CAB. XXVII

1As haink goo yn Chiarn hym’s reesht, gra, 2Nish uss vac y dooinney, gow lesh bardoon son Tyrus; 3As abbyr rish Tyrus, O uss ta soit er oirr ny marrey, uss ta marchan y phobble son ymmodee ellanyn, Myr shoh ta’n Chiarn Jee dy ghra, O Tyrus, t’ou er ghra, s’yindyssagh ta my aalid! 4T’ou er dty hoiaghey er diunid ny marrey, adsyn ren uss y hroggal, t’ad er chur mullagh er dty aalid. 5T’ad er n’yannoo ooilley ny buird lhuingey ayd jeh biljyn-juys Senir: t’ad er ghoaill cedaryn veih Lebanon dy yannoo crooin er dty hon. 6Jeh biljyn-darragh Vashan t’ad er n’yannoo dty vaidjyn-raue: ta sheshaght ny Ashuriteyn er n’yannoo ny beckyn ayd jeh ivory, veih ellanyn Chittim. 7Aanrit keyl lesh obbyr-snaidey, ren oo skeayley magh son shiaull dhyt; gorrym as gorrym-jiarg veih ellanyn Elishah va coodaghey dty chabbaneyn lhuingys. 8Cummaltee Zidon as Arvad va ny shiolteyryn ayd’s: va ny deiney schleioil ayd hene dty gheiney-stiuree, O Tyrus. 9Va shenn gheiney lowal veih Gebal, as schleioil, ny seyir-lhuingey ayd’s, va ooilley lhongyn ny marrey lesh nyn shiolteyryn taaghey hood’s, dy ghellal ayns dty varchantys. 10Deiney veih Persia, as veih Lud, as veih Phut va dty hidooryn ayns dty heshaghtyn-caggee: hrogh ad seose yn scape, as yn helmet aynyd, ren ad soiaghey magh oo dy stoamey. 11Va deiney Arvad marish dty heshaght-chaggee cruin mygeayrt er dty voallaghyn, as va ny Gammadim er dty hooryn; hrogh ad nyn scapeyn er dty voallaghyn cruin mygeayrt: t’ad er n’yannoo dty aalid slane fondagh. 12Tarshish va dty varchan son mooarane dty chooid, ayns dy chooilley cheint dy verchys; lesh argid, yiarn, stainney as leoaie ren ad dellal ayns dty vargaghyn. 13Javan, Tubal, as Meshech va dty varchanyn; ren ad dellal son persoonyn deiney, as siyn prash ayns dty vargey. 14Ren deiney thie Togarmah dellal ayns dty vargaghyn lesh cabbil, as markee, as muleyn. 15Va deiney Dedan dty varchanyn: va ymmodee ellanyn marchantys dty laue: hug ad lhieu hood son gioot, feeacklyn ivory, as ebony. 16Va Syria dty varchan son ymmodee cooid dty obbyr-lauee hene; ren ad dellal ayns dty vargaghyn lesh emeraldyn, gorrym-jiarg, as obbyr laatshagh, as aanrit keyl, as coral as agate. 17Va Judah as thalloo Israel ny marchanyn ayd’s: ren ad dellal ayns dty vargey lesh curnaght Vinnith as Phannag, as mill, as ooil, as balm. 18Va Damascus dty varchan son ymmodee cooid dty obbyr-lauee hene, son mooarane lught jeh dy chooilley cheint dy verchys: ayns feeyn veih Helbon, as ollan vane. 19Dan neesht as Javan goll huggey as veih, ren dellal ayns dty vargaghyn: va yiarn sollys, cassia, as calamus ayns dty vargaghyn. 20Va Dedan dty varchan ayns eaddagh costal, cour fainee. 21Arabia, as ooilley princeyn Chedar, ren dellal rhyt’s ayns eayin, as reaghyn, as goair: ayndoo shoh v’ad dty ghellaryn. 22Va marchanyn Sheba as Raamah ny marchanyn ayd’s, ren ad dellal ayns dty vargaghyn, lesh ooilley ny ard-spiceyn, as lesh dy chooilley horch dy chlaghyn costal, as airh. 23Haran, as Canneh, as Eden, marchanyn Sheba, Ashur, as Chilmad, v’ad ny dellaryn ayd’s. 24V’ad shoh dty varchanyn ayns dy chooilley horch dy chooid, ayns eaddagh gorrym, as obbyr-snaidey, as ayns kishtaghyn dy choamraghyn berchagh, kianlt lesh coyrdyn, as jeant jeh cedar mastey dty varchantys. 25Ren lhongyn Tarshish goaill arrane jeed’s ayns dty vargey, as v’ou er dty lhieeney, as soit magh dy feer ghloyroil ayns mean ny marrey.

26Ta ny ymmyrtee ayd’s er dty stiurey fud tonnyn gaueagh: ta’n gheay-niar er dty vrishey ayns mean ny marrey. 27Dty verchys, as dty vargaghyn, dty varchantys, dty hiolteyryn, as dty philotyn, ny seyir-lhuingey, as adsyn va dellal ayns dty varchantys, as ooilley dty gheiney-caggee ta aynyd’s, marish ooilley dty heshaght ta cheu-sthie jeed, tuittee ad ayns mean yn aarkey, ayns laa dty hoyrt-mow. 28Bee dty naboonyn er-creau ec feiyr yllaghey dty philotyn. 29As ooilley adsyn ta loaghtey yn maidjey-raue, ny shiolteyryn, as ooilley pilotyn ny marrey, hig ad sheese veih nyn lhongyn, nee ad shassoo er y traie; 30As ver ad er nyn goraa dy ve er ny chlashtyn dt’oï, as nee ad geamagh dy sharroo, as tilgey joan er nyn ghing, nee ad gymmylt ad-hene ’sy leoie. 31As nee ad jannoo ad-hene dy bollagh meayl er dty hon’s, as ver ad aanrit-sack orroo hene, as nee ad dobberan er dty hon, lesh sherriuid cree, as keayney ghyere. 32As ayns nyn drimshey troggee ad seose bardoon treih er dty hon, as dobberan harryd’s, gra, Cre’n ard-valley ta goll-rish Tyrus, dy ve soylit reeish, ta er ny stroie ayns mean yn aarkey? 33Tra hie dty chooid varchan magh er yn aarkey, ren oo magh ymmodee sleih, ren oo berchagh jeh reeaghyn y theihll, lesh ymmodee dty verchys, as dty varchantys. 34Tra vees oo er dty vrishey lesh ny tonnyn ayns diunid ny hushtaghyn, nee dty varchantys, as ooilley dty heshaght tuittym cheu-sthie jeed. 35Bee ooilley cummaltee ny ellanyn as nyn dappey voue er dty hon, as bee ny reeaghyn oc ayns mooarane aggle, bee nyn drimshey cronnal ayns nyn eddin. 36Bee oo son faghid ny marchanyn mastey’n pobble, bee oo son atchim, as bee oo rey er son dy bragh.