CAB. XLI

1Ny lurg shen, hug eh lesh mee gys y chiamble, as howse eh ny pillaryn, shey cubityn er lheead y derrey heu, as shey cubityn er y cheu elley, shoh va lheead yn chabbane-agglish. 2As va lheead y dorrys jeih cubityn, as lhiatteeyn y dorrys queig cubityn er y derrey heu, as queig cubityn er y cheu elley: as howse eh yn lhiurid echey da-eed cubit, as y lheead feed cubit. 3Eisht hie eh stiagh, as howse eh essyn y dorrys daa chubit, as y dorrys shey cubityn, as lheead y dorrys shiaght cubityn. 4Myr shen howse eh yn lhiurid echey feed cubit, as yn lheead feed cubit er oaie yn chiamble; as dooyrt eh rhym’s, Shoh yn ynnyd smoo casherick. 5Lurg shen howse eh voalley yn thie shey cubityn, as lheead dagh shamyr kiare cubityn mygeayrt y thie er dagh cheu. 6As ny shamyryn-lhiattee troor, shamyr liorish shamyr, as jeih as feed ayns coontey, as hie ad trooid voalley thie ny shamyryn-lhiattee mygeayrt er y vreast, dy voddagh holt y ve oc; agh cha row veg y holt oc ayns voalley yn chiamble. 7As va space son buttress faagit eddyr ad, son greeishyn cassee dy gholl seose gys ny shamyryn-lhiattee; son va greeishyn cassee mysh y thie ooilley mygeayrt: shen-y-fa va’n thie goaill lheead ayns yrjid, as room erskyn room ’sy vean, veih’n chamyr s’inshley gys yn chamyr syrjey. 8Honnick mee neesht yrjid y thie mygeayrt: va undin ny shamyryn-lhiattee slane cron jeh shey cubityn mooarey. 9Cheeid y voalley shen va son ny shamyryn-lhiattee cheu-mooie va queig cubityn: as y space eddyr ad, va ynnyd ny shamyryn-lhiattee, va er cheu-sthie. 10As eddyr ny shamyryn va space feed cubityn mygeayrt y thie er dagh cheu. 11As va dorryssyn ny shamyryn-lhiattee jeeragh er y space foshlit, dorrys gys y twoaie, as dorrys elley gys y jiass, as lheead yn space foshlit va queig cubityn veih cheu dy cheu. 12Nish yn buildal va kiongoyrt rish yn chlose er-lheh, ec y chione lesh y neear va three-feed as jeih cubityn er lheead, as va voalley yn vuildal queig cubityn er cheeid ooilley mygeayrt, as y lhiurid echey kiare-feed as jeih cubityn. 13Myr shen howse eh yn thie, keead cubit er lhiurid, as yn chlose er-lheh, as y buildal, lesh ny voallaghyn keead cubit er lhiurid. 14Myrgeddin lheead eddin y thie, as yn chlose er-lheh lesh y niar, keead cubit. 15As howse eh lhiurid y vuildal, jeeragh er yn chlose er-lheh cheu-chooyl, as ny loutyn-lhiattee er dagh cheu keead cubit, gys cheu-sthie yn chiamble, as porchyn y chooyrt. 16Ny essynyn dorrys, as ny uinniagyn coon, as ny loutyn-lhiattee mygeayrt er ny three yrjidyn, jeeragh er y choolley, va layit harrish lesh fuygh ooilley mygeayrt, as veih’n laare seose gys ny uinniagyn, as va coodagh er ny uinniagyn; 17Gys shen erskyn y dorrys, eer cheu-sthie as cheu-mooie, as rish ooilley yn voalley mygeayrt cheu-sthie as cheu-mooie, liorish towse. 18As ve grainnit lesh cherubim as biljyn-palm, myr shen dy row billey-palm eddyr cherub as cherub, as va daa eddin er dagh cherub: 19Myr shen dy row caslys eddin dooinney gys y villey-palm er y derrey heu, as eddin lion aeg gys y villey-palm er cheu elley: shoh myr ve trooid ooilley yn thie runt mygeayrt. 20Veih’n laare seose gys erskyn y dorrys, va cherubim, as biljyn-palm grainnit, as er voalley yn chiamble. 21As va essynyn y chiamble squarit myr ny essynyn er eddin yn ynnyd casherick: ayns cummey co-laik. 22Va’n altar fuygh three cubityn er yrjid, as y lhiurid echey daa chubit; as va ny corneilyn echey, as y lhiurid echey, as ny voallaghyn echey jeant dy fuygh: as dooyrt eh rhym’s, Shoh yn boayrd ta kiongoyrt rish y Chiarn. 23As va daa ghorrys er y chiamble, as er yn ynnyd casherick. 24As va daa choolley er dagh dorrys, eer daa choolley filley: daa choolley son un dorrys, as daa choolley son y dorrys elley. 25As va grainnit orroo, eer er dorryssyn y chiamble, cherubim as biljyn-palm, casley roo shen va jeant er ny voallaghyn, as va plankyn chiu er eddin y phorch er cheu-mooie. 26As va uinniagyn coon as biljyn-palm er dagh cheu, er lhiatteeyn y phorch, as er shamyryn-lhiattee yn thie, lesh plankyn chiu.