CAB. XXXVI

1Myrgeddin, uss vac y dooinney, jean phadeyrys gys sleityn Israel, as abbyr, Shiuish sleityn Israel, clasht-jee rish goo yn Chiarn. 2Myr shoh ta’n Chiarn Jee dy ghra, Er-yn-oyr dy vel y noid er ghra nyn ’oï eu, Aha, ta eer ny shenn ard-ynnydyn lhieu hene. 3Shen-y-fa, jean phadeyrys, as abbyr, Myr shoh ta’n Chiarn Jee dy ghra, Er-yn-oyr dy vel ad er n’yannoo shiu follym-faase, as er lhuggey shiu seose er dagh cheu, shiu dy ve son eiraght da’n chooid elley jeh ny ashoonee, as dy vel shiu goit seose ayns beïll ny tutleryn, as son oltooan er y pobble: 4Shen-y-fa shiuish sleityn Israel, clasht-jee goo yn Chiarn Jee, Myr shoh ta’n Chiarn Jee dy ghra, rish ny sleityn, as rish ny croink, rish ny awinyn, as rish ny glionteenyn, rish ny fadaneyssyn follym-faase, as rish ny ard-valjyn treigit, haink dy ve son spooilley as craid da’n chooid elley jeh ny ashoonee ta mygeayrt. 5Shen-y-fa, myr shoh ta’n Chiarn Jee dy ghra, S’feer eh, ayns aile my eadolys ta mee er loayrt noi yn chooid elley jeh ny ashoonee, as noi ooilley Idumea, ta er ghoaill orroo dy hoiaghey magh yn thalloo aym’s son eiraght daue hene, lesh slane boggey nyn gree, lesh aignaghyn elgyssagh, dy yiarey magh eh son spooilley. 6Jean phadeyrys, er-y-fa shen, mychione thalloo Israel, as abbyr rish ny sleityn, as rish ny croink, rish ny awinyn, as rish ny glionteenyn, Myr shoh ta’n Chiarn Jee dy ghra, Cur-my-ner, ta mish er loayrt ayns my eadolys, as ayns my eulys, er-yn-oyr dy vel shiu er n’ymmyrkey faghid ny ashoonee. 7Shen-y-fa, shoh myr ta’n Chiarn Jee dy ghra, Ta mee er hroggal seose my laue, Son shickyrys nee ny ashoonyn ta mygeayrt-y-miu gymmyrkey yn nearey oc hene.

8Agh shiuish, O leityn Israel, ver shiuish magh nyn manglaneyn, as nee shiu gymmyrkey nyn mess da my phobble Israel, son t’ad er-gerrey dy heet. 9Son cur-my-ner, ta mish er nyn son, as nee’m chyndaa hiuish, bee shiu traaueit as cleieet. 10As nee’m bishaghey deiney diuish, da slane thie Israel, eer da’n clane echey; as ayns ny ard-valjyn bee cummaltee, as bee ny ynnydyn ta naardey er nyn droggal. 11As nee’m bishaghey diuish dooinney as baagh, as hig ad er nyn doshiaght, as bee ad messoil, as nee’m shiu y hoiaghey seose myr va shiu roïe: as nee’m ny share er nyn son na ec yn toshiaght eu, as bee fys eu dy nee mish y Chiarn. 12Dy jarroo, ver-yms er deiney shooyl erriu, eer my phobble hene Israel, as nee ad cummal aynyd, as bee oo yn eiraght ocsyn, as cha jean oo ny-sodjey maghey shoh adsyn y roostey jeh deiney. 13Myr shoh ta’n Chiarn Jee dy ghra, Son dy vel ad gra riu, T’ou uss, O halloo, gee seose dty gheiney, as er leodaghey dty ashoonyn; 14Shen-y-fa, cha der uss mow deiney ny-sodjey, chamoo leodys oo dty ashoonyn arragh, ta’n Chiarn Jee dy ghra, 15Chamoo ver-yms er sleih clashtyn aynyd nearey ny ashoonee ny-sodjey, chamoo nee oo arragh gymmyrkey oltooan y phobble, chamoo ver oo er dty heelogheyn hene dy huittym arragh, ta’n Chiarn Jee dy ghra.

16Marish shoh, haink goo yn Chiarn hym’s, gra, 17Vac y dooinney, tra va thie Israel cummal ’sy thalloo oc hene, hayrn ad loght er liorish nyn raaidyn, as liorish yn drogh-yannoo oc hene: va’n raad oc kiongoyrt rhym’s, myr neu-ghlennid ben veeoil. 18Shen-y-fa lhig mee raad da my eulys nyn ’oï, er son yn uill v’ad er gheayrtey er y thalloo, as son nyn yallooyn, lioroo v’ad er dayrn loght er y cheer. 19As ren mee ad y skeayley mastey ny ashoonee, as v’ad eiyrit noon as noal fud ny cheeraghyn: cordail rish nyn raaidyn, as cordail rish nyn yannoo ren mee ad y vriwnys. 20As tra haink ad mastey ny ashoonee, raad jimmee ad, doltooan ad my ennym’s casherick, tra dooyrt ad roosyn, Jeeagh-jee pobble y Chiarn, as ad eiyrit magh ass y thalloo echeysyn.

