CAB. XL

1Ayns y wheiggoo vleïn as feed jeh’n chappeeys ain, ayns toshiaght ny bleeaney, er y jeihoo laa jeh’n vee: ayns y chiarroo vleïn jeig lurg da’n ard-valley ve goit, er yn eer laa cheddin va laue yn Chiarn orrym’s, as hug eh lesh mee derrey shen. 2Ayns ashlishyn Yee hug eh lesh mee gys thalloo Israel, as lhig eh sheese mee er slieau feer ard, er-gerrey da shen va cummey dy ard-valley er y jiass. 3As hug eh lesh mee derrey shen, as cur-my-ner, va dooinney ayn, as va’n cummey echey, dy yeeaghyn er, myr prash sollys, as reamlagh lieen ayns e laue, as cron-towshan, as hass eh ’sy yiat. 4As dooyrt y dooinney rhym, Vac y dooinney, cur-my-ner lesh dty hooillyn, as clasht lesh dty chleayshyn, as lhig da dty chree goaill baght mie jeh ooilley ny jeeagh-yms dhyt, son er y choontey, dy yeeaghyn dhyt’s ad, t’ou er dty chur lhiat gys shoh: soilshee uss ooilley, ny t’ou dy akin, da thie Israel. 5As cur-my-ner, voalley er cheu-mooie jeh’n thie cruin mygeayrt, as ayns laue yn dooinney cron-towshan jeh shey cubityn er lhiurid, liorish y chubit, as lheead-bass: myr shen ren eh towse lheead yn vuildal un chron, as yn yrjid un chron.

6Eisht haink eh gys y yiat ta jeeaghyn lesh y niar, as hie eh seose ny greeshyn, as howse eh sole y yiat, va un chron er lheead, as sole y yiat elley, va cron er lheead. 7As dagh shamyr beg va cron er lhiurid as cron er lheead, as eddyr ny shamyryn va queig cubityn, as va lheead y sole, ayns porch y yiat er cheu-sthie, un chron. 8Howse eh myrgeddin porch y yiat cheu-sthie, un chron. 9Eisht howse eh porch y yiat hoght cubityn, as ny essynyn echey daa chubit, as shoh va porch y yiat sthie. 10As va shamyryn beggey ny giattey er cheu-har, troor er dagh cheu, v’ad nyn droor jeh’n un towse, as va ny essynyn jeh’n un towse er dagh cheu. 11As howse eh lheead entree yn yiat jeih cubityn, as yrjid y yiat three cubityn jeig. 12Yn space myrgeddin eddyr ny shamyryn beggey va un chubit er dagh cheu, as va ny shamyryn beggey shey cubityn er dagh cheu. 13Eisht howse eh yn giat veih mullagh un shamyr beg gys mullagh shamyr elley: va’n lheead queig cubityn as feed, dorrys noi dorrys. 14Ren eh myrgeddin essynyn jeh three-feed cubityn, eer gys essynyn ny cooyrtey mygeayrt y yiat. 15As veih eddin giat yn entreil, gys eddin porch y yiat sthie, va jeih cubityn as da-eed. 16As va uinniagyn coon er ny shamyryn beggey, liorish ny pillaryn cheu-sthie jeh’n yiat ooilley mygeayrt, as myrgeddin er ny archyn: as va uinniagyn mygeayrt er cheu-sthie: as er dagh pillar va biljyn-palm grainnit. 17Eisht hug eh lesh mee gys y chooyrt sthie, as cur-my-ner va shamyryn as pavement jeant son y chooyrt runt mygeayrt: va jeih shamyryn as feed er y phavement. 18As y pavement rish lhiattee ny giattyn harrish noi lhiurid ny giattyn, va’n pavement s’inshley. 19Eisht howse eh yn lheead, veih eddin y yiat s’inshley gys eddin y chooyrt sodjey stiagh er cheu-mooie, keead cubit er cheu-har as cheu-twoaie.

20As giat yn chooyrt sodjey magh ta jeeaghyn lesh y twoaie, howse eh yn lhiurid echey, as y lheead echey. 21As ny shamyryn beggey v’ayn, v’ad troor er dagh cheu, as ny pillaryn echey, as ny archyn echey v’ad lurg towse yn chied yiat: yn lhiurid echey va jeih cubityn as da-eed, as y lheead queig cubityn as feed. 22As ny uinniagyn, as ny archyn oc, as nyn miljyn-palm, v’ad lurg towse y yiat ta jeeaghyn lesh y niar, as hie ad seose huggey liorish shiaght greeishyn, as va ny archyn oc jeeragh orroo. 23As va giat yn chooyrt sodjey stiagh jeeragh er y yiat va gys y twoaie as gys y niar, as howse eh veih giat gys giat, keead cubit.

