CAB. XXXII

1As haink eh gys kione ayns y nah vleïn jeig, ayns y nah vee yeig, er y chied laa jeh’n vee, dy daink goo yn Chiarn hym’s, gra, 2Vac y dooinney, gow seose bardoon son Pharaoh ree Egypt, as abbyr rishyn, T’ou uss goll-rish lion aeg fud ny ashoonyn, as t’ou myr whale ayns ny faarkaghyn: as haink oo magh trooid dty awinyn, as ren oo seiy ny ushtaghyn lesh dty chassyn, as broghey dty awinyn. 3Myr shoh ta’n Chiarn Jee dy ghra, Neem’s er-y-fa shen skeayley my lieen harryd, lesh sheshaght ymmodee sleih; as ver ad lhieu seose oo ayns my lieen’s. 4Eisht faag-ym oo er y thalloo, as tilg-ym oo magh er y vagher foshlit, as ver-ym er ooilley eeanlee yn aer dy hannaghtyn ort, as jeed’s ver-ym nyn yeeilley da ooilley maase y thallooin. 5As lhie-ym dty eill er ny sleityn, as lhieen-ym ny coanyn lesh dty hummyd. 6Nee’m gushtaghey neesht lesh dty uill, yn thalloo raad t’ou snaue, eer gys ny sleityn; as bee ny awinyn lane jeed. 7As tra nee’m oo y vooghey, coodee-ym yn aer, as dollee-ym ny rollageyn: as tilg-ym bodjal er y ghrian, as cha der yn eayst magh e ray-sollys. 8Ooilley soilshaghyn sollys yn aer nee’m dorraghey harryd’s, as skeayl-ym dorraghys er dty halloo, ta’n Chiarn Jee dy ghra. 9Ver-ym sneih myrgeddin er cree mooarane sleih, tra ver-ym lhiam dty hoyrt-mow fud ny ashoonyn, gys cheeraghyn nagh nhione dhyt. 10S’feer eh dy der-ym er ymmodee sleih goaill mooarane yindys jeed, as bee ny reeaghyn oc ayns aggle atchimagh er dty hon, tra nee’m my chliwe y chraa kiongoyrt roo, as bee ad er-creau ec dagh shallid: dy chooilley ghooinney son e vioys hene, ayns laa dty lhieggey.

11Son myr shoh ta’n Chiarn Jee dy ghra, Hig ort’s cliwe ree Vabylon. 12Liorish cliwenyn ny treanee ver-yms er ny earrooyn mooarey ayd’s dy huittym, slane mooinjer atchimagh ny ashoonee: as spooillee ad mooaralys Egypt, as bee yn slane ymmodee jeu dy bollagh er nyn stroie. 13Stroie-ym neesht ooilley yn maase eck veih rish oirr ny ushtaghyn mooarey, chamoo vees ad arragh seiyt liorish cass dooinney, ny er ny vroghey liorish yngyn baagh. 14Eisht nee’m ny ushtaghyn oc y yannoo dowin, as ver-ym er ny awinyn dy roie myr ooil, ta’n Chiarn Jee dy ghra. 15Tra nee’m thalloo Egypt ny hraartys, as bee’n cheer follym jeh’n lught berchys va aynjee, tra ta mee er woalley ooilley ny fir-vaghee t’ayn, eisht bee fys ocsyn, dy nee mish y Chiarn. 16Shoh yn accan, lesh nee adsyn gaccan er e son: nee inneenyn ny ashoonee ish y cheayney, as dobberan er e son, eer son Egypt, as son ooilley yn ymmodee pobble ecksh, ta’n Chiarn Jee dy ghra.