21Agh va mee eadolagh son my ennym’s casherick hene, va thie Israel er oltooan mastey ny ashoonee, raad jimmee ad. 22Shen-y-fa abbyr rish thie Israel, Myr shoh ta’n Chiarn Jee dy ghra, Cha vel mee jannoo shoh er y ghraih euish, O hie Israel, agh er graih my ennym’s casherick hene, t’er ny oltooan by-chyndagh riuish, mastey ny ashoonee, raad jimmee shiu. 23As neem’s my ennym ooasle y chasherickey, shen ny va er ny oltooan mastey ny ashoonee, shen ny va er ny oltooan by-chyndagh riuish ny-vud oc, as bee fys ec ny ashoonee, dy nee mish y Chiarn, ta’n Chiarn Jee dy ghra, tra veem’s er my chasherickey ayndiu, kiongoyrt rish ny sooillyn ocsyn. 24Son goyms shiu veih mastey ny ashoonee, as chaglym shiu ass ooilley ny cheeraghyn, as ver-ym lhiam shiu gys nyn dhalloo hene. 25Eisht spreih-yms shiu lesh ushtey glen, as bee shiu er nyn ghlenney veih ooilley nyn mroïd, as veih ooilley ny jallooyn eu neem’s shiuish y ghlenney. 26Cree noa myrgeddin ver-yms ayndiu, as spyrryd noa ver-ym er cheu-sthie j’iu, as nee’m goaill ersooyl yn cree cloaie glen ass nyn eill, as ver-ym diuish cree meen-foalley, 27As ver-yms yn spyrryd aym’s er cheu-sthie j’iu, as ver-ym erriu shooyl ayns my lattyssyn, as nee shiu freayll my vriwnyssyn, as jannoo ad. 28As nee shiu cummal ayns y cheer shen hug mee da nyn ayraghyn, as bee shiuish yn pobble aym’s, as beem’s yn Jee euish. 29As neem’s myrgeddin livrey shiu veih ooilley loght nyn neu-ghlennid, as ver-yms sarey da’n arroo dy ve er ny vishaghey, as cha jean-ym shiu y smaghtaghey lesh gortey. 30As nee’m bishaghey dy palchey mess y villey, as troar y vagheragh, nagh bee shiu ny-sodjey er nyn oltooan son y ghortey mastey ny ashoonee. 31Eisht nee shiu cooinaghtyn er ny drogh raaidyn eu hene, as er nyn aghtyn, nagh row mie, as ver shiu feoh diu hene ayns nyn shilley hene, son nyn ghrogh-yannoo, as son ooilley nyn obbraghyn eajee. 32Lhig da fys ’ve eu nagh nee er y ghraih euish ta mee jannoo shoh, ta’n Chiarn Jee dy ghra: gow-jee nearey, as bee-jee nyn dhost son ny raaidyn eu hene, O hie Israel. 33Myr shoh ta’n Chiarn Jee dy ghra, Er y laa veem’s er ghlenney shiu veih ooilley nyn ghrogh-yannoo, ver-ym erriu neesht dy chummal ayns ny ard-valjyn eu hene, as bee ny tholtanyn troggit reesht. 34As bee’n thalloo faasagh laborit, va traa dy row ny hraartys, ’sy chilley ocsyn ooilley hie shaghey. 35As jir ad, Ta’n thalloo shoh va ny hraartys, er jeet dy ve goll-rish garey Eden; as ny ard-valjyn va naardey, as follym-faase, as lhieggit, er jeet dy ve cummit ass-y-noa, as cummaltee ayndoo. 36Eisht bee fys ec ny ashoonee, ta faagit mygeayrt-y-miu, dy vel mish y Chiarn troggal ny ynnydyn va lhieggit, as soiaghey seose shen va follym-faase: ta mish y Chiarn er loayrt, as nee’m mie jeh. 37Myr shoh ta’n Chiarn Jee dy ghra, Nee thie Israel foast shirrey hym dy yannoo shen er nyn son; nee’m adsyn y vishaghey lesh deiney myr shioltane. 38Myr y chioltane casherick, myr shioltane Yerusalem ayns ny feaillaghyn casherick; myr shen bee ny ard-valjyn ta naardey er nyn lhieeney lesh shioltaneyn dy gheiney, as bee fys oc, dy nee mish y Chiarn.