24As ny lurg shen hug eh lesh mee gys y cheu-jiass, as cur-my-ner, giat lesh y jiass, as howse eh ny pillaryn echey, as ny archyn echey cordail rish y towshan shoh. 25As va uinniagyn ayn, as ayns ny archyn echey ooilley mygeayrt, goll-rish ny uinniagyn elley; va’n lhiurid jeih cubityn as da-eed, as y lheead queig cubityn as feed. 26As va shiaght greeishyn dy gholl seose er, as va ny archyn oc jeeragh orroo, as va biljyn-palm orroo, billey er dagh cheu er ny pillaryn. 27As va giat ayns y chooyrt sodjey stiagh, as howse eh veih giat gys giat lesh y jiass, keead cubit. 28As hug eh lesh mee gys y chooyrt sodjey stiagh, ec y yiat-jiass, as howse eh yn giat-jiass cordail rish ny towshanyn shoh. 29As ny shamyryn beggey v’ayn, as ny pillaryn oc, as ny archyn oc, cordail rish ny towshanyn shoh: as va uinniagyn orroo, as er ny archyn ooilley mygeayrt: ve jeih cubityn as da-eed er lhiurid, as queig cubityn as feed er lheead, 30As va ny archyn ooilley mygeayrt queig cubityn as feed er yrjid, as queig cubityn er lheead. 31As va ny archyn roish y chooyrt sodjey magh, as va biljyn-palm er ny pillaryn oc; as va hoght greeishyn dy gholl seose er.

32As hug eh lesh mee gys y chooyrt sodjey stiagh lesh y niar, as howse eh yn giat cordail rish y towshan cheddin: 33Ny shamyryn beggey v’ayn, as ny pillaryn, as ny archyn oc cordail rish y towshan shoh, as va uinniagyn ayn, as ayns ny archyn ooilley mygeayrt; ve jeih cubityn as da-eed er lhiurid, as queig cubityn as feed er lheead. 34As ny archyn oc roish y chooyrt sodjey magh, as va biljyn-palm er ny pillaryn oc er dagh cheu, as va shiaght greeishyn dy gholl seose er.

35As hug eh lesh mee gys y yiat twoaie, as howse eh shen cordail rish y towshan cheddin. 36Ny shamyryn beggey v’ayn, ny pillaryn, as ny archyn echey, as ny uinniagyn va er ooilley mygeayrt: va’n lhiurid jeih cubityn as da-eed, as y lheead queig cubityn as feed. 37As va ny pillaryn echey lesh y chooyrt sodjey magh as va biljyn-palm er ny pillaryn er dagh cheu, as va shiaght greeishyn dy gholl seose orroo. 38As va ny shamyryn, as ny entreeyn oc liorish pillaryn ny giattey, raad v’ad niee yn oural-losht.

39As ayns porch ny giattey va daa voayrd er dagh cheu, dy aarlagh orroo yn oural-losht, as yn oural-peccah, as yn oural-loght. 40As rish y lhiattee cheu-mooie, myr hed fer seose gys entree yn yiat-twoaie, va daa voayrd; as er y cheu elley, liorish porch ny giattey va daa voayrd. 41Va kiare buird er y cheu shoh, as kiare buird er y cheu shen, rish lhiattee yn yiat; hoght buird, orroo shen v’ad gaarlagh nyn ourallyn. 42As va ny kiare buird dy chlaghyn cummit cour yn oural-losht, cubit dy lieh er lhiurid, as cubit dy lieh er lheead, as un chubit er yrjid: orroo shoh myrgeddin v’ad coyrt ny jeshaghtyn lhieu v’ad gaarlagh ny chebballyn-losht, as nyn oural-casherick. 43As cheu-sthie va croaganeyn lheead-bassey soit runt mygeayrt, as er ny buird va feill yn oural.

44As cheu-mooie jeh’n yiat sthie va shamyryn ny fir-chiaullee, sthie ’sy chooyrt, va rish lhiattee yn yiat-twoaie, as va’n eddin oc lesh y jiass, shamyr rish lhiattee yn yiat-har jeeaghyn lesh y twoaie. 45As dooyrt eh rhym, Ta’n chamyr shoh ta jeeaghyn lesh y jiass, cour ny saggyrtyn, orroosyn ta currym y thie. 46As y chamyr ta jeeaghyn lesh y twoaie, te cour ny saggyrtyn, orroosyn ta currym yn altar: t’ad shoh mec Zadok mastey mec Levi, ta cheet er-gerrey da’n Chiarn dy hirveish dasyn. 47Myr shen howse eh yn chooyrt, keead cubit er lhiurid, as keead cubit er lheead, kiare-chorneilagh; as yn altar va roish y thie.

48As hug eh lesh mee gys porch y thie, as howse eh dagh pillar y phorch, queig cubityn er dagh cheu: as lheead y yiat va three cubityn er dagh cheu. 49Va lhiurid y phorch feed cubit, as y lheead un chubit jeig, as hug eh lesh mee er ny greeishyn, lioroo v’ad goll seose: as va pillaryn liorish ny essynyn, pillar er y cheu shoh, as pillar er y cheu shen.