CAB. III

1Ny-sodjey, dooyrt eh rhym, Vac y dooinney, ee shen ny t’ou dy gheddyn: ee yn lioar shoh, as immee royd dy loayrt rish thie Israel. 2Er shoh doshil mee my veeal, as hug eh orrym dy ee yn lioar shen. 3As dooyrt eh rhym, Vac y dooinney, cur er dty chleeau goaill stiagh, as lhieen dty volg lesh y lioar shoh ta mee dy choyrt dhyt: eisht d’ee mee eh, as ve ayns my veeal myr mill son miljid. 4As dooyrt eh rhym, Vac y dooinney, immee, royd oo, gys thie Israel, as loayr roo lesh my ghoan’s. 5Son cha vel oo er dty choyrt gys pobble jeh chengey yoarree, ny jeh glare doillee, agh gys thie Israel: 6Cha nee gys ymmodee pobble jeh chengey yoarree, ny jeh glare doillee, nagh vod oo ny goan oc y hoiggal. Son shickyrys, dy beign er dty choyrt gys nyn lheid shoh, veagh ad er n’eaishtagh rhyt. 7Agh cha jean thie Israel geaishtagh rhyt’s, son cha n’eaishtagh ad rhym’s: son ta ooilley thie Israel roonagh as creoi-chreeagh. 8Cur-my-ner ta mee er staayney yn eddin ayd’s, noi yn eddin ocsyn, as glaare yn eddin ayd’s, noi glaare yn eddin ocsyn. 9Myr yn adamant, ny s’creoi na’n chlagh chloaie ta mee er n’yannoo glaare dty eddin: ny gow aggle roue, chamoo lhig sheese dty chree ec y chilley oc, ga dy vel ad thie mee-viallagh. 10Dooyrt eh rhym ny-sodjey, Vac y dooinney, ooilley my ghoan loayr-yms rhyt, gow stiagh ayns dty chree, as clasht rish lesh dty chleayshyn. 11As immee, gow royd hucsyn jeh’n chappeeys, gys cloan dty phobble, as abbyr roo, as insh daue, Myr shoh ta’n Chiarn Jee dy ghra, lhig daue geaishtagh, ny gyn geaishtagh. 12Eisht hrog yn spyrryd seose mee, as cheayll mee my chooylloo sheean tharmane mooar, gra, Bannit dy row gloyr y Chiarn veih e ynnyd hene. 13Cheayll mee myrgeddin feiyr skianyn ny cretooryn bio, va bentyn yn derrey yeh rish yn jeh elley, as feiyr ny queeylyn lioroo, as sheean y tharmane mooar. 14Myr shen hrog y spyrryd mee seose, as ghow eh mee ersooyl, as hie mee ayns sou-aigney, as bree my spyrryd, agh va laue yn Chiarn niartal orrym.

15Eisht haink mee gys cloan y chappeeys ec Tel-abib, va cummal liorish awin Chebar, as hoie mee raad v’adsyn ny hoie, as ren mee tannaghtyn ayns shen my host ny mast’ oc shiaght laa. 16As haink eh gy-kione lurg shiaght laa, dy daink goo yn Chiarn hym, gra, 17Vac y dooinney, ta mee er dty yannoo arreyder ayns thie Israel, shen-y-fa eaisht rish goan my veeal, as cur raaue daue voym’s. 18Tra ta mee gra rish y vee-chrauee, Ta baase son shickyrys dty chour; as mannagh der oo raaue da, chamoo loayrt, dy hyndaa yn vee-chrauee veih e ghrogh raad, dy hauail e vioys: yiow yn dooinney mee-chrauee cheddin baase ayns e vee-chraueeaght, agh yn uill echey neem’s geearree ec dty laue’s. 19Ny-yeih, my t’ou uss cur raaue da’n vee-chrauee, as mannagh vel eh chyndaa veih yn vee-chraueeaght echey, ny veih e ghrogh raad, yiow eh baase ayns e vee-chraueeaght; agh t’ou uss er livrey dty annym. 20Reesht, tra ta dooinney cairagh chyndaa veih e chairys, as cur-rish mee-chairys, as mish dy lhiggey da tuittym, yiow eh baase; er-yn-oyr nagh vel oo er chur raaue da, yiow eh baase ayns e pheccah, as e chairys t’eh er n’yannoo, cha bee eh er ny chooinaghtyn; agh yn uill echey neem’s y yeearree ec dty laue’s. 21Ny-yeih, my t’ou cur raaue da’n dooinney cairagh, nagh jean yn er-cairagh peccah, as nagh vel eh cur-rish peccah; bee eh son firrinys bio, er-yn-oyr dy vel raaue er ny choyrt da: myrgeddin t’ou uss er livrey dt’annym.

22As va laue yn Chiarn ayns shen orrym, as dooyrt eh rhym, Trog ort, royd oo gys y vagher foshlit, as neem’s ayns shen taggloo rhyt. 23Eisht dirree mee, as hie mee magh ’sy vagher, as cur-my-ner hass gloyr y Chiarn ayns shen, myr y ghloyr shen honnick mee liorish awin Chebar, as huitt mee er my eddin. 24Eisht hie yn spyrryd stiagh aynym, as hrog eh mee er my chassyn, as loayr eh rhym, as dooyrt eh, Immee royd, as jeigh oo hene stiagh ayns dty hie. 25Agh er dty hon’s, O vac y dooinney, ver ad geulaghyn ort, as bee oo geulit lioroo, agh cha lhig ad dhyt goll magh ny mast’ oc. 26As ver-yms er dty hengey lhiantyn gys clea dty veeal, myr shen dy bee oo balloo, as cha bee oo fer-raauee daue; son t’ad thie mee-viallagh. 27Agh tra loayr-yms rhyt, neem’s dty veeal y osley, as jir oo roo, Myr shoh ta’n Chiarn Jee dy ghra, Eshyn ta clashtyn, lhig da clashtyn; as eshyn ta shaghney, lhig da shaghney: son t’ad thie mee-viallagh.