CAB. IV

1Uss myrgeddin, vac y dooinney, gow hood lhiack, as lhieg royd eh, as tayrn er yn ard-valley, eer Jerusalem. 2As cruinnee stiagh ee, as trog toor noi eck, as ceau seose carnane noi eck: jean campal myrgeddin noi eck, as soie greïnyn-bwoailtagh dy lhieggal ny voallaghyn eck ooilley mygeayrt. 3Ny-sodjey gow hood pot yiarn, as soie eh son voalley yiarn, eddyr uss as yn ard-valley, as soie dty eddin n’oï, as bee eh cruinnit mygeayrt, as nee oo chionney stiagh eh: shoh vees cowrey da thie Israel. 4Lhie uss myrgeddin er dty lhiattee chiare, as cur mee-chairys thie Israel er: cordail rish earroo ny laghyn nee oo lhie er, nee oo yn vee-chairys oc y ymmyrkey. 5Son ta mee er lhie ort’s bleeantyn nyn mee-chairys, cordail rish earroo ny laghyn, three cheead kiare-feed as jeih laghyn: myr shen nee uss mee-chairys thie Israel y ymmyrkey. 6As tra t’ou er chooilleeney ad, lhie reesht er dty lhiattee yesh, as nee oo gymmyrkey mee-chairys thie Yudah da-eed laa: ta mee er n’oardagh dhyt dagh laa son bleïn. 7As nee oo dty eddin y hoiaghey noi Jerusalem, t’er ny hionney stiagh, as bee dty roih rooisht, as nee oo phadeyrys noi eck. 8As cur-my-ner, ver-yms geulaghyn ort, nagh jean oo chyndaa oo hene veih lhiattee gy lhiattee, derrey t’ou er chooilleeney laghyn dty chaggey.

9Gow hood myrgeddin curnaght, as oarn, as poanrey, as pishyr, as millet, as pishyr-lughag, as cur ’syn un saagh ad, as jean arran jeu, cordail rish earroo ny laghyn lhie-ys oo er dty lhiattee, three cheead kiare-feed as jeih laghyn nee oo gee jeh.

10As dty vee t’ou dy ee, bee eh ayns towse, feed shekel ’sy laa: veih traa gys traa ee-ys oo eh. 11Nee oo myrgeddin giu ushtey liorish towse, y cheyoo ayrn jeh kaart: veih traa gys traa nee oo giu eh. 12As nee oo gee eh myr berreenyn oarn, as nee oo broie eh ’sy chilley oc lesh toarey dooinney. 13As dooyrt y Chiarn, Eer myr shoh nee cloan Israel nyn arran sollit y ee mastey ny ashoonee, raad neem’s y eiyrt ad. 14Eisht dooyrt mee, Ah Hiarn Yee, cur-my-ner, cha vel my annym er ve rieau neu-ghlen: son veih my aegid seose, eer derrey nish, cha vel mee er n’ee jeh shen t’er n’gheddyn baase jeh hene, ny raipit ayns peeshyn, chamoo haink feill vee-lowit stiagh my veeal. 15Eisht dooyrt eh rhym, Cur-my-ner, ta mee er choyrt dhyt eoylley ollee son eoylley dooinney as lesh shen nee oo gaarlagh dty arran. 16Ny-sodjey, dooyrt eh rhym, Vac y dooinney, cur-my-ner, neem’s bun yn arran y vrishey ayns Jerusalem, as nee ad arran y ee liorish towse, as thanvaneys. 17Dy vod ad ve ayns feme arran as ushtey, as fo atchim yn derrey yeh lesh yn jeh elley, as goll neeu kyndagh rish nyn mee-chairys.