CAB. XLIII

1Ny lurg shen hug eh lesh mee gys y yiat, eer yn giat ta jeeaghyn lesh y niar. 2As cur-my-ner, haink gloyr Yee Israel veih ard yn niar, as va e choraa goll-rish sheean ymmodee ushtaghyn, as ren y thalloo soilshean lesh y ghloyr echey. 3As ve casley rish yn ashlish shen honnick mee roïe, eer casley rish yn ashlish honnick mee, tra haink mee dy [adeyrys] traartys yn ard-valley: as va ny ashlishyn goll-rish yn ashlish honnick mee rish yn awin Chebar; as huitt mee er my eddin. 4As haink gloyr y Chiarn stiagh ’sy thie, er y cheu shen ta jeeaghyn lesh y niar. 5Myr shen hrog y spyrryd seose mee, as hug eh lesh mee stiagh ’sy chooyrt sodjey stiagh, as cur-my-ner ren gloyr y Chiarn lhieeney yn thie. 6As chlin mee eshyn loayrt rhym magh ass y thie, as hass y dooinney liorym.

7As dooyrt eh rhym, Vac y dooinney, shoh ynnyd my stoyl-reeoil, as ynnyd boyn my choshey, raad nee’m cummal mastey cloan Israel son dy bragh, as cha jean cloan Israel ny-sodjey my ennym’s casherick y vee-ooashlaghey, chamoo ad-hene, ny nyn reeaghyn, liorish nyn maarderys, ny liorish jallooyn nyn reeaghyn ayns nyn ard-ynnydyn. 8Ayns soiaghey seose nyn dhieyn-ooashlee liorish my hie’s-ooashlee, as ny pillaryn ocsyn liorish ny pillaryn aym’s, as nagh row agh voalley eddyr shin, t’ad er chur er my ennym’s casherick dy ve beg soit jeh lesh nyn obbraghyn eajee t’ad er chur-rish: shen-y-fa ta mee er chur adsyn naardey ayns my yymmoose. 9Nish lhig dauesyn cur ersooyl nyn maarderys, as jallooyn nyn reeaghyn foddey voym’s, as neem’s tannaghtyn ny mast’ oc son dy bragh.

10Uss vac y dooinney, soilshee da thie Israel nyn ghrogh-yannoo, dy vod nearey ’ve orroo, as lhig daue towse y cho-soylaghey. 11As my t’ad goaill nearey son ooilley ny t’ad er n’yannoo, jeeagh daue cummey yn thie, as y tuarystal echey, as ny raaidyn echey stiagh, as ny raaidyn echey magh, as dy chooilley chummey jeh, as ooilley ny oardaghyn echey, as ooilley ny slattyssyn echey as ooilley ny leighyn echey: as scrieu sheese eh ’sy chilley ocsyn, dauesyn dy reayll yn slane oardaghey jeh, as ooilley ny slattyssyn echey, as ad y chooilleeney. 12Shoh leigh yn thie; er mullagh y clieau bee yn slane cagliagh echey ooilley mygeayrt ard-chasherick: cur-my-ner, shoh leigh yn thie.

13As ad shoh towseyn yn altar lurg y chubit, ta’n cubit shoh dy ve cubit as lheead-bassey; eer ec y ghrunt bee eh cubit veih’n thalloo, as y lheead cubit, as y boarder rish yn oirr echey glen mygeayrt vees reaish, as shoh vees yn ayrn syrjey jeh’n altar. 14As veih’n ghrunt er y thalloo, eer gys yn rimmey s’inshley vees daa chubit, as y lheead un chubit: as veih’n rimmey sloo, eer gys y rimmey smoo vees kiare cubityn, as y lheead un chubit. 15Myr shen bee grate yn altar kiare cubityn, as seose veih’n altar vees kiare eairkyn. 16As bee yn altar daa chubit jeig er lhiurid, as ghaa-yeig er lheead, square as kiare-chorneilagh. 17As bee yn oirr echey kiare cubityn jeig er lhiurid, as kiare-jeig er lheead ayns ny kiare squareyn echey, as yn rimmey mygeayrt-y-mysh lieh cubit, as bee’n undin echey cubit mygeayrt, as nee ny greeishyn jeeaghyn lesh y niar.

18As dooyrt eh rhym, Vac y dooinney, myr shoh ta’n Chiarn Jee dy ghra, T’ad shoh oardaghyn yn altar, ayns y laa nee ad y yannoo eh, dy hebbal ourallyn-losht er, as dy spreih yn uill er. 19As da ny saggyrtyn, ny Leviteyn ta jeh sluight Zadok, adsyn ta cheet er-gerrey, dy yannoo shirveish dou, ta’n Chiarn Jee dy ghra, ver oo dow aeg son oural-peccah. 20As nee oo goaill jeh’n uill, as ver oo eh er kiare eairkyn yn altar, as er kiare corneilyn y rimmey, as er y chemmal ooilley mygeayrt: myr shoh nee uss glenney as casherickey eh. 21Nee oo myrgeddin goaill dow yn oural-peccah, as shen y lostey ayns boayl pointit y chiamble, cheu-mooie jeh’n ynnyd casherick. 22As er y laa er-giyn nee oo chebbal mannan jeh ny goair gyn lheamys, son oural-peccah, as nee ad glenney yn altar, myr ren ad shen y ghlenney lesh y dow. 23Erreish dhyt v’er ghlenney eh, nee oo chebbal stott aeg gyn lheamys, as rea veih’n chioltane, gyn lheamys. 24As nee oo ad shen y hebbal kiongoyrt rish y Chiarn, as nee ny saggyrtyn spreih sollan orroo, as nee adsyn chebbal ad seose son oural-losht gys y Chiarn. 25Shiaght laghyn nee oo geddyn aarloo cour dagh laa, goayr son oural-peccah: yiow ad aarloo myrgeddin stott aeg, as rea ass y chioltane, gyn lheamys. 26Shiaght laghyn nee ad casherickey yn altar, as shen y ghlenney, as nee ad ad-hene y chasherickey. 27As tra vees ny laghyn shoh ec kione, hig eh dy ve, er y hoghtoo laa as maghey shen, dy jean ny saggyrtyn chebbal ny ourallyn-losht euish er yn altar, as nyn ourallyn-shee; as neem’s soiaghey j’iu ta’n Chiarn Jee dy ghra.