CAB. XXXIII

1Reesht haink goo yn Chiarn hym’s, gra, 2Vac y dooinney, loayr rish cloan dty phobble, as abbyr roo, Tra ta mish cur lhiam y cliwe er cheer, my nee pobble ny cheerey reih dooinney jeh ny ardjyn ocsyn, as eshyn y hoiaghey son arreyder: 3As tra hee-ys eh yn cliwe cheet er y cheer, my heidys eh yn trumpet, as dy der eh raaue da’n pobble; 4Eisht quoi-erbee ta clashtyn feiyr y trumpet, as nagh vel goaill raaue, as my hig y cliwe, as goaill eshyn ersooyl, bee’n uill echey er e chione hene. 5Cheayll eh feiyr y trumpet, as cha ghow eh raaue, bee yn uill echey er hene: agh eshyn ta goaill raaue, saue-ee eshyn yn vioys echey hene. 6Agh my hee-ys yn arreyder yn cliwe cheet, as gyn sheidey yn trumpet, as gyn raaue ’ve ec y pobble: my hig y cliwe, as goaill persoon erbee veih ny mast’ oc, ta eshyn goit ersooyl ayns e pheccah, agh yn uill echey nee’m y yeearree ec laue yn arreyder.

7Myr shen uss, O vac y dooinney, ta mish er dty hoiaghey son arreyder da thie Israel: shen-y-fa clynnee oo yn goo veih my veeal’s, as cur raaue dauesyn voym’s. 8Tra ta mee gra rish ny mee-chrauee, O ghooinney mee-chrauee, yiow uss dy shickyr baase; mannagh vel uss loayrt, dy chur raaue da’n dooinney mee-chrauee dy lhiasaghey e raad, yiow yn dooinney mee-chrauee shen baase ayns e vee-chairys; agh yn uill echey neem’s shirrey ec dty laue’s. 9Ny-yeih, my ver uss raaue da’n vee-chrauee, dy hyndaa eh veih e ghrogh raad: mannagh jyndaa eh veih e raad, yiow eh baase ayns e vee-chairys, agh t’ou uss er livrey dty annym hene.

10Shen-y-fa, O uss vac y dooinney, loayr rish thie Israel: Shoh myr ta shiuish loayrt, gra, My ta shin fo loght as kerraghey nyn beccaghyn, as shymley ersooyl ayndoo, kys oddys mayd eisht cummal rish dy ve bio? 11Abbyr roo, Myr ta mee bio, ta’n Chiarn Jee dy ghra, cha vel veg y taitnys aym’s ayns baase ny mee-chrauee, agh dy jinnagh ny mee-chrauee chyndaa veih nyn raad, as ve bio: chyndaa-jee, chyndaa-jee veih nyn ghrogh raaidyn; son cre’n-fa ta shiu tayrn baase erriu hene, O hie Israel? 12Shen-y-fa, uss vac y dooinney, abbyr rish cloan dty phobble, Cha jean cairys yn dooinney cairal eshyn y livrey ayns laa e loghtyn: as er son mee-chraueeaght y vee-chrauee, cha jean eshyn tuittym liorish shen, ayns y laa t’eh chyndaa veih e vee-chraueeaght; chamoo hig lesh y dooinney cairal dy ve bio son e chairys er y laa t’eh cur-rish peccah. 13Tra jir-yms rish y dooinney cairal, dy bee eh dy shickyr bio: my t’eh cur e varrant er e chairys hene, as cur-rish drogh-yannoo; cha bee ooilley e chairys er ny chooinaghtyn dasyn, agh son e ghrogh-yannoo t’eh er chur-rish, yiow eh baase. 14Reesht, tra ta mee gra rish y vee-chrauee, Yiow dy shickyr baase: my nee eshyn chyndaa veih e pheccah, as jannoo shen ta lowal as jeeragh; 15My nee yn vee-chrauee livrey seose yn gioal; jannoo lhiasaghey son shen ghow eh liorish roosteyrys, shooyl ayns slattyssyn y vea fegooish cur-rish drogh-yannoo; bee eshyn dy shickyr bio, cha vow eh baase. 16Cha bee veg jeh e pheccaghyn, t’eh er n’yannoo, er ny enmys da: t’eh er n’yannoo shen ta lowal as jeeragh: yiow eh dy shickyr e vioys.

