CAB. XLII

1Eisht hug eh lesh mee gys y chooyrt sodjey magh, lesh y twoaie, as hug eh lesh mee stiagh ayns y chamyr va jeeragh er yn chlose er-lheh, as shen va er eddin yn vuildal my-hwoaie. 2Roish y dorrys-twoaie va lhiurid keead cubit, as va’n lheead jeih cubityn as da-eed. 3Jeeragh er ny feed cubityn va son y chooyrt sodjey stiagh, as jeeragh er y phavement, va son y chooyrt sodjey magh, va galleree noi galleree ayns three loutyn. 4As jeeragh er ny shamyryn, va walk jeih cubityn er lheead er cheu-sthie, as keead cubit ayns lhiurid, as ny giattyn lesh y twoaie. 5Nish va ny shamyryn syrjey ny s’cooney: son va ny gallereeyn ny syrjey na ad shoh, na’n chamyr s’injil ny meanagh yn vuildal. 6Son v’ad ayns three loutyn, agh cha row pillaryn foue, myr pillaryn ny cooyrtyn: shen-y-fa va’n buildal goit stiagh ny smoo na va’n ayrn s’inshley as y mean, veih’n thalloo. 7As y voalley va er cheu-mooie jeeragh er ny shamyryn, lesh yn chooyrt sodjey magh roish ny shamyryn, va’n lhiurid echey jeih cubityn as da-eed. 8Son va lhiurid ny shamyryn v’ayns y chooyrt sodjey magh jeih cubityn as da-eed: as cur-my-ner kiongoyrt rish y chiamble va keead cubit. 9As veih fo ny shamyryn shoh va’n entree er cheu-har, myr ta fer goll stiagh ayndoo veih’n chooyrt sodjey magh. 10Va ny shamyryn ayns cheeid voalley ny cooyrtey gys y niar, jeeragh er y trass chooyrt, as jeeragh er y vuildal. 11As va’n raad kiongoyrt roo, goll-rish raad ny shamyryn, ta gys y twoaie, co-liauyr roosyn, as co-lhean roo, as v’ad er dy chooilley aght goll ry-cheilley, rere nyn gummey, as rere nyn ghorryssyn. 12As gansoor gys dorryssyn ny shamyryn ta gys y jiass, va dorrys ayns kione y raad, eer y raad kiart roish y voalley lesh y niar, myr ta fer goll stiagh orroo.

13Eisht dooyrt eh rhym, Ny shamyryn twoaie, as ny shamyryn-jiass shen, ta jeeragh er y trass chooyrt, t’ad shamyryn casherick, ayndoo shen nee ny saggyrtyn, ta cheet er-gerrey da’n Chiarn, gee ny reddyn smoo casherick: ayns shen ver ad dy lhiattee ny reddyn smoo casherick, as yn oural-arran, as yn oural-peccah, as yn oural-loght; son ta’n ynnyd casherick. 14Tra ta ny saggyrtyn goll stiagh ayndoo, eisht cha jed ad magh ass yn ynnyd casherick trooid y chooyrt cadjin; agh ayns shen faagee ad nyn goamraghyn êrin, ayndoo t’ad shirveish; son t’ad casherick: as ver ad coamraghyn elley orroo, as eisht tayrn er-gerrey myr-chaagh mastey yn pobble. 15Nish tra v’eh er n’yannoo jerrey er towse y slane chiamble cheu-sthie, hug eh lesh magh mee gys y yiat ta jeeaghyn lesh y niar, as howse eh shen ooilley mygeayrt. 16Howse eh yn cheu-har lesh y chron-towshan, queig cheead cron lesh y chron-towshan ooilley mygeayrt. 17Howse eh yn cheu-twoaie, queig cheead cron, lesh y chron-towshan ooilley mygeayrt. 18Howse eh yn cheu-jiass queig cheead cron, lesh y chron-towshan.

19Hyndaa eh mygeayrt gys y cheu-heear, as howse eh queig cheead cron lesh y chron-towshan. 20Howse eh shen rish ny kiare lhiatteeyn: va’n voalley echey slane mygeayrt, queig cheead cron er lhiurid, as queig cheead er lheead, son cagliagh eddyr yn ynnyd casherick as yn ynnyd cadjin.