CAB. XXX

1Haink goo yn Chiarn hym’s reesht, gra, 2Vac y dooinney, jean phadeyrys, as abbyr, Shoh myr ta’n Chiarn dy ghra, Jean-jee gullal, Ah treih son y laa! 3Son ta’n laa er-gerrey, eer laa yn Chiarn t’er-gerrey, laa bodjallagh; shoh vees traa ny ashoonee. 4As hig yn cliwe er Egypt, as bee angaish trome ayns Ethiopia, tra huittys ny merriu ayns Egypt, as gowee ad ersooyl yn ayrn smoo jeh ny cummaltee, as bee yn undin eck er ny vrishey seose. 5Ethiopia, as Lybia, as Lydia, as y slane shiartanse jeu, as Chub, marish deiney ny cheerey t’ayns conaant roo, tuittee adsyn ooilley dy cheilley liorish y chliwe. 6Myr shoh ta’n Chiarn dy ghra, Adsyn myrgeddin ta fir-choonee Egypt nee ad tuittym, as bee mooaralys y phooar ecksh er ny lhieggal: veih toor Syene tuittee ad ayns shen, liorish y chliwe, ta’n Chiarn Jee dy ghra. 7As bee adsyn ny hraartys mastey ny cheeraghyn treigit, as bee ny ard-valjyn ecksh mastey ny ard-valjyn ta er n’gholl naardey. 8As bee fys oc dy nee mish y Chiarn, tra ta mee er choyrt aile ayns Egypt, as tra vees ooilley ny fir-choonee eck er nyn stroie. 9Er y laa shen hed chaghteryn magh voym’s ayns lhongyn, dy chur ny Ethiopianee almoragh ayns aggle, as bee ad dy mooar seaghnit son laa trome Egypt: son cur-my-ner, te cheet orroo. 10Myr shoh ta’n Chiarn Jee dy ghra, Ver-yms myrgeddin er y lught mooar dy leih Egypt dy scuirr, liorish laue Nebuchadrezzar ree Vabylon. 11Hig eshyn as e phobble mârish, mooinjer atchimagh ny ashoonyn, dy stroie yn cheer: as nee ad tayrn nyn gliwenyn noi Egypt, as lhieenee ad yn cheer lesh ny merriu. 12As chyrmee-ym seose ny awinyn, as creck-ym y cheer gys laueyn ny mee-chrauee, as ver-ym naardey yn cheer, as ooilley ny t’aynjee, liorish laueyn joarree: mish y Chiarn ta er loayrt eh. 13Myr shoh ta’n Chiarn Jee dy ghra, Neem’s myrgeddin stroie ny jallooyn, as ver-ym er ny caslyssyn oc dy scuirr ayns Noph; as cha bee prince jeh cheer Egypt ayn: as nee’m aggle y choyrt ayns cheer Egypt. 14As nee’m Pathros ny hraartys, as ver-ym aile er Zoan, as nee’m briwnyssyn y chooilleeney er No. 15As deayrt-ym magh my eulys er Sin, eer niart Egypt, as giare-ym jeh earrooyn mooarey No. 16As neem’s aile y ghreesaghey seose ayns Egypt: bee guinn ghyere er Sin, as bee No er ny raipey veih-my-cheilley, as hig er Noph angaishyn gagh-laa. 17Nee deiney aegey Aven as Phi-beseth tuittym liorish y chliwe: as hed nyn ard-valjyn ayns cappeeys. 18Ec Tehaphnehes neesht bee yn laa fo dorraghys, tra neem’s brishey ayns shen quingyn Egypt: as nee mooaralys yn niart ecksh failleil aynjee: agh son ee hene, nee bodjal ish y choodaghey, as hed ny inneenyn ecksh ayns cappeeys. 19Shoh myr neem’s briwnys y chooilleeney ayns Egypt: as bee fys oc, dy nee mish y Chiarn.

20As haink eh gys kione ayns yn un vleïn jeig, ayns y chied vee, er y chiaghtoo laa jeh’n vee, dy daink goo yn Chiarn hym’s, gra, 21Vac y dooinney, ta mish er vrishey roih Pharaoh, ree Egypt; as cur-my-ner cha bee eh soïlit seose cour lheihys, ny rolley currit mysh dy niartaghey eh, as dy yannoo trean jeh son cummal y chliwe. 22Shen-y-fa, myr shoh ta’n Chiarn Jee dy ghra, Cur-my-ner, ta mish noi Pharaoh ree Egypt, as brish-ym ny roihaghyn echey, chammah yn unnane slane, as shen ny va brisht, as ver-ym er y chliwe dy huittym ass e laue. 23As skeayl-yms ny Egyptianee mastey ny ashoonyn, as eiyr-ym ad noon as noal trooid ny cheeraghyn. 24As neem’s niartaghey roihaghyn ree Vabylon, as ver-ym my chliwe ayns y laue echeysyn: agh brish-ym roihaghyn Pharaoh, as nee eh soghal kiongoyrt rish, myr soghyn dooinney ta guint gy-baase. 25Agh niartee-yms roihaghyn ree Vabylon, as bee roihaghyn Pharaoh er ny lhaggaghey; as bee fys oc, dy nee mish y Chiarn, tra ver-yms my chliwe ayns laue ree Vabylon, as nee eshyn sheeyney magh eh er cheer Egypt. 26As skeayl-ym ny Egyptianee mastey ny ashoonyn, as geiyrt ad noon as noal trooid ny cheeraghyn, as bee fys oc, dy nee mish y Chiarn.