CAB. XXXV

1Marish shoh haink goo yn Chiarn hym’s, gra, 2Vac y dooinney, jean dty eddin y hoiaghey noi slieau Seir, as jean phadeyrys n’oï. 3As abbyr rish, Myr shoh ta’n Chiarn Jee dy ghra, Cur-my-ner, O lieau Seir, ta mish dt’oï’s, as sheeyn-ym magh my laue ort, as nee’m uss y yannoo dy bollagh follym-faase. 4Ver-yms ny ard-valjyn ayd’s naardey, as bee oo dty hraartys, as bee fys ayd, dy nee mish y Chiarn. 5Er-yn-oyr dy vel ayd goanlys fraueit ayns dty chree, as dy vel oo er gheayrtey fuill cloan Israel, liorish dewilys y chliwe, ayns earish nyn seaghyn, tra v’ad ec jerrey nyn ghrogh-yannoo: 6Shen-y-fa, myr ta mee bio, ta’n Chiarn Jee dy ghra, neem’s uss y aagail magh son fuill, as nee fuill geiyrt dhyt: fakin nagh row dwoaie ayd er fuill, fuill hene eiyrys dhyt. 7Myr shoh ver-yms er slieau Seir dy ve dy bollagh follym-faase as giare-ym jeh veih shen, eshyn ta goll magh, as eshyn ta cheet stiagh. 8As nee’m ny sleityn echey y lhieeney lesh e gheiney marroo: ayns dty chroink, as ayns dty choanyn, as ayns ooilley dty awinyn, nee adsyn tuittym, ta er nyn stroie liorish y chliwe. 9As ver-yms ort, dy bee oo dty hraartys son dy bragh, as cha jig cummaltee gys dty ard-valjyn, as bee fys eu, dy nee mish y Chiarn. 10Er-yn-oyr dy vel oo er ghra, Bee yn daa ashoon shoh, as y daa heer shoh lhiam’s, as nee mayd cummal ayndoo, ec y traa va’n Chiarn ayns shen: 11Shen-y-fa, myr ta mee bio, ta’n Chiarn Jee dy ghra, Dell-yms rhyt’s rere towse dty ghoanlys hene, as cordail rish yn olkys, shen t’ou er chliaghtaghey ayns dty vyskid nyn ’oï: as neem’s mee hene y hoilshaghey ny mast’ oc, erreish dou ve er dty vriwnys. 12As bee fys ayd, dy nee mish y Chiarn, as dy vel mee er chlashtyn ooilley yn oltooan shen, t’ou er loayrt noi sleityn Israel, gra, T’ad jeant follym-faase, t’ad er nyn goyrt dooinyn dy chur ad naardey, 13Myr shoh lesh nyn meeal ta shiu er voggyssagh harrym, as er vishaghey ny goan eu m’oï: ta mee er chlashtyn ad. 14Myr shoh ta’n Chiarn Jee dy ghra, Tra ta’n slane seihll goaill boggey, neem’s uss y yannoo follym-faase. 15Myr ghow uss boggey er eiraght Israel, son dy row eh follym-faase, myr shen neem’s rhyt’s: bee oo dty hraartys, O lieau Seir, as ooilley Idumea, eer y slane jeh, as bee fys oc, dy nee mish y Chiarn.