CAB. XLV

1Marish shoh, tra nee shiu rheynn myr cronney yn thalloo son eiraght, nee shiu soiaghey magh da’n Chiarn ayrn casherick jeh’n thalloo: bee’n lhiurid echey queig as feed thousane cubit, as bee’n lheead jeih thousaneyn: bee shoh casherick ayns ooilley ny ardjyn echey slane mygeayrt. 2Jeh shoh bee cour y chabbane-agglish queig cheead ayns lhiurid, as queig cheead ayns lheead, square slane mygeayrt; as jeih cubityn as da-eed son toyrtys huggey. 3As jeh’n towse shoh nee oo soiaghey magh yn lhiurid, queig thousaneyn as feed, as yn lheead jeih thousaneyn: as ayns shen vees yn cabbane-agglish, as yn ynnyd smoo casherick. 4Bee yn ayrn casherick jeh’n thalloo cour ny saggyrtyn, shirveishee yn chabbane-agglish, adsyn ta cheet er-gerrey dy yannoo shirveish gys y Chiarn, as bee shen ynnyd son ny thieyn oc, as ynnyd casherick son y chabbane-agglish. 5As ny queig thousaneyn as feed dy lhiurid as ny jeih thousaneyn dy lheead vees myrgeddin ec ny Leviteyn, shirveishee yn thie, nyn gour hene, son thalloo-eiraght cour feed straïdyn dy hieyn-vaghee.

6As nee shiu soiaghey magh thalloo yn ard-valley, queig thousaneyn er lheead, as queig thousaneyn as feed er lhiurid, roie jeeragh lesh yn ayrn casherick: bee shen cour slane thie Israel.

7As bee ayrn cour y phrince er dagh cheu jeh toyrtys yn ayrn casherick, as jeh cooid hallooin yn ard-valley, roie jeeragh lesh toyrtys yn ayrn casherick, as lesh cooid hallooin yn ard-valley veih yn cheu-heear, sheear, as veih yn cheu-har, shiar; as bee yn lhiurid corrym rish dagh ayrn jeu shoh, veih yn oirr heear gys yn oirr har. 8Shoh vees yn chooid hallooin echeysyn ayns Israel, as cha jean ny princeyn aym’s ny-sodjey tranlaase y yannoo er my phobble; as y chooid elley jeh’n thalloo ver ad da kynney Israel, rere ny tribeyn.

9Myr shoh ta’n Chiarn Jee dy ghra, S’lioar shoh diuish, O phrinceyn Israel: cur-jee veue tranlaase as spooilley, as jean-jee briwnys as cairys, trog-jee nyn laue-lajerys veih my phobble, ta’n Chiarn Jee dy ghra. 10Nee shiu freayll towse cairal, ephah cairal, as bath cairal. 11Bee yn Ephah, as y bath jeh’n un towse, yn bath goaill yn jeihoo ayrn jeh’n homer, as yn ephah yn jeihoo ayrn jeh’n homer: bee yn towse oc lurg yn homer. 12As bee yn shekel feed gerah: feed shekel, queig shekelyn as feed, queig shekelyn jeig vees yn maneh euish. 13Shoh yn oural nee shiu chebbal; yn cheyoo ayrn jeh ephah ass homer dy churnaght, as ver shiu yn cheyoo ayrn jeh ephah ass homer dy oarn. 14Mychione towse oural ooil, yn bath dy ooil, nee shiu chebbal yn jeihoo ayrn jeh bath ass y cor, ta shen homer jeh jeih bathyn; son ta jeih bathyn jannoo homer. 15As un eayn veih’n chioltane magh ass daa cheead, goit ass aberyn mea Israel, son oural-arran, as son oural-losht, as son ourallyn-shee, dy yannoo lhiasaghey er nyn son, ta’n Chiarn Jee dy ghra. 16Nee ooilley pobble ny cheerey chebbal yn oural shoh ass lieh yn phrince ayns Israel. 17As bee eh lhie er y phrince dy choyrt ourallyn-losht, as ourallyn-arran, as ourallyn-feeyney ayns ny feaillaghyn, as er ny eaystyn-noa, as er ny dooneeyn, ayns ooilley ard-feaillaghyn thie Israel: nee eshyn jannoo cost son yn oural-peccah, as yn oural-arran, as yn oural-losht, as yn oural-shee, dy yannoo lhiasaghey son thie Israel. 18Myr shoh ta’n Chiarn Jee dy ghra, Er yn chied vee, er y chied laa jeh’n vee, nee uss goaill dow aeg gyn lheamys, as glenney yn ynnyd casherick. 19As nee’n saggyrt goaill jeh fuill yn oural-peccah, as shen y choyrt er essynyn y thie, as er kiare corneilyn rimmaghyn yn altar, as er essynyn y yiat sodjey stiagh. 20As shen myr nee oo jannoo er y chiaghtoo laa jeh’n vee, son dagh unnane ta fo marranys, as son eshyn ta mee-hushtagh: as shoh myr nee oo lhiasaghey son y thie. 21Ayns y chied vee, er y chiarroo laa yeig jeh’n vee, nee shiu freayll yn chaisht, feailley rish shiaght laghyn, arran gyn soorit vees er ny ee. 22As er y laa shen yiow yn prince aarloo ny chour hene, as cour ooilley sleih ny cheerey, dow son oural-peccah. 23As er shiaght laghyn ny feailley ver eh oural-losht gys y Chiarn, shiaght dew, as shiaght reaghyn gyn lheamys, dagh laa son ny shiaght laghyn, as mannan jeh ny goair dagh laa son oural-peccah. 24As yiow eh aarloo oural-arran dy ephah lesh y dow, as ephah lesh rea, as hin dy ooil lesh yn ephah. 25Er yn chiaghtoo vee, er y wheiggoo laa yeig jeh’n vee nee eh myrgeddin ayns feailley ny shiaght laghyn, rere yn oural-peccah, rere yn oural-losht, as rere yn oural-arran, as rere yn oural ooil.