CAB. XLVI

1Myr shoh ta’n Chiarn Jee dy ghra, Bee giat yn chooyrt sodjey stiagh ta jeeaghyn lesh y niar dooint er ny shey laghyn-obbyr: agh er y doonaght bee eh er ny osley. 2As hed y prince stiagh trooid porch yn yiat cheddin er cheu-mooie, as shassoo liorish pillar y yiat, as yiow yn saggyrt aarloo yn oural-losht, as e ourallyn-shee, as nee eh ooashlaghey ec sole y yiat, eisht hed eh magh, agh cha bee yn giat jeight derrey’n astyr. 3Myrgeddin nee yn theay ooashlaghey ec dorrys y yiat shoh, roish y Chiarn, er ny dooneeyn, as er ny eaystyn-noa. 4As yn oural-losht, shen nee’n prince chebbal gys y Chiarn er laa’n doonaght, vees shey eayin gyn lheamys, as rea gyn lheamys. 5As bee’n oural-arran ephah lesh rea, as yn oural-arran lesh ny eayin rere feoiltys e laue hene, as hin dy ooil gys yn ephah. 6As er laa yn eayst-noa vees dow aeg gyn lheamys, as shey eayin, as rea: bee ad shoh gyn lheamys. 7As yiow eh aarloo yn oural-arran, ephah lesh dow, as ephah lesh rea: as lesh ny eayin lurg feoiltys e laue hene, as hin dy ooil gys ephah. 8As tra hed y prince stiagh, nee eh goll stiagh trooid porch y yiat, as hed eh magh er y raad cheddin.

9As tra hig y theay roish y Chiarn, ayns ny feaillaghyn casherick, eshyn ta goll stiagh raad y yiat-twoaie dy ooashlaghey, hed eh magh er raad y yiat-jiass: as eshyn hed stiagh er raad y yiat-jiass, hed eh magh er raad y yiat-twoaie: cha jig eh magh rish raad y yiat hie eh stiagh er; agh hed eh magh er y cheu elley jeeragh er. 10As y prince ’sy vean oc, tra hed adsyn stiagh, hed eshyn stiagh; as tra hig adsyn magh, hig eshyn magh myrgeddin. 11As ayns ny ard-feaillaghyn, as ayns ny shirveishyn casherick, bee yn oural-arran, ephah lesh dow, as ephah lesh rea, as lesh eayn, lurg feoiltys e laue hene, as hin dy ooil gys ephah. 12Nish tra nee’n prince kiarail son oural-losht arryltagh, ny ourallyn-shee, dy aggindagh gys y Chiarn, nee fer fosley dasyn yn giat ta jeeaghyn lesh y niar, as yiow eh aarloo e oural-losht, as e ourallyn-shee, myr ren eh er laa yn doonaght: eisht hed eh magh, as lurg da v’er n’gholl magh, nee fer jeigh yn giat. 13As er dagh laa nee oo gaarlagh oural-losht gys y Chiarn, eayn gyn lheamys yiow aarloo dy chooilley voghrey. 14As yiow aarloo oural-arran lesh dagh moghrey, yn cheyoo ayrn dy ephah, as y trass ayrn jeh hin dy ooil dy chur kione y flooyr meein; bee oural kinjagh liorish oardaghey shickyr gys y Chiarn. 15Shoh myr nee ad yn eayn y yannoo aarloo, as yn oural-arran, as yn ooil dy chooilley voghrey, son oural-losht gagh-laa. 16Myr shoh ta’n Chiarn Jee dy ghra, My ta’n prince cur gioot da fer erbee jeh e vec, bee yn eiraght lesh ny mec echey, bee shen oc ayns nyn gummal myr eiraght. 17Agh my ver eh ayrn erbee jeh e eiraght da fer jeh e harvaantyn, eisht bee shen leshyn gys bleïn yn eaysley; lurg shen nee eh chyndaa gys y phrince: as bee yn eiraght lesh ny mec echey. 18Myrgeddin, cha nhegin da’n prince goaill veg jeh eiraght e phobble er niart, dy eiyrt ad ass nyn gummallyn; agh ver eh eiraght da ny mec echey hene ass e chummal hene: nagh bee yn pobble aym’s er nyn skeayley, dagh dooinney veih e chummal.

19Eisht hug eh lesh mee trooid yn entree, va rish lhiattee yn yiat gys shamyryn casherick ny saggyrtyn, va jeeaghyn lesh y twoaie, as cur-my-ner va boayl rish y daa lhiattee gys y neear. 20Eisht dooyrt eh rhym’s, Shoh yn ynnyd raad nee ny shirveishee broie yn oural-loght, as yn oural-peccah, raad nee ad fuinney yn oural-arran: nagh der ad lhieu magh ad gys y chooyrt t’er cheu-mooie dy chasherickey yn pobble. 21Eisht hug eh lesh magh mee gys y chooyrt er cheu-mooie, as hug eh orrym goll shaghey kiare corneilyn y chooyrt, as cur-my-ner, va boayl voallit stiagh ayns dagh corneil jeh’n chooyrt. 22Ayns kiare corneilyn ny cooyrtey va chiollagh lesh chymleeyn ’sy chooyrt, da-eed cubit er lhiurid, as jeih as feed er lheead: va ny kiare corneilyn jeh’n un towse. 23As va roa dy vuildal mygeayrt ayndoo, eer mygeayrt-y-moo nyn giare, as ve soit magh lesh ynnydyn son gaarlagh bee fo yn vuildal slane mygeayrt. 24Eisht dooyrt eh rhym, T’ad shoh ny ynnydyn ocsyn ta gaarlaghey, raad nee shirveishee yn thie gaarlagh ourallyn y pobble.