CAB. XXXIV

1As haink goo yn Chiarn hym’s, gra, 2Jean phadeyrys noi bochillyn Israel, jean phadeyrys, as abbyr roo, Myr shoh ta’n Chiarn Jee dy ghra rish ny bochillyn; Dy doogh da bochillyn Israel, ta beaghey ad-hene! nagh lhisagh ny bochillyn fassagh ny shioltaneyn? 3Ta shiu gee yn riurid as coamrey shiu hene lesh yn ollan, ta shiu marroo ny beïyn beiyht: agh cha vel shiu fassagh yn chioltane. 4Shen va annoon cha vel shiu er niartaghey, chamoo ta shiu er lheihys shen ny va doghanit, chamoo ta shiu er hoïlley seose shen ny va brisht, chamoo ta shiu er chur lhieu reesht shen ny va er-shaghryn, chamoo ta shiu er hirrey son shen ny va caillit; agh lesh tranlaase as dewilys ta shiu er reill ad. 5As v’ad er nyn skeayley son nagh row bochilley oc: as haink ad dy ve bee son ooilley beishtyn y vagheragh, tra v’ad er nyn skeayley. 6Ren ny kirree aym’s rouail trooid ooilley ny sleityn, as er dagh cronk ard: dy jarroo va my hioltane er ny skeayley feaï-ny-cruinney, as cha ren fer erbee ronsagh ny briaght nyn yeï. 7Shen-y-fa shiuish vochillyn, eaisht-jee rish goo yn Chiarn, 8Myr ta mee bio, ta’n Chiarn Jee dy ghra, son shickyrys, er-yn-oyr dy daink my hioltane dy ve spooilley, as son bee da dy chooilley veisht jeh’n vagher, er son nagh row bochilley orroo, chamoo ren ny bochillyn shirrey son my hioltane, agh ren ny bochillyn beaghey ad-hene, as cha ren ad fassagh yn chioltane. 9Shen-y-fa, O shiuish vochillyn, clasht-jee rish goo yn Chiarn; 10Myr shoh ta’n Chiarn Jee dy ghra, Cur-my-ner ta mish noi ny bochillyn, as nee’m jeeaghyn lurg my hioltane, veih yn laue ocsyn, as cha bee currym y chioltane ny-sodjey faagit daue, chamoo nee ny bochillyn beaghey ad-hene ny-sodjey; son neem’s livrey my hioltane veih’n veeal oc, nagh bee ad son beaghey daue.

11Son myr shoh ta’n Chiarn Jee dy ghra, Cur-my-ner, neem’s, dy jarroo neem’s mee hene briaght son my chirree, as ad y hirrey magh. 12Myr ta bochilley shirrey magh e hioltane, er y laa t’eh mastey e chirree t’er nyn skeayley; myr shen neem’s shirrey magh my chirree, as livrey-ym ad veih dy chooilley voayl, raad t’ad er ve er nyn skeayley ’sy laa bodjallagh as dorraghey. 13As ver-ym lhiam magh ad veih yn pobble, as chaglym ad veih ny cheeraghyn, as ver-ym lhiam ad gys nyn dhalloo hene, as fassee-ym ad er sleityn Israel, rish ny awinyn, ayns dy chooilley ard jeh’n cheer ta cummaltee ayn. 14As fassee-ym ad ayns aber vie, as er sleityn ard Israel vees ny bochillyn oc: shen y raad nee ad lhie ayns bwoaillee vie, as ayns aber venoyr nee ad gyndyr er sleityn Israel. 15Neem’s fassagh my hioltane, as ver-ym orroo lhie sheese ta’n Chiarn Jee dy ghra. 16Nee’m shirrey son shen va caillit, as ver-ym lhiam reesht shen v’er-shaghryn, as soïll-ym seose shen va brisht, as niartee-ym shen va doghanit: agh stroie-ym ny mooaralee, as y lajer, as lesh briwnys jeeagh-yms nyn yeï. 17As er nyn son euish, O my hioltane, myr shoh ta’n Chiarn Jee dty ghra, Cur-my-ner, ta mish briwnys eddyr maase as maase, eddyr reaghyn as buick ny goair. 18Vel shiu jeeaghyn er myr red fardalagh, dy ve er n’ee seose yn aber vie, agh dy nhegin diu stampey sheese lesh nyn gassyn yn chooid elley jeh nyn aberyn? as dy vel shiu er n’iu jeh ny ushtaghyn dowiney, agh dy nhegin diu broghey yn fooilliagh lesh nyn gassyn? 19Agh er son my hioltane’s, t’ad gee shen ny ta shiu er vhilley lesh nyn gassyn: as t’ad giu shen ta shiu er vroghey lesh nyn gassyn.

20Shen-y-fa, myr shoh ta’n Chiarn Jee dy ghra roosyn, Cur-my-ner, neem’s, dy jarroo neem’s mee hene briwnys eddyr y maase roauyr, as eddyr y maase shang. 21Er-yn-oyr dy vel shiu er phuttey lesh lhiattee as lesh geaylin, as er lhottey ooilley ny va doghanit lesh nyn eairkyn, derrey ta shiu dy lhean er skeayley ad: 22Shen-y-fa neem’s my hioltane y hauail, as cha bee ad ny-sodjey son spooilley, as nee’m briwnys eddyr maase as maase. 23As nee’m soiaghey un vochilley harrystoo, as nee eshyn adsyn y vassaghey, shen hene my harvaant David; nee eshyn ad y vassaghey, as bee eshyn yn bochilley ocsyn. 24As mish y Chiarn vees yn Jee ocsyn, as bee my harvaant David prince nyn mastey, mish y Chiarn t’er loayrt eh. 25As nee’m conaant dy hee y yannoo roosyn, as ver-ym er ny drogh veishtyn dy herraghtyn ass y cheer: as nee adsyn baghey dy sauchey ayns yn aasagh, as cadley ayns ny keylljyn. 26As ver-ym orroo hene as ny ynnydyn mygeayrt my chronk dy ve ny vannaght; as ver-ym er y frass dy heet sheese ayns e imbagh cooie: ayns shen vees frassyn dy vannaght. 27As nee billey yn vagher gymmyrkey e vess, as ver yn ooir magh e bishaghey, as bee adsyn dy souyr-sauchey ’sy cheer oc hene, as bee fys oc, dy nee mish y Chiarn, tra ta mee er vrishey kianglaghyn y whing v’orroo, as er livrey ad ass laueyn nyn dranlaasee dewil. 28As cha bee ad ny smoo son spooilley da ny ashoonee, chamoo nee beishtyn y thallooin ad y stroie, agh nee ad cummal ayns sauchys, as cha bee ad ayns aggle roish nhee erbee. 29As trog-ym seose dauesyn plant ooasle, as cha bee ad ny-sodjey naardey lesh accyrys ayns y cheer, chamoo nee ad arragh gymmyrkey oltooan ny ashoonee. 30Myr shoh, bee fys oc, dy vel mish y Chiarn, yn Jee ocsyn, mâroo, as dy vel adsyn, eer thie Israel, yn pobble aym’s, ta’n Chiarn Jee dy ghra. 31Nish ta shiuish, my hioltane, eer shioltane my aber, ny deiney, as ta mish yn Jee euish, ta’n Chiarn dy ghra.