CAB. XLVII

1Ny lurg shen hug eh lesh mee reesht gys dorrys y chiamble, as cur-my-ner, va ushtey geill magh fo laare y dorrys lesh y niar: son va eddin y thie shassoo lesh y niar, as haink ny ushtaghyn veih fo lhiattee yesh y thie, cheu-jiass jeh’n altar. 2Eisht hug eh lesh magh mee er raad yn yiat-twoaie, as hie eh mârym mygeayrt yn raad mooie gys y yiat sodjey magh er y raad ta jeeaghyn lesh y niar, as cur-my-ner va ushtaghyn roie magh er y cheu yesh. 3As tra va’n dooinney va’n line echey ny laue er n’gholl magh lesh y niar, ren eh towse thousane cubit, as hug eh lesh mee trooid yn ushtey; va’n ushtey gys nyn abbaneyn. 4Reesht howse eh thousane elley, as hug eh lesh mee trooid yn ushtey; va’n ushtey gys nyn ghlioonyn: eisht howse eh thousane, as hug eh lesh mee trooid: va’n ushtey gys nyn meeghyn. 5Ny lurg shen howse eh, as ve ny hawin ro ghowin dou dy gholl harrish: son va ny ushtaghyn er droggal, ushtaghyn dy naue ayndoo, awin nagh voddagh fer goll harrish.

6As dooyrt eh rhym, Vac y dooinney, vel uss er vakin shoh? eisht hug eh lesh mee, as hug eh orrym dy hyndaa gys broogh ny hawin. 7Nish tra va mee er hyndaa, cur-my-ner, ec broogh ny hawin va ymmodee biljyn er y derrey heu, as er y cheu elley. 8Eisht dooyrt eh rhym, Ta ny ushtaghyn shoh roie magh lesh cheer yn niar, as sheese gys yn aasagh, as goll ayns yn aarkey: tra hig ad fud ushtaghyn ny marrey, bee ny ushtaghyn shen er nyn lheihys. 9As hig eh gy-kione, dy chooilley nhee bio ta gleashagh raad erbee dy jig ny awinyn, dy bee eh bio: as bee ayn ymmodee erskyn-earroo dy eeastyn, kyndagh dy jig ny ushtaghyn shoh gys shen; son bee adsyn er nyn lheihys; as bee dy chooilley nhee bio raad ta’n awin goaill coorse. 10As hig eh gy-kione, dy jean ny eeasteyryn taaghey huggey, veih En-gedi eer gys En-eglaim; bee ad shoh ynnydyn dy skeayley magh lieenteenyn, bee yn eeast oc rere nyn ghooie, myr eeast yn aarkey vooar, ymmodee ayns earroo. 11Agh ny ynnydyn laaghey t’ayn, as ny claddeeyn, cha bee ad er nyn lheihys, bee ad shen fo saailley gennish. 12As liorish yn awin, er e vroogh, dagh cheu jeh, nee gaase dy chooilley villey cour beaghey, e ghuillag cha jean fioghey, chamoo vees e vess er ny choyrt naardey: ver eh magh mess noa rere ny meeaghyn, er coontey dy ren ny ushtaghyn ocsyn geill magh ass yn ynnyd casherick, as bee yn mess oc son beaghey, as ny duillagyn oc son medshin.

13Myr shoh ta’n Chiarn Jee dy ghra, Shoh vees yn chagliagh, liorish nee shiu goaill yn cheer ayns eiraght, cordail rish daa hribe jeig Israel: bee daa ayrn ec Joseph. 14As nee shiu shen y ghoaill myr eiraght, chammah fer as fer elley: my-e-chione ren mee breearrey dy choyrt shen da nyn ayraghyn, as nee yn thalloo goll lhieuish myr eiraght. 15As shoh vees cagliagh ny cheerey lesh y twoaie, veih yn aarkey vooar lesh raad Hethlon, myr ta deiney goll gys Zedad: 16Hamath, Berothah, Sibraim, ta eddyr oirr Damascus, as oirr Hamath; Hazar-hatticon, ta liorish coastyn Hauran. 17As yn chagliagh veih’n aarkey vees Hazar-enan, oirr Damascus, as lesh y twoaie my-hwoaie, as slyst Hamath, as shoh’n lhiattee-twoaie. 18As y lhiattee-har nee shiu towse veih Hauran, as veih Damascus, as veih Gilead, as veih thalloo Israel rish Jordan, veih’n oirr gys yn aarkey-har; as shoh yn lhiattee-har. 19As yn lhiattee-jiass lesh y jiass veih Tamar, gys ushtaghyn yn anvea ayns Kadesh, yn awin, gys yn aarkey vooar: as shoh yn lhiattee-jiass lesh y jiass. 20Yn lhiattee-heear myrgeddin vees yn aarkey vooar, veih’n oirr, derrey hig dooinney jeeragh er Hamath: shoh yn lhiattee-heear. 21Shoh myr nee shiu rheynn y thalloo shoh diu hene, cordail rish kynneeyn Israel.

22As hig eh gy-kione, dy jean shiu y rheynn eh lesh lottyn son eiraght diuish, as da ny joarreeyn ta baghey ny mast’ eu, as cloan oc nyn mastey: as bee adsyn diuish myr ruggit ayns y cheer, mastey cloan Israel, bee eiraght oc mêriu fud kynneeyn Israel. 23As hig eh gy-kione, yn tribe shen ta’n joarree baghey ayn, shen y raad ver shiu e eiraght dasyn, ta’n Chiarn Jee dy ghra.