CAB. XLVIII

1Nish she shoh enmyn ny tribeyn veih’n chione-twoaie gys ard raad Hethlon, myr ta fer goll gys Hamath, Hazar-enan, ardjyn Damascus my-hwoaie, gys slyst Hamath (son shoh ny lhiatteeyn echey shiar as sheear) son cronney Dan. 2As rish ardjyn Dan, veih’n lhiattee-har gys y lhiattee-heear cronney Asher. 3As rish cagliagh Asher, veih’n lhiattee-har, eer gys y lhiattee-heear cronney Naphtali. 4As rish cagliagh Naphtali, veih’n lhiattee-har gys y lhiattee-heear cronney Vanasseh. 5As rish cagliagh Vanasseh, veih’n lhiattee-har gys y lhiattee-heear cronney Ephraim. 6As rish cagliagh Ephraim, veih’n lhiattee-har gys y lhiattee-heear cronney Reuben. 7As rish cagliagh Reuben, veih’n lhiattee-har gys y lhiattee-heear cronney Yudah.

8As rish cagliagh Yudah, veih’n lhiattee-har gys y lhiattee-heear, vees yn cronney casherick, shen nee shiu y hoiaghey magh jeh queig thousaneyn cubit as feed er lheead, as er lhiurid myr unnane jeh ny ayrnyn elley, veih’n lhiattee-har gys yn lhiattee-heear, as bee yn chiamble ayns y vean echey. 9Yn cronney casherick shen nee shiu soiaghey magh son y Chiarn, vees queig thousaneyn as feed ayns lhiurid, as jeih thousaneyn ayns lheead. 10As ny chour ocsyn, eer cour ny saggyrtyn vees yn cronney casherick shoh; lesh y twoaie, queig thousaneyn as feed ayns lhiurid, as lesh yn neear jeih thousaneyn er lheead, as lesh yn niar jeih thousaneyn er lheead, as lesh y jiass queig thousaneyn as feed ayns lhiurid, as bee chiamble y Chiarn ’sy vean echey. 11Bee shen cour ny saggyrtyn jeh mec Zadok, ta er nyn gasherickey, ta er vreayll my churrym’s, adsyn nagh jagh er-shaghryn ayns shaghrynys cloan Israel, as myr hie ny Leviteyn er-shaghryn. 12As bee yn cronney casherick shoh jeh’n thalloo, ta myr shoh soit magh, dauesyn cooid hallooin ard-chasherick, liorish cronney ny Leviteyn. 13As roie jeeragh rish cronney ny saggyrtyn, bee ec ny Leviteyn queig thousaneyn as feed ayns lhiurid, as jeih thousaneyn er lheead: bee yn slane lhiurid queig thousaneyn as feed, as yn lheead jeih thousaneyn. 14As cha jig lhieu veg jeh y chreck, chamoo y choonrey, ny foast dy choyrt er-gioal toshiaght messyn y cheer: son ta shen casherick gys y Chiarn.

15As ny queig thousaneyn ta faagit ayns y lheead, roie jeeragh lesh ny queig thousaneyn as feed, vees son caitnys cour yn ard-valley, son cummallyn as claddeeyn, as bee yn ard-valley ayns y vean echey. 16As shoh vees y towshan echey, yn lhiattee-twoaie kiare thousaneyn as queig cheead, as y lhiattee-jiass kiare thousaneyn as queig cheead, as er y cheu-har kiare thousaneyn as queig cheead, as er y cheu-heear kiare thousaneyn as queig cheead. 17As bee claddeeyn yn ard-valley gys y twoaie daa cheead as jeih as da-eed, as gys y jiass daa cheead as jeih as da-eed, as gys y niar daa cheead as jeih as da-eed, as gys y neear daa cheead as jeih as da-eed. 18As bee yn chooid elley ayns lhiurid cheu-mooie jeh’n chronney casherick, jeih thousaneyn gys y niar, as jeih thousaneyn gys y neear: as bee shen cheu-mooie jeh’n chronney casherick, as bee yn troar echey son beaghey dauesyn ta nyn labreeyn ayns yn ard-valley. 19As adsyn ta myr shoh shirveish ’syn ard-valley, bee ad ny labreeyn ass ooilley tribeyn Israel. 20Bee yn slane cronney casherick queig thousaneyn as feed, liorish queig thousaneyn as feed: nee shiu soiaghey magh yn cronney casherick co-lhean, co-liauyr, liorish cooid hallooin yn ard-valley.

21As bee yn chooid elley cour yn phrince er dagh cheu jeh’n chronney casherick, as jeh cooid hallooin yn ard-valley, roie jeeragh lesh ny queig thousaneyn as feed jeh’n chronney casherick lesh yn oirr har as sheear jeeragh lesh ny queig thousaneyn as feed er yn oirr heear, roie lesh cronney ny princeyn, as shen vees y cronney casherick, as bee cabbane-agglish y chiamble ayns y vean echey. 22Marish shoh, veih cronney ny Leviteyn, as veih cronney yn ard-valley, ta liorish ayrn y phrince, eddyr cagliagh Yudah as cagliagh Venjamin, bee shen cour y phrince. 23Agh son ny tribeyn elley; veih yn lhiattee-har gys y lhiattee-heear, vees cronney Venjamin. 24As rish cagliagh Venjamin, veih’n lhiattee-har gys y lhiattee-heear vees cronney Simeon. 25As rish cagliagh Simeon, veih yn lhiattee-har gys y lhiattee-heear vees cronney Issachar. 26As rish cagliagh Issachar veih yn lhiattee-har gys y lhiattee-heear vees cronney Zebulun. 27As rish cagliagh Zebulun veih’n lhiattee-har gys y lhiattee-heear, cronney Ghad. 28As rish cagliagh Ghad ec y lhiattee-jiass lesh y jiass, bee yn chagliagh eer veih Tamar gys ushtaghyn yn anvea ayns Kadesh, as gys yn awin, lesh yn aarkey vooar. 29Shoh yn thalloo nee shiu y rheynn liorish cronney gys tribeyn Israel son eiraght, as shoh vees cronney dagh tribe jeu, ta’n Chiarn Jee dy ghra.

30As shoh towse yn ard-valley er cheu-twoaie, kiare thousaneyn as queig cheead towshan. 31As bee giattyn yn ard-valley enmyssit er tribeyn Israel; three giattyn my-hwoaie, un yiat er Reuben, un yiat er Judah, un yiat er Levi. 32As er y cheu-har, kiare thousaneyn as queig cheead, lesh three giattyn; un yiat er Joseph, un yiat er Benjamin, un yiat er Dan. 33As er y cheu-jiass, kiare thousaneyn as queig cheead towshan, lesh three giattyn; un yiat er Simeon, un yiat er Issachar, un yiat er Zebulun. 34Er y cheu-heear, kiare thousaneyn as queig cheead, lesh three giattyn; un yiat er Gad, un yiat er Asher, un yiat er Naphtali. 35Va’n slane towshan mygeayrt hoght thousaneyn jeig dy howshanyn: as bee ennym yn ard-valley veih yn laa shen, Ta’n CHIARN ayns shen.