17Haink eh gy-kione neesht ayns y nah vleïn jeig, er y wheiggoo laa yeig jeh’n vee, dy daink goo yn Chiarn hym’s, gra, 18Vac y dooinney, gow arrane trimshagh, son slane ymmodee pobble Egypt, as jing sheese ad, eer ee hene, as inneenyn ny ashoonyn pooaral, gys diunid ny ardjyn fo halloo, mâroosyn ta er n’gholl sheese gys yn oaie. 19Quoi nagh vel uss er-y-skyn ayns aalid? sheese lhiat, as lhie marish ny chymmyltee. 20Nee ad tuittym ny mast’ ocsyn ta stroit liorish y chliwe: t’eeish livreït gys y chliwe; tayrn ee hene, as ooilley yn ymmodee pobble eck. 21Nee ny treanee mastey yn vooinjer niartal loayrt rishyn ass mean niurin, mâroosyn ta cooney lesh: t’ad er n’gholl sheese, t’ad lhie nyn jymmyltee, stroit lesh y chliwe. 22Shen y raad ta Ashur as ooilley e sheshaght; ta e oaiaghyn mygeayrt-y-mysh: t’ad ooilley marroo, er duittym liorish y chliwe. 23Ta ny oaiaghyn oc soit ayns oirryn ny ooigey, as ta e sheshaght cruin mygeayrt yn oaie eck: ooilley stroit, er duittym liorish y chliwe, shoh hug atchim ayns cheer ny bioee. 24Shen y raad ta Elam, as ooilley yn ymmodee pobble ecksh, cruin mygeayrt yn oaie, ooilley stroit, er duittym liorish y chliwe, t’adsyn er n’gholl sheese nyn jymmyltee gys ny ardjyn dowin fo halloo, adsyn ren atchim y skeayley fud cheer ny bioee, foast t’ad er n’ghoaill nyn gronney dy naareydagh mâroosyn ta goll sheese gys yn oaie. 25T’ad er n’yannoo lhiabbee er e son mastey ny merriu, marish ooilley yn slane shiartanse eck: ta ny oaiaghyn eck cruin mygeayrt-y-mysh, ooilley nyn jymmyltee stroit lesh e chliwe: ga dy skeayl ad nyn atchim fud cheer ny bioee, foast t’ad er n’ymmyrkey nyn nearey, mâroosyn ta goll sheese gys yn oaie: ta e chronney dy ve mâroosyn ta faagit magh dy ve stroit. 26Shen y raad ta Meshech, Tubal, as ooilley yn ymmodee pobble eck: ta ny oaiaghyn oc cruin mygeayrt-y-mysh: ooilley nyn jymmyltee stroit lesh y chliwe, ga dy ren ad skeayley nyn atchim fud cheer ny bioee. 27As cha bee ad oanluckit marish ny treanee, ta er duittym jeh ny chymmyltee, ta er n’gholl sheese gys niurin lesh nyn greinyn-caggee, as nyn gliwenyn fo nyn ghing; agh bee ny peccaghyn oc trome er nyn graueyn, ga dy row ad hene atchim ny treanee ayns cheer ny bioee. 28S’feer eh, bee uss er dty chraghey ayns mean ny chymmyltee, as bee oo oanluckit mâroosyn ta stroit liorish y chliwe. 29Shen y raad ta Edom, e reeaghyn, as ooilley ny princeyn eck, ad-hene, as nyn niart ny lhie lioroosyn va stroit lesh y chliwe: oanluckit marish ny chymmyltee, as mâroosyn ta goll sheese gys yn oaie. 30Shen y raad ta ooilley princeyn y twoaie as ooilley ny Zidonianee, ta er n’gholl sheese marish ny merriu, lesh ooilley nyn atchim, ta nearey orroo jeh nyn niart, t’ad ny lhie nyn jymmyltee, mâroosyn ta stroit liorish y chliwe, as gymmyrkey nyn nearey mâroosyn ta goll sheese gys yn oaie. 31Bee Pharaoh ry-akin ny mast’ oc, as bee eshyn er ny gherjaghey harrish ooilley ymmodee e phobble, eer Pharaoh, as ooilley e heshaght-chaggee, stroit lesh y chliwe, ta’n Chiarn Jee dy ghra. 32Son ta mee er n’ockley magh my atchim harrish thalloo ny bioee: as bee e chronney, dy lhie oanluckit marish ny chymmyltee, mâroosyn ta stroit liorish y chliwe, eer Pharaoh as ooilley yn ymmodee pobble echeysyn, ta’n Chiarn Jee dy ghra.