CAB. XXIX

1Ayns y jeihoo vleïn, ayns y jeihoo vee, er y nah laa yeig jeh’n vee, haink goo yn Chiarn hym’s, gra, 2Vac y dooinney, soie dty eddin noi Pharaoh ree Egypt, as jean phadeyrys n’oï, as noi ooilley Egypt. 3Loayr, as abbyr, Myr shoh ta’n Chiarn Jee dy ghra, Cur-my-ner, ta mish dt’oï’s, Pharaoh, ree Egypt, yn dragon mooar ta lhie ayns mean ny awinyn echey, ta er ghra, Ta’n awin aym’s lhiam pene, as my chour hene ta mee er n’yannoo eh. 4Agh ver-yms dooanyn ayns dty cheeillyn’s, as ver-ym er eeastyn dty awin dy lhiantyn gys dty scaailey, as sleayd-ym seose oo ass mean dty awinyn, as nee ooilley eeastyn dty awin lhiantyn gys dty scaailey. 5As faag-ym oo tilgit magh ayns yn aasagh, uss as ooilley eeastyn dty awinyn: nee oo tuittym ayns ny magheryn foshlit, cha bee oo er dty hymsagh, ny er dty haglym: ta mish er dty choyrt son beaghey da maase y vagheragh, as da eeanlee yn aer. 6As bee fys ec ooilley cummaltee Egypt, dy nee mish y Chiarn, son cha vel ad er ve agh lorg chuirtlagh da thie Israel. 7Tra ren ad uss y ghoaill er laue; vrish oo, as raip oo ooilley yn gheaylin oc: as tra hug ad nyn marrant ort, ren oo brishey, as hug oo er ooilley ny meeghyn oc dy choayl nyn mioyr.

8Shen-y-fa, shoh myr ta’n Chiarn Jee dy ghra, Cur-my-ner, ver-yms lhiam cliwe ort’s, as giare-ym jeh assyd dooinney as baagh. 9As bee thalloo Egypt treigit, as naardey; as bee fys oc dy nee mish y Chiarn; er-yn-oyr dy vel ad er ghra, Ta’n awin shoh lhiam’s, as ta mee hene er n’yannoo eh. 10Cur-my-ner, er-y-fa shen, ta mish dt’oï’s, as noi dty awinyn, as ver-yms er cheer Egypt dy ve ny hraartys, as treigit dy bollagh, veih awin Syene eer gys Ethiopia. 11Cha jean cass erbee dy ghooinney goll ny hrooid, ny cass dy vaagh, chamoo vees cummaltee aynjee son da-eed bleïn. 12As ver-yms er cheer Egypt dy ve ny hraartys mastey ny cheeraghyn treigit, as bee ny ard-valjyn ecksh naardey mastey ny ard-valjyn t’er n’gholl naardey, treigit da-eed bleïn: as skeayl-ym ny Egyptianee mastey ny ashoonyn, as sheeb-ym ad trooid ny cheeraghyn.

13Foast myr shoh ta’n Chiarn Jee dy ghra; Ec kione da-eed bleïn chaglym’s ny Egyptianee reesht veih’n pobble, raad v’ad er nyn skeayley. 14As neem’s caghlaa cappeeys Egypt, as ver-ym orroo dy hyndaa gys thalloo Phathros, cheer nyn ynnyd-vaghee hene, as bee ad ayns shen reeriaght moodjeenagh. 15Ish smoo treih vees jeh ny reeriaghtyn, chamoo nee ish soiaghey seose ee hene arragh harrish ny ashoonyn, son neem’s ad y leodaghey, nagh jean ad ny-sodjey reill harrish ny ashoonyn. 16As cha bee ish ny-sodjey barrantys thie Israel, shen ta cur lesh yn vee-chairys ocsyn gys cooinaghtyn, tra yeeaghys ad nyn lurg: agh bee fys oc dy nee mish y Chiarn Jee.

17As haink eh gy-kione ayns y chiaghtoo vleïn as feed, ayns y chied vee, er y chied laa jeh’n vee, haink goo yn Chiarn hym’s, gra, 18Vac y dooinney, hug Nebuchadrezzar ree Vabylon er e heshaght-chaggee dy yannoo shirveish deinagh noi Tyrus: va dy chooilley chione jeu jeant meayl, as va dy chooilley gheaylin fannit: foast cha dooar eh veg yn aill son Tyrus, chamoo e heshaght-chaggee veg y lhiasaghey, son y chirveish v’eh er chooilleeney noi eck. 19Shen-y-fa ta’n Chiarn Jee dy ghra, Cur-my-ner, ver-yms cheer Egypt gys Nebuchadrezzar ree Vabylon, as gowee eshyn yn pobble eck, as e spooilley, as e cooid, as bee shen son faill da’n cheshaght-chaggee echey. 20Ta mee er choyrt cheer Egypt da son e laboraght, as y chirveish ren eh noi eck, er-yn-oyr dy row ad gobbragh er my hon’s, ta’n Chiarn Jee dy ghra.

21Er y laa shen ver-yms er eairk thie Israel dy chur magh, as ver-yms dhyt reamys glare nyn mastey, as bee fys ayd, dy nee mish y Chiarn.