CAB. XLIV

1Eisht hug eh lesh mee reesht raad giattey yn ynnyd casherick er cheu-mooie, ta jeeaghyn lesh y niar, as ve dooint. 2Eisht dooyrt y Chiarn rhym, Yn giat shoh bee eh dooint, cha bee eh er ny osley, as cha jed dooinney erbee stiagh er; er-yn-oyr dy vel y Chiarn, Jee Israel, er n’gholl stiagh er, shen-y-fa bee eh dooint. 3Ta shoh cour yn phrince; shen y raad nee yn prince soie, dy ee arran kiongoyrt rish y Chiarn; hed eh stiagh trooid porch yn yiat shen, as hed eh magh y raad cheddin.

4Eisht hug eh lesh mee raad y yiat-twoaie er eddin y thie; as yeeagh mee, as cur-my-ner, va gloyr y Chiarn lhieeney thie yn Chiarn; as huitt mish er my eddin. 5As dooyrt y Chiarn rhym, Vac y dooinney, gow tastey vie, as cur-my-ner lesh dty hooillyn, as clasht lesh dty chleayshyn ooilley ny ta mish dy ghra rhyt mychione ooilley oardaghyn thie yn Chiarn, as ooilley e leighyn, as gow tastey vie jeh’n order, son dy chooilley unnane hig stiagh, as dy chooilley unnane hed magh ass yn ynnyd casherick. 6As abbyr uss rish ny mee-viallee, eer rish thie Israel, Myr shoh ta’n Chiarn Jee dy ghra, O shiuish hie Israel s’lioar diu ooilley nyn obbraghyn eajee, 7Ayns dy vel shiu er chur lhieu joarreeyn chymmyltagh ayns cree, as chymmyltagh ayns callin stiagh ayns my ynnyd casherick, dy hollaghey eh, eer my hie hene, tra ta shiu chebbal my oural-arran, yn eeh, as yn uill, as t’ad er vrishey my chonaant, liorish ooilley nyn obbraghyn dwoaiagh. 8As cha vel shiuish er vreayll currym my nheeghyn’s casherick: agh ta shiu er hoiaghey diu hene shirveishee joarree ayns my ynnyd casherick.

9Myr shoh ta’n Chiarn Jee dy ghra, Cha jean joarree erbee, nagh vel er ny yiarey-chymmylt ayns cree, chammah’s callin, goll stiagh ayns my ynnyd’s casherick, eer joarree erbee ta mastey cloan Israel. 10As ny Leviteyn ta er n’gholl ersooyl foddey voym ayns shaghrynys Israel, hie er-shaghryn voym’s lurg nyn yallooyn, nee ad shen gymmyrkey nyn mee-chairys hene. 11Foast bee ad shirveishee ayns my ynnyd casherick, lesh currym giattey yn thie orroo, as shirveish mygeayrt y chiamble: nee ad marroo yn oural-losht, as oural y phobble, as nee ad shassoo rhymboo, dy hirveish foue. 12Er-yn-oyr dy ren ad shirveish daue kiongoyrt rish nyn yallooyn, as dy dug ad er thie Israel dy huittym ayns peccah; shen-y-fa ta mee er droggal seose my laue nyn ’oï, ta’n Chiarn Jee dy ghra, as nee ad gymmyrkey nyn mee-chairys. 13As cha jig ad er-gerrey dooys dy yannoo shirveish y taggyrtys ayns my enish, chamoo hig ad cour veg jeh ny reddyn casherick ’syn ynnyd smoo casherick: agh nee ad gymmyrkey nyn nearey, as nyn obbraghyn eajee t’ad er n’yannoo. 14Agh nee’m jeusyn porteryn dorrys dy reayll currym y thie, son dy chooilley vonney dy hirveish, as ooilley yn obbyr vees er ny yannoo ayn.

15Agh ny saggyrtyn ny Leviteyn, mec Zadok, dreill currym yn ynnyd casherick, tra hie cloan Israel er-shaghryn voym, hig ad shoh er-gerrey dy yannoo shirveish dou, as nee adsyn shassoo kiongoyrt rhym dy hebbal dooys yn eeh, as yn uill, ta’n Chiarn Jee dy ghra. 16Hed adsyn stiagh ayns my ynnyd casherick, as hig ad er-gerrey da my voayrd dy hirveish dou, as nee adsyn freayll my churrym.

17As hig eh gy-kione, tra hed ad stiagh er giattyn y chooyrt sodjey sthie, dy bee ad er nyn goamrey lesh garmadyn aanrit, as cha jig eaddagh olley erbee orroo, choud as t’ad shirveish cheu-sthie jeh giattyn y chooyrt sodjey stiagh. 18As bee bonnettyn aanrit oc er nyn ghing, as breechyn aanrit mysh nyn meeghyn: cha der ad moo red erbee ta jannoo ollish. 19As tra t’ad goll magh ayns y chooyrt er cheu-mooie, eer gys y chooyrt sodjey magh gys y pobble, ver ad jeu ny garmadyn ayndoo v’ad shirveish, as tashtey ad ayns ny shamyryn casherick, as ver ad moo garmadyn elley, nagh jean ad yn pobble y chasherickey lesh nyn gharmadyn. 20Chamoo nee ad baarey nyn ghing, ny lhiggey da nyn volt gaase liauyr, nee ad ynrycan baarey nyn volt. 21Chamoo nee saggyrt erbee giu feeyn, tra t’ad goll stiagh ’sy chooyrt sthie. 22Chamoo nee ad goaill son nyn mraane-sheshey ben-treoghe, ny unnane scarrit, agh gowee ad moidynyn jeh sluight thie Israel, ny ben-treoghe saggyrt. 23As ynsee ad my phobble dy yannoo soiaghey eddyr casherick as an-chasherick, as dy hoiggal y lhiettrimmys eddyr glen as neu-ghlen. 24As ayns cooishyn leigh nee ad soie ayns briwnys, as ver ad briwnys cordail rish my lattyssyn: as nee ad freayll ny leighyn, as ny slattyssyn aym’s, ayns ooilley ny quaiylyn aym’s, as nee ad my ghooneeyn y chasherickey. 25As cha jig ad coair corp peccagh marroo erbee dy ve an-chasherick: agh er son ayr, ny moir, ny son mac, ny son inneen, son braar, ny son shuyr, nagh row poost, oddys ad ve neu-ghlen. 26As lurg da v’er ny ghlenney, nee ad coontey dasyn shiaght laghyn. 27As er y laa t’eh goll stiagh ’syn ynnyd casherick, eer gys y chooyrt sthie, dy hirveish ’syn ynnyd casherick, nee eh chebbal e oural-peccah, ta’n Chiarn Jee dy ghra. 28As cha bee eiraght erbee oc: mish yn eiraght ocsyn: as cha der shiu state-hallooin daue ayns Israel; ta mish daue ayns ynnyd state-hallooin. 29Nee adsyn beaghey er yn oural-arran, as yn oural-peccah, as yn oural-loght; as dagh nhee t’er ny hebbal ayns Israel vees lhieusyn. 30As y toshiaght jeh dy chooilley chied-vess jeh dy chooilley nhee, as dagh chebbal jeh’n slane jeh dy chooilley cheint jeh nyn jebballyn, bee shen lesh ny saggyrtyn: as ver shiu myrgeddin da’n taggyrt toshiaght nyn arroo-arran, dy vod eshyn cur er yn bannaght dy hannaghtyn ayns dty hie. 31Cha jean ny saggyrtyn gee jeh red erbee ta geddyn baase jeh hene, ny raipit, lhig da ve eean ny baagh.