CAB. XXXI

1As haink eh gy-kione ayns yn un vleïn jeig, ayns y jeihoo vee, er y chied laa jeh’n vee, dy daink goo yn Chiarn hym’s, gra, 2Vac y dooinney, loayr rish Pharaoh ree Egypt, as rish earrooyn mooar e phobble, Quoi ta goll rhyt’s, uss t’ayns dty yrjid?

3Cur-my-ner va eshyn ny cedar thollee ayns Lebanon, lesh banglaneyn aalin, as lesh coodaghey scadooagh, as jeh aase ard, as va’n baare echey mastey ny ard-vanglaneyn. 4Ren ny ushtaghyn mooar jeh, as ren y diunid soiaghey seose eh er yn yrjid, lesh ny awinyn eck roie mysh ny plantyn echey, as lhig ee magh e strooanyn gys ooilley biljyn y vagheragh. 5Shen-y-fa va’n yrjid echey erskyn ooilley biljyn y vagheragh, as va e vanganyn er nyn mishaghey, as haink e vanglaneyn dy ve liauyr liorish yn ymmodee ushtey, tra v’eh gaase magh. 6Ayns ny banganyn echeysyn ren ooilley eeanlee yn aer jannoo nyn idd, as fo e vanglaneyn ren ooilley maase y vagheragh brey nyn ingan, as fo yn scadoo echey ren ashoonyn mooarey ooilley goaill fastee. 7Myr shoh v’eh aalin ayns e niart, as ayns lhiurid e vanglaneyn: son va’n fraue echey liorish ushtaghyn mooarey. 8Cha row ny cedaryn ayns garey Yee ny syrjey na eshyn: cha row ny biljyn-juys dy ve soylit rish eer e vanganyn, as cha row yn billey-chesnut casley rish e vanglaneyn, cha row billey erbee ayns garey Yee casley rishyn son aalid. 9Ta mish er n’yannoo eh stoamey liorish earroo e vanglaneyn: myr shen dy row ooilley biljyn Eden, ayns garey Yee, as ad troo mysh.

10Shen-y-fa myr shoh ta’n Chiarn Jee dy ghra, Er-yn-oyr dy vel oo er hroggal seose oo hene ayns yrjid, as t’eh er heeyney seose e vaare fud ny banglaneyn thollee, as dy vel e chree gatt ayns moyrn lesh yn yrjid. 11Shen-y-fa ta mish er livrey eshyn gys laue treanagh ny ashoonee: shoh yn fer ghellys rish, ta mee er n’eebyrt magh eh son e vee-chraueeaght. 12As ta joarreeyn, mooinjer atchimagh ny ashoonyn, er yiarey sheese eh, as er vaagail eh: er ny sleityn as ayns ny glionteenyn ta e vanglaneyn er duittym, as ta ny banganyn echey er nyn mrishey liorish ooilley awinyn y cheer, as ta ooilley pobble y theihll chea ersooyl veih fo yn scadoo echey, as er hreigeil eh. 13Er y brishey echey nee ooilley eeanlee yn aer tannaghtyn, as bee e vanglaneyn son spooilley da maase y vagheragh. 14Son raaue, nagh jean veg jeh ooilley ny biljyn, ta rish ny ushtaghyn, mooar-soiaghey jeu hene son nyn yrjid, chamoo sheeyney seose nyn mullagh mastey ny banglaneyn choo, chamoo ny biljyn oc dy hassoo seose ayns nyn yrjid, ooilley ta giu ushtey: son t’ad ooilley er nyn livrey gys baase, fo diunid y thallooin, mastey cloan gheiney, mâroosyn ta goll sheese gys yn oaie. 15Myr shoh ta’n Chiarn Jee dy ghra, Er yn laa hie eh sheese gys yn oaie, doardee mee dobberan, choodee mee yn diunid er e hon, ren mee ny thooillaghyn echey y lhiettal, as va ny ushtaghyn mooarey er nyn gastey; as hug mee er Lebanon dy ghobberan er e hon, as ren ooilley biljyn y vagheragh fioghey er e hon. 16Hug mee er ny ashoonyn craa lesh feiyr e lhieggey, tra hilg mee sheese eh gys niurin, mâroosyn ta goll sheese gys yn oaie: as bee ooilley biljyn Eden, yn reih, as yn chooid share jeh Lebanon, ooilley ny ta giu ushtey, er nyn gherjaghey ayns ardjyn s’diuney y thallooin. 17Hie adsyn myrgeddin sheese gys niurin mârish, hucsyn t’er nyn stroie lesh y chliwe, as adsyn va’n roih echey, baghey fo’n scadoo echey ayns mean ny ashoonyn.

18Myr shoh quoi ta casley rhyt’s, ayns gloyr, as mooadys, mastey biljyn Eden? ny-yeih bee uss er dty injillaghey marish biljyn Eden, gys ardjyn s’diuney ny hooirey: nee oo lhie sheese fud ny chymmyltee, mâroosyn t’er ny varroo lesh y chliwe: shoh cowrey Pharaoh, as slane lught e phobble, ta’n Chiarn Jee dy ghra.