CAB. XXXIX

1Shen-y-fa, uss vac y dooinney, jean phadeyrys noi Gog, as abbyr, Myr shoh ta’n Chiarn Jee dy ghra, Cur-my-ner, ta mish dt’oï’s, O Ghog, ard-phrince Veshech as Tubal. 2As nee’m uss y hyndaa reesht, as cha vaag-ym agh y cheyoo ayrn jeed, as ver-ym ort dy heet seose veih ny ardjyn twoaie, as ver-ym lhiam oo er sleityn Israel: 3As bwoaill-ym dty vhow ass dty laue chiare, as ver-ym er dty hideyn dy huittym ass dty laue yesh. 4Nee oo tuittym er sleityn Israel, oo hene as ooilley dty heshaghtyn-caggee, as yn pobble ta mayrt: ver-ym oo son beaghey da dy chooilley cheint dy eeanlee jollyssagh, as son bee da maase y vagheragh. 5As nee oo tuittym er y vagher feayn, son ta mish er loayrt eh, ta’n Chiarn Jee dy ghra. 6As ver-ym aile er Magog, as ny-vud ocsyn ta baghey dy mee-arreydagh ayns ny hellanyn, as bee fys oc, dy nee mish y Chiarn. 7Myr shen neem’s my ennym y hoilshaghey mastey my phobble Israel, as cha lhig-ym daue goaill my ennym casherick ayns fardail ny-sodjey; as bee fys ec ny ashoonee, dy nee mish y Chiarn, yn Jee casherick ayns Israel.

8Cur-my-ner te er jeet, as te jeant, ta’n Chiarn Jee dy ghra; shoh hene y laa ta mee er loayrt jeh. 9As hed cummaltee ard-valjyn Israel magh, as ver ad er aile, as loshtee ad ny greinyn-caggee, chammah ny scapeyn, as ny buckleryn, ny bowghyn as ny sideyn, as ny lorgyn-laue, as ny shleiyghyn, bee ad son aile daue dy lostey, shiaght bleeaney. 10Myr shen nagh gow ad veg y fuygh ass y vagher, chamoo giaree ad sheese veg y stoo ayns ny keylljyn: son nee ad lostey ny greinyn-caggee lesh aile, as nee ad spooilley ad shoh ren adsyn y spooilley, as roostey ad shoh ren adsyn y roostey, ta’n Chiarn Jee dy ghra.

11As hig eh gy-kione er y laa shen, dy der-yms da Gog ynnyd oanluckee ayns Israel, eer coan ny troailtee, cheu-har jeh’n aarkey: as nee ny troailtee cummal nyn stroanyn: as ayns shen nee ad Gog y oanluckey, as ooilley yn ymmodee echey, as nee ad genmys eh, Coan Hamon-gog. 12As shiaght meeaghyn vees thie Israel dy oanluckey ad, dy vod ad yn thalloo y ghlenney. 13Dy jarroo, nee slane pobble y cheer adsyn y oanluckey, as bee shen ny ard-laa ooasle dauesyn, eer yn laa veem’s er my ghloyraghey, ta’n Chiarn Jee dy ghra. 14As nee ad soiaghey magh deiney reiht, dy gholl dy kinjagh trooid y cheer, marish ny troailtee, dy oanluckey adsyn ta er-mayrn er eaghtyr y thallooin, cour y ghlenney: ec kione shiaght meeaghyn nee ad ronsagh. 15As ny troailtee, ta goll trooid y cheer, tra hee-ys fer craue dooinney, eisht nee eh soiaghey seose cowrey liorish, derrey ta ny fir-oanluckee er n’oanluckey eh ayns coan Hamon-gog. 16As myrgeddin bee ennym yn ard-valley Hamonah: myr shoh nee ad y thalloo y ghlenney.

17As uss, vac y dooinney, myr shoh ta’n Chiarn Jee dy ghra, Cur eam son dagh eean skianagh, as son dagh beisht y vagheragh; chaggle-jee shiu hene, as tar-jee cooidjagh er dagh cheu, gys yn oural aym’s, shen ta mee dy hebbal er nyn son, eer oural mooar er sleityn Israel, dy vod shiu gee yn eill, as giu yn uill. 18Nee shiu gee feill ny treanee, as giu fuill princeyn y thallooin, eer feill reaghyn, as eayin, as dy ghoair, as dy ghew, ad shoh ooilley brawnyn Vashan. 19Nee shiu gee jeh’n saill, derrey vees shiu lane, as giu fuill, derrey vees shiu er-meshtey, lesh yn oural aym’s, ta mee er n’aarlagh er nyn son. 20Myr shoh vees shiu jeant magh ec my voayrd, lesh cabbil as fainee, lesh deiney niartal, as lesh ooilley ny treanee caggee, ta’n Chiarn Jee dy ghra. 21As nee’m soiaghey my ghloyr mastey ny ashoonee, as nee ooilley ny ashoonee fakin my vriwnyssyn t’er ny chooilleeney, as my laue ta mee er heeyney orroosyn. 22Myr shen bee fys ec thie Israel, dy nee mish y Chiarn yn Jee ocsyn, veih’n laa shen as maghey shen.

23As bee toiggal ec ny ashoonee, dy jagh thie Israel ayns cappeeys son nyn ghrogh-yannoo: er-yn-oyr dy ren ad ard-loghtynys m’oï; shen-y-fa dollee mee my eddin vouesyn, as hug mee ad ayns laue nyn noidyn: myr shen huitt ad ooilley liorish y chliwe. 24Cordail rish nyn neu-ghlennid, as cordail rish nyn loghtyn, ta mee er n’yannoo roo, as er n’ollaghey my eddin vouesyn. 25Shen-y-fa, shoh myr ta’n Chiarn Jee dy ghra, Nish ver-ym chyndaa da cappeeys Yacob, as bee myghin aym er slane lught-thie Israel, as bee’m eadolagh son my ennym’s casherick. 26Erreish daue v’er n’ymmyrkey nyn nearey, as ooilley nyn loghtyn, lioroo t’ad er n’yannoo peccah m’oï’s, tra v’ad baghey dy souyr ’sy cheer, as cha dug unnane erbee aggle orroo. 27Erreish dou v’er chur lhiam ad reesht veih’n pobble, as er jaglym ad ass cheeraghyn nyn noidyn, as dy bee’m er my chasherickey ayndoo, ayns shilley ymmodee ashoonyn; 28Eisht bee fys oc, dy nee mish y Chiarn y Jee oc, hug orroosyn dy gholl ayns cappeeys mastey ny ashoonee: agh ta mee er jaglym ad gys y cheer oc hene, as cha vel mee er vaagail veg jeu ny-sodjey ayns shen. 29Chamoo nee’m maghey shoh follaghey my eddin vouesyn: son ta mee er gheayrtey magh my spyrryd er lught-thie Israel, ta’n Chiarn Jee dy ghra.