CAB. XXVIII

1Haink goo yn Chiarn hym’s reesht, gra, 2Vac y dooinney, abbyr rish prince Tyrus, Myr shoh ta’n Chiarn Jee dy ghra, Er-yn-oyr dy vel dty chree troggit seose, as dy vel oo er ghra, Ta mish my Yee, ta mee soie er stoyl Yee, ayns mean ny faarkaghyn; foast cha vel oo agh dooinney, as cha nee Jee, ga dy vel oo smooinaghtyn ayns dty chree dy ve myr Jee: 3Cur-my-ner t’ou ny s’creeney na Daniel; cha vel folliaght erbee oddys ad y cheiltyn voïd: 4Lesh dty chreenaght as dty hoiggal t’ou er chosney dhyt hene berchys, as er gheddyn argid as airh ayns dty hashtaghyn: 5Lesh dty chreenaght vooar, as liorish dty ghellal t’ou er vishaghey dty verchys, as ta dty chree troggit seose er coontey dty verchys: 6Shen-y-fa myr shoh ta’n Chiarn Jee dy ghra, Son dy vel oo er hoiaghey seose dty chree, dy ve myr Jee; 7Cur-my-ner, er-y-fa shen, ver-yms lhiam joarreeyn ort, yn vooinjer atchimagh ny ashoonee: as tayrnee ad nyn gliwenyn noi aalid dty chreenaght, as nee ad dooghey dty yillid. 8Ver ad lhieu sheese oo gys y diunid, as bee oo er dty stroie, myr adsyn ta baiht ayns mean ny marrey. 9Jean oo foast gra kiongoyrt rishyn ta stroie oo, Ta mish my Yee? agh she dooinney vees oo, as cha nee Jee ’sy laue echeysyn ta dy stroie oo. 10Nee uss surranse baaseyn ny chymmyltee, liorish laueyn joarree: son ta mish er loayrt eh, ta’n Chiarn Jee dy ghra.

11Marish shoh, haink goo yn Chiarn hym’s, gra, 12Vac y dooinney, trog seose bardoon er ree Tyrus, as abbyr rish, Myr shoh ta’n Chiarn Jee dy ghra, T’ou sealal seose yn sym, lane dy chreenaght, as slane aalid. 13T’ou er ny ve ayns Eden garey Yee; dy chooilley chlagh chostal va dty choodagh, yn sardius, topaz, as y diamond, yn beryl, yn onyx, as y jasper; yn sapphire, yn emerald, as y carbuncle, as airh: va stoo obbrit dty habretyn, as ny feddanyn kiarit er dty hon, er-dyn laa v’ou troggit. 14Uss yn ard-cherub ooilit, ta skeayley lhean dty skianyn: as shen myr ta mee er dty hoiaghey; v’ou uss er slieau casherick Yee; t’ou er n’gholl noon as noal mastey ny claghyn aileagh. 15V’ou ynrick ayns dty ghellal, veih’n laa v’ou er dty chroo, derrey va mee-chairys er ny gheddyn aynyd. 16Liorish ymmodee dty varchantys, t’ad er dty lhieeney lung-lane dy hranlaase, as t’ou er n’yannoo peccah: shen-y-fa eiyr-yms oo myr an-chasherick magh ass slieau Yee: as nee’m uss y stroie, O cherub skianagh veih mastey ny claghyn aileagh. 17Va dty chree troggit seose kyndagh rish dty aalid, t’ou er chaghlaa dty chreenaght ayns moyrn dty hollyssid: lhieg-yms oo gys y thalloo, ver-yms ort, dy lhie oo kiongoyrt rish reeaghyn, as oo dy ve son shilley daue. 18T’ou er an-chasherickey dty hiambleyn lesh mooadys dty vee-chairys, liorish mee-chairys dty ghellal: shen-y-fa ver-ym lhiam aile magh ass dty vean, nee uss y stroie, as ver-ym lhiam oo gys leoie y thalloo ’sy chilley ocsyn ooilley ver my-ner oo. 19Nee ooilley dty ainjyssee coayl nyn dappey er y choontey ayd’s: bee oo son atchim, as cha bee oo ny-sodjey er-mayrn. 20Reesht haink goo yn Chiarn hym’s, gra, 21Vac y dooinney, soie dty eddin noi Zidon, as jean phadeyrys noi eck, 22As abbyr, Myr shoh ta’n Chiarn Jee dy ghra, Cur-my-ner, ta mish dt’oï’s, O Zidon, as bee’m er my ghloyraghey aynyd’s: as yiow ad fys, dy nee mish y Chiarn, tra ta mee er chooilleeney my vriwnyssyn aynjee, as tra vee’m er my chasherickey aynjee. 23Son ver-yms stiagh yn phlaih urree, as fuill stiagh ayns ny straïdyn eck, as bee ny guintee er nyn mriwnys ayns y vean eck, liorish yn chliwe urree, er dy chooilley heu; as bee fys oc dy nee mish yn Chiarn.

24As cha bee ny-sodjey ayn yn dress yialgagh da thie Israel, ny drine geuagh jeusyn ooilley ta mygeayrt-y-moo, ren soiaghey beg jeu; as bee fys oc dy nee mish y Chiarn Jee. 25Myr shoh ta’n Chiarn dy ghra, Tra ta mee er haglym thie Israel veih’n pobble, nyn mastey t’ad er nyn skeayley, as dy bee’m er my chasherickey ayndoo ayns shilley ny ashoonee, eisht nee ad cummal ayns y cheer oc hene, shen ta mee er choyrt da my harvaant Jacob. 26As nee ad baghey dy sauchey ayns shen, troggee ad thieyn, as nee ad soiaghey garaghyn-feeyney: dy jarroo nee ad cummal dy souyr, tra veem’s er chooilleeney briwnys orroosyn ooilley mygeayrt, ta soiaghey beg jeusyn, as bee fys oc, dy nee mish y Chiarn yn Jee ocsyn.