17Foast ta cloan dty phobble gra, Cha vel raad y Chiarn corrym-kiart: agh er nyn son ocsyn, cha vel y raad oc corrym-kiart. 18Tra ta’n dooinney cairal chyndaa veih’n chairys echey, as cur-rish drogh-yannoo, liorish shen yiow eh dy shickyr baase. 19Agh my ta’n dooinney mee-chrauee chyndaa veih e vee-chraueeaght, as jannoo shen ny ta lowal as jeeragh, bee eshyn bio liorish shen. 20Foast ta shiuish gra, Cha vel raad y Chiarn corrym-kiart: O shiuish hie Israel, neem’s briwnys shiu dagh unnane lurg e raaidyn.

21As haink eh gy-kione ayns y nah vleïn jeig jeh’n chappeeys ain, ayns y jeihoo vee, er y wheiggoo laa jeh’n vee, dy daink fer, v’er scapail ass Jerusalem, hym’s, gra, Ta’n ard-valley goit. 22Nish va laue yn Chiarn harrym ayns yn astyr, roish my daink yn scapailtagh hym’s, as er vosley my veeal, derrey haink eh hym ’sy voghrey, as va my veeal er ny osley, as cha row mee ny-sodjey balloo. 23Eisht haink goo yn Chiarn hym’s, gra, 24Vac y dooinney, t’adsyn ta baghey ayns fadaneyssyn cheer Israel dy ghra, Cha row Abraham agh un er, as va’n slane cheer echey myr eiraght: agh ta shinyn ymmodee, as ta’n cheer er ny choyrt dooinyn son eiraght. 25Er-yn-oyr shoh, abbyr roosyn, Myr shoh ta’n Chiarn Jee dy ghra, Ta shiu gee lesh yn uill, as troggal seose nyn sooillyn gys ny jalloonyn eu, as deayrtey fuill; as vow shiu yn cheer myr eiraght? 26Ta shiu cur nyn marrant er nyn gliwe, ta shiu jannoo reddyn eajee, as ta dagh fer j’iu jannoo peccah rish ben e naboo; as jean shiuish goaill eiraght ’sy cheer. 27Abbyr uss myr shoh roosyn, Shoh myr ta’n Chiarn Jee dy ghra, Myr ta mish bio, nee adsyn t’ayns ny fadaneyssyn son shickyrys tuittym liorish y chliwe, as eshyn ta ’sy vagher foshlit ver-yms da ny beishtyn, dy ve stroit: as adsyn t’ayns ny cashtallyn, as ny guaggyn yiow ad baase jeh’n phlaih. 28Son ver-yms er y cheer dy ve dy bollagh ny hraartys, as bee mooaralys yn niart ecksh harrish: as bee sleityn Israel follym-faase, nagh jed unnane nyn drooid. 29Eisht bee fys oc, dy nee mish y Chiarn, tra ta mee er n’yannoo yn cheer ny ghlen-hraartys, kyndagh rish ooilley nyn obbraghyn dwoaiagh t’ad er n’yannoo.

30Myrgeddin uss vac y dooinney, ta cloan dty phobble kinjagh loayrt my-dty-chione, rish ny voallaghyn, as ayns porchyn nyn dhieyn, as loayrt ry-cheilley, dagh fer rish e vraar, gra, Tar-jee, guee-ym erriu, as clasht-jee cre ta’n goo ta cheet magh veih’n Chiarn. 31As t’ad cheet hood’s myr ta sleih cliaghtey cheet, as t’ad kiongoyrt rhyt myr my phobble’s, as t’ad clashtyn dty ghoan, agh cha vel ad cooilleeney ad: son lesh nyn meeal t’ad jeeaghyn lane graih, agh ta’n cree oc goll er-eiyrt nyn sayntyn. 32As cur-my-ner t’ou dauesyn myr arrane feer eunyssagh, fer lesh coraa millish-meen echey, as schleioil dy chloie er greïe-chiaull: son t’ad clashtyn dty ghoan, agh cha vel ad jannoo ad. 33As tra hig shoh gy-kione (cur-my-ner hig eh orroo) eisht bee fys oc dy row phadeyr nyn mastey.