel uss er woalley dty vassyn, as er stampey lesh dty chassyn, as er ghoaill boggey ayns dty chree lesh ooilley dty vyskid noi cheer Israel: 7Cur-my-ner, er-y-fa shen, sheeyn-yms magh my laue ort’s, as livrey-ym uss son spooilley da ny ashoonee, as giare-ym oo jeh veih mastey yn pobble, as ver-yms ort’s dy gholl naardey mastey ny cheeraghyn: nee’m uss y stroie, as bee fys ayd, dy nee mish y Chiarn.

8Myr shoh ta’n Chiarn Jee dy ghra, Er-yn-oyr dy vel Moab as Seir gra, Cur-my-ner ta thie Yudah goll-rish ooilley ny ashoonee: 9Shen-y-fa, cur-my-ner foshil-yms slystyn Voab, eer ny ard-valjyn t’er yn oirr echey, gloyr ny cheerey, Beth-jeshimoth, Baal-meon, as Kiriathaim, 10Gys deiney yn niar, marish ny Ammoniteyn, as ver-ym ad daue ayns eiraght: as cha bee imraa sodjey jeh cloan Ammon mastey ny ashoonyn. 11As ver-ym briwnys noi Moab, as bee fys eu dy nee mish y Chiarn.

12Myr shoh ta’n Chiarn dy ghra, Er-yn-oyr dy vel Edom er ghellal dy eulyssagh rish thie Yudah, ayns goaill cooilleeney dewil, as dy mooar er heaghney ad, as er ghoaill cooilleen-aigney jeu. 13Shen-y-fa shoh myr ta’n Chiarn Jee dy ghra, Sheeyn-yms magh my laue er Edom neesht, as giare-ym jeh dooinney as baagh veih shen, as ver-yms er dy ve ny hraartys veih Teman, as nee cummaltee Dedan tuittym lesh y chliwe. 14As goym cooilleeney dou hene er Edom, liorish laue my phobble Israel, as nee adsyn ayns Edom cordail rish my chorree, as cordail rish my eulys, as ennee ad yn eulys aym’s, ta’n Chiarn Jee dy ghra.

15Myr shoh ta’n Chiarn Jee, dy ghra, Er-yn-oyr dy vel ny Philistinee er ghellal dy elgyssagh, as er ghoaill cooilleeney lesh cree myskidagh, dy stroie Judah, ayns nyn shenn noidys; 16Shen-y-fa, shoh myr ta’n Chiarn Jee dy ghra; Cur-my-ner, sheeyn-yms magh my laue er ny Philistinee, as giare-ym jeh ny Cherethim, as ver-ym naardey adsyn ta er-mayrn jeh slyst ny marrey. 17As cooilleen-yms kerraghey trome orroosyn lesh oghsan dewil; as bee fys ocsyn dy nee mish y Chiarn, tra ver-yms my vriwnyssyn trome nyn mastey.