CAB. XXVI

1As haink eh gy-kione ’syn un vleïn jeig, er yn chied laa jeh’n vee, dy daink goo yn Chiarn hym’s, gra, 2Vac y dooinney, er-yn-oyr dy vel Tyrus er ghra noi Jerusalem, Aha, ta ish, va giattyn y phobble, brisht, t’ee er ny hyndaa hym’s, beem’s er my lhieeney lh’ee, nish dy vel ee er ny choyrt naardey. 3Shen-y-fa, shoh myr ta’n Chiarn Jee dy ghra, Cur-my-ner ta mish dt’oï’s, O Tyrus, as ver-ym er ymmodee ashoonyn dy heet seose dt’oï, myr ta’n keayn cur er ny tonnyn troggal ’sy roayrt. 4As ver adsyn voallaghyn, Tyrus naardey, as lhieggee ad sheese ny tooryn eck, as sheeb-yms ersooyl yn verchys eck myr joan, as faag-yms ee lhome myr baare ny creggey. 5As bee ish ayns mean yn aarkey son ynnyd cour skeayley lieenteenyn: son ta mish er loayrt eh, ta’n Chiarn Jee dy ghra, as hig eh dy ve spooilley da ny ashoonyn. 6As bee ny inneenyn ecksh t’ayns y vagher er nyn stroie lesh y chliwe, as bee fys oc dy nee mish y Chiarn.

7Son myr shoh ta’n Chiarn Jee dy ghra, Er Tyrus ver-yms lhiam Nebuchadrezzar ree Vabylon, ree dy reeaghyn, veih’n twoaie lesh cabbil, as lesh fainee, as lesh markee, as sheshaghtyn-caggee, as mooarane sleih. 8As marree eshyn dty inneenyn lesh y chliwe ayns y vagher, as troggee eh toor dt’oï, as carnane-caggee, as gowee eh ny laue eilley-caggee dt’oï. 9As nee eh soiaghey greinyn-caggee son lhieggal dty voallaghyn, as lesh e oayrdyn nee eh bwoalley sheese ny tooryn ayd. 10As bee oo coodit lesh y joan vees troggit liorish earroo mooar e chabbil, nee dty voallaghyn craa lesh feiyr ny markee, as ny queeylyn, as ny fainee, tra hed eh stiagh er dty yiattyn, myr ta deiney chionney stiagh ayns ard-valley raad ta brishey jeant. 11Lesh yngnyn e chabbil nee eshyn stampey sheese dty straïdyn; marree eh yn sleih ayd’s lesh e chliwe, as hed ny cashtallyn lajer ayd’s sheese gys y thalloo. 12As bee dty verchys oc son spooilley, as dty varchantys son cragh; as brishee ad sheese dty voallaghyn, as dty hieyn aalin ver ad mow, as tilgee ad dty chlaghyn, as dty fuygh, as dty yoan, ayns mean yn ushtey. 13As ver-yms er kiaulleeaght dty arraneyn dy scuirr, as cha bee bingys ny claasaghyn ny-sodjey er nyn glashtyn. 14As ver-ym ort dy ve myr baare lhome ny creggey; bee oo son boayl dy skeayley lieenteenyn er: cha bee oo arragh er dty hroggal: son mish y Chiarn ta er loayrt eh, ta’n Chiarn dy ghra.

15Myr shoh ta’n Chiarn Jee dy ghra rish Tyrus, Nagh jean ny ellanyn craa lesh feiyr dty lhieggey, tra ta ny guintee gyllaghey, tra vees traartys jeant cheu-sthie jeed? 16Eisht hig ooilley princeyn ny marrey sheese veih nyn stuill-reeoil, as ver ad jeu nyn goamrey staydoil, as ver ad voue nyn garmadyn laatshit: bee ad coodit lesh atchim, nee ad soie er y thalloo, bee ad er-creau ec dy chooilley hyndaa, as gowee ad yindys jeed. 17As troggee ad seose accan treih er dty hon, as jir ad rhyt, Kys t’ou er dty choyrt naardey, oayll mooar deiney ny marrey, yn ard-valley ooasle, va lajer ayns yn aarkey, ish as ny cummaltee eck hug nyn dappey vouesyn ooilley va taaghey huic. 18Eisht bee ny ellanyn er-creau ayns laa dty lhieggey; s’feer eh, dy bee ellanyn ny marrey seaghnit ec dty hoyrt-mow. 19Son myr shoh ta’n Chiarn Jee dy ghra, Tra neem’s uss dy ve ard-valley follym-faase, myr ny ard-valjyn ta gyn cummaltee, tra ver-yms lhiam seose yn diunid harryd, as nee ushtaghyn mooarey dty choodaghey; 20Tra ver-yms lhiam sheese oo, mâroosyn ta goll sheese gys yn oaie, marish pobble y chenn earish, as ver-ym ort dy lhie fo diunid ny hooirey, ayns boayl foddey treigit, mâroosyn ta goll sheese gys yn oaie, nagh bee cummaltee aynyd; as nee’m soiaghey gloyr ayns thalloo ny bioee: 21Nee’m uss y yannoo dty atchim, as cha bee arragh jeed, ga dy shirree ad er dty hon, foast cha bee oo dy bragh er dty gheddyn reesht, ta’n Chiarn Jee dy ghra.