CAB. XXXVIII

1As haink goo yn Chiarn hym’s, gra, 2Vac y dooinney, soie dty eddin noi Gog, thalloo Vagog, ard-phrince Veshech as Tubal, as jean phadeyrys n’oï, 3As abbyr, Myr shoh ta’n Chiarn Jee dy ghra, Cur-my-ner, ta mish dt’oï’s, O Ghog, ard-phrince Veshech as Tubal. 4As neem’s uss y chastey reesht, as ver-ym dooanyn ayns dty cheeillyn, as ver-ym lhiam magh oo, as ooilley dty heshaghtyn-caggee, cabbil as markee, ooilley coamrit ayns dy chooilley cheint dy eilley-caggee, eer sheshaght vooar lesh buckleryn as scapeyn, dy chooilley ghooinney jeu loaghtey yn cliwe. 5Persia, Ethiopia, as Lybia mâroo: ad shoh ooilley lesh scape as helmet: 6Gomer, as ooilley e heshaght; as mooarane sleih mâroosyn. 7Kiartee oo hene, as bee er dty arrey dhyt hene, uss, as ooilley dty heshaght, ta er nyn jaglym hood’s, as bee uss son gard dauesyn.

8Lurg mooarane laghyn yiow uss feaysley: ayns ny bleeantyn s’jerree hig oo stiagh ’sy cheer, t’er ny chosney reesht veih’n chliwe, as t’er ny haglym ass mooarane pobble gys sleityn Israel, ta er ny ve naardey son foddey dy braa: agh bee ad er nyn goyrt lhieu reesht ass ny ashoonyn, as nee ad ooilley baghey dy sauchey. 9Hed uss seose, as hig oo myr dorrin, coodee oo yn thalloo myr bodjal, uss, as ooilley dty heshaghyn, as ymmodee pobble mayrt’s. 10Myr shoh ta’n Chiarn Jee dy ghra, Hig eh gy-kione myrgeddin ec y traa shen hene, dy jig smooinaghtyn ayns dty aigney, as gowee oo drogh-ourys. 11As jir oo, Hem’s seose gys thalloo ny baljyn foshlit; as hem noi ocsyn ta ec fea, ta cummal dy sauchey, ooilley gyn voallaghyn, as nagh vel oc edyr boltyn, ny giattyn; 12Dy gheddyn spooilley, as dy ghoaill cragh ec dty laue hene, dy hyndaa dty laue er ny ynnydyn va treigit, ta nish cummaltee ayndoo, as er y pobble t’er nyn jaglym ass ny ashoonyn, ta nish er gheddyn maase as cooid, ta baghey ayns mean y thallooin. 13Sheba as Dedan, as marchanyn Tarshish, marish ooilley ny lionyn aegey ocsyn, jir ad rhyt’s, Vel uss er jeet dy ghoaill y spooilley? vel oo er haglym dty heshaght dy ghoaill cooid ec dty laue hene? dy chur lhiat ersooyl argid as airh, dy ghoaill maase as cooid, dy ghoaill mooarane cragh?

14Shen-y-fa vac y dooinney, jean phadeyrys, as abbyr rish Gog, Myr shoh ta’n Chiarn Jee dy ghra, Er y laa shen, tra ta my phobble Israel cummal dy sauchey, nagh vow uss fys er shen? 15As hig uss veih dty ynnyd hene, ass ny ardjyn twoaie, uss as mooarane pobble mayrt, ooilley markiagh er cabbil, sheshaght vooar, as fir-chaggee niartal. 16As hig oo seose noi my phobble Israel, myr bodjal dy choodaghey yn thalloo; bee shen ayns ny laghyn jerrinagh, as ver-yms lhiam oo noi yn thalloo aym’s, dy vod ny ashoonee geddyn tushtey jeem’s, tra veem’s er my chasherickey aynyd’s, O Ghog, kiongoyrt rish nyn sooillyn. 17Myr shoh ta’n Chiarn Jee dy ghra, Nee uss eshyn, loayr mee jeh ’sy chenn earish, liorish my harvaantyn phadeyryn Israel, ren phadeyrys ayns ny laghyn shen ymmodee bleeantyn, dy jinnin lhiam uss nyn ’oï? 18As hig eh gy-kione ec y traa cheddin, tra hig Gog noi thalloo Israel, ta’n Chiarn Jee dy ghra, dy jean my yymmoose troggal er my eddin. 19Son ayns my eadolys, as ayns chiass my eulys ta mee er loayrt: s’feer eh, er y laa shen dy bee craa-hallooin atchimagh ayns thalloo Egypt. 20Myr shen dy bee eeastyn ny marrey, as eeanlee yn aer, as maase y vagheragh, as ooilley cretooryn snauee y thallooin, as ooilley ny deiney t’er feaï-ny-cruinney tilgit bun-ry-skyn ec my enish, as bee ny sleityn er nyn lhieggal, as bee ny ynnydyn corragh craait sheese, as nee dy chooilley voalley tuittym gys y thalloo. 21As nee’m geamagh son y chliwe n’oï, trooid ooilley ny sleityn aym’s, ta’n Chiarn Jee dy ghra: bee cliwe dagh dooinney noi e vraar. 22As nee’m eshyn y vriwnys lesh y phlaih as lesh fuill, as deayrt-yms ersyn, as er ooilley e heshaghtyn-caggee, as er yn ymmodee pobble ta mârish, thooillaghyn fliaghee, as claghyn-sniaghtee mooar, aile as brimstone. 23Myr shoh yioyms ooashley dou hene, as nee’m mee hene y chasherickey, as bee enney orrym’s ayns sooillyn ymmodee ashoonyn, as bee fys ocsyn, dy nee mish y Chiarn.