CAB. XXXVII

1Va laue yn Chiarn orrym’s, as hug eh lesh mee magh ayns spyrryd y Chiarn, as lhig eh sheese mee ayns mean y choan va lane dy chraueyn, 2As hug eh orrym dy gholl shaghey ooilley mygeayrt-y-moo, as cur-my-ner va ymmodee jeu ayns y choan foshlit, as cur-my-ner v’ad feer chirrym. 3As dooyrt eh rhym, Vac y dooinney, vod ny craueyn shoh aa-vioghey? as dreggyr mee, O Hiarn Yee, ayd’s ta fys. 4Reesht dooyrt eh rhym, Jean phadeyrys er ny craueyn shoh, as abbyr roo, O shiuish chraueyn chirrym, clasht-jee goo yn Chiarn. 5Myr shoh ta’n Chiarn Jee dy ghra rish ny craueyn shoh, Cur-my-ner, ver-yms er ennal dy gholl stiagh ayndiuish, as nee shiu aa-vioghey. 6As nee’m fehyn y choyrt erriu, as ver-ym er feill dy heet seose erriu, as coodee-ym shiu lesh crackan, as ver-ym ennal ayndiu: as bee shiu bio, as bee fys eu, dy nee mish y Chiarn. 7Er shoh ren mee phadeyrys, myr va mee sarit; as myr va mee phadeyrys, va tharmane ry-chlashtyn, as cur-my-ner gleashaghey, as haink ny craueyn dy cheilley, craue gys e chraue. 8As tra va mee er yeeaghyn, cur-my-ner haink fehyn as feill seose orroo, as ren crackan gaase harrystoo: agh cha row veg yn ennal ayndoo. 9Eisht dooyrt eh rhym, Jean phadeyrys gys y gheay, jean phadeyrys, vac y dooinney, as abbyr rish y gheay, Myr shoh ta’n Chiarn Jee dy ghra, Tar veih ny kiare geayghyn, O ennal, as sheid ennal ayns ny merriu shoh, dy vod ad ve bio. 10Er shoh ren mee phadeyrys, myr doardee eh dou, as haink yn ennal ayndoo, as ren ad aa-vioghey, as hass ad seose er nyn gassyn, sheshaght-caggee erskyn-earroo mooar.

11Eisht dooyrt eh rhym, Vac y dooinney, ta ny craueyn shoh slane thie Israel: cur-my-ner t’ad gra, Ta ny craueyn ain shirgit, as ta nyn dreishteil er vailleil, er nyn son ain, ta shin giarit jeh. 12Shen-y-fa jean phadeyrys, as abbyr roo, Myr shoh ta’n Chiarn Jee dy ghra, Cur-my-ner, O my phobble, neem’s ny oaiaghyn eu y osley, as ver-ym erriu dy heet seose ass ny oaiaghyn eu, as ver-ym lhiam shiu stiagh gys thalloo Israel. 13As bee fys eu, dy nee mish y Chiarn, tra ta mee er vosley ny oaiaghyn eu, O my phobble, as er choyrt lesh shiu seose ass ny oaiaghyn eu, 14As ver-ym my spyrryd ayndiu, as bee shiu bio, as ver-ym stiagh shiu gys y thalloo eu hene: eisht bee fys eu, dy vel mish y Chiarn er loayrt eh, as er chooilleeney eh, ta’n Chiarn dy ghra.

15Haink goo yn Chiarn reesht hym’s, gra, 16Myrgeddin, uss vac y dooinney, gow uss un vaidjey, as scrieu er, cour Judah, as cour cloan Israel, e heshaghyn: eisht gow maidjey elley, as scrieu er, cour Joseph, lorg Ephraim, as cour ooilley thie Israel, e heshaghyn. 17As cur ad dy cheilley, yn derrey yeh gys y jeh elley myr un vaidjey; as hig ad dy ve un vaidjey ayns dty laue.

18As tra nee cloan dty phobble loayrt rhyt’s, gra, Nagh n’insh oo dooin cre t’ou toiggal lioroo shoh? 19Abbyr roo, Myr shoh ta’n Chiarn Jee dy ghra, Cur-my-ner, goym’s maidjey Yoseph t’ayns laue Ephraim, as kynneeyn Israel, e heshaghyn, as ver-ym adsyn mârishyn, eer marish maidjey Yudah, as nee’m jeusyn un vaidjey, as bee ad unnane ayns my laue.

20As ny maidjyn orroo nee uss scrieu, bee ad ayns dty laue, kiongoyrt rish nyn sooillyn. 21As abbyr roo, Myr shoh ta’n Chiarn Jee dy ghra, Cur-my-ner, neem’s goaill cloan Israel veih mastey ny ashoonee, raad t’ad er n’gholl, as chaglym ad er dagh cheu, as ver-ym lhiam ad gys y thalloo oc hene. 22As nee’m jeu un ashoon ayns y cheer, er sleityn Israel, as bee yn un ree oc ooilley: as cha bee ad ny-sodjey daa ashoon, chamoo vees ad er nyn rheynn ayns daa reeriaght ny-sodjey: 23Chamoo nee ad oolee jeu hene arragh, lesh nyn yallooyn, ny lesh nyn reddyn dwoaiagh, ny lesh nyn loghtyn: agh neem’s ad y livrey veih ooilley ny ynnydyn, raad t’ad er n’yannoo peccah, as glen-ym ad: myr shen bee adsyn y pobble aym’s, as beem’s yn Jee ocsyn. 24As bee David my harvaant yn ree harrystoo; as bee yn un vochilley orroo: nee ad myrgeddin neesht gimmeeaght ayns my vriwnyssyn, as freayll my lattyssyn, as jannoo ad. 25As nee ad cummal ayns y cheer, ta mish er choyrt da Jacob my harvaant, ynnyd-vaghee nyn ayraghyn, as ayns shen nee adsyn baghey, eer ad-hene, as nyn gloan, as cloan nyn glienney gys earishyn foddey beayn: as bee my harvaant David yn prince ocsyn dy bragh. 26Marish shoh, nee’m roosyn conaant dy hee; bee eh conaant dy bragh farraghtyn roosyn: as ver-yms cummal shickyr daue, as ad y vishaghey, as soie-yms seose my ynnyd casherick ny mast’ oc er son dy bragh. 27Bee my chabbane-agglish neesht mâroosyn: s’feer eh dy beem’s yn Jee ocsyn, as bee adsyn y pobble aym’s. 28As bee fys ec ny ashoonee, dy vel mish dy chasherickey Israel, tra vees my ynnyd casherick ny mast’ oc er son dy bragh.