CAB. V

1As uss, vac y dooinney; gow hood skynn ghyere, gow hood razor yn vaareyder, as tayrn eh harrish dty chione, as dty aasaag, eisht gow hood meihaghyn dy howse, as dy rheynn yn olt. 2Yn trass ayrn nee oo lostey lesh aile ayns mean yn ard-valley, tra ta laghyn y chionney-stiagh noi eck er ny chooilleeney, as trass ayrn nee oo y ghoaill, as giarey dy myn eh lesh y skynn; as trass ayrn ver oo lesh y gheay, as neem’s cliwe y hayrn geiyrt orroo. 3Nee oo myrgeddin kuse fardalagh jeu y ghoaill, as kiangley ad ayns fillaghyn dty choamrey. 4As gow paart jeu reesht, as tilg ad ayns mean yn aile, as losht ad ayns yn aile; son veih shen nee lossey brishey magh er slane thie Israel.

5Myr shoh ta’n Chiarn Jee dy ghra, She shoh Jerusalem; ta mee er hoiaghey ayns mean ny ashoonyn, as ny cheeraghyn ta mygeayrt-y-mooee. 6As t’eeish er chaghlaa my vriwnyssyn gys mee-chraueeaght, ny smoo na ny ashoonyn, as my lattyssyn, ny smoo na ny cheeraghyn ta mygeayrt-y-mooee: son t’ad er n’obbal my vriwnyssyn, as my lattyssyn, cha vel ad er n’immeeaght ayndoo. 7Shen-y-fa, myr shoh ta’n Chiarn Jee dy ghra, Er-yn-oyr dy vel shiuish er nyn mishaghey ny smoo na ny ashoonyn ta mygeayrt-y-miu, as nagh vel shiu er n’immeeaght ayns my lattyssyn, chamoo er reaylley my vriwnyssyn, ny er n’yannoo cordail rish briwnyssyn ny ashoonyn ta mygeayrt-y-miu; 8Shen-y-fa myr shoh ta’n Chiarn Jee dy ghra, Cur-my-ner ta mish, dy jarroo mish hene, dt’oï, as ayns dty vean’s goym cooilleeney jeed’s ayns shilley ny ashoonyn. 9As neem’s aynyd shen nagh vel mee foast er n’yannoo, as y lheid nagh jean-ym arragh, kyndagh rish ooilley dty ghrogh-yannoo. 10Shen-y-fa nee ny ayraghyn gee nyn gloan cheu-sthie jeed, as nee ny cloan gee nyn ayraghyn; as neem’s my vriwnyssyn y chooilleeney aynyd’s, as ooilley ny t’er-mayrn jeed neem’s y skeayley gys dy chooilley gheay. 11Shen-y-fa, myr ta mee bio, ta’n Chiarn Jee dy ghra, Son shickyrys, er-yn-oyr dy vel oo er an-chasherickey my hiamble lesh ooilley dty chliaghtaghyn dwoaiagh, as lesh ooilley dty obbraghyn eajee; shen-y-fa neem’s uss myrgeddin y leodaghey, chamoo nee my hooill lhiggey lhiat, chamoo goym chymmey jeed.

12Yiow yn trass ayrn jeed baase lesh y phaitt, as lesh gortey bee ad er ny choyrt mow cheu-sthie jeed; as nee trass ayrn tuittym liorish y chliwe mygeayrt-y-mood; as trass ayrn nee’m y skeayley lesh dy chooilley gheay, as nee’m cliwe y hayrn geiyrt orroo. 13Myr shoh vees my chorree er ny chooilleeney, as ver-ym er my yymmoose dy hannaghtyn orroo, as bee’m er my gherjaghey: as bee fys oc dy nee mish y Chiarn, t’er loayrt eh ayns my eulys, tra ta mee er ghoaill cooilleeney my yymmoose orroo. 14Ny-sodjey ver-ym naardey oo, as bee oo son oltooan mastey ny ashoonyn ta mygeayrt-y-mood, ayns y chilley ocsyn ooilley ta goll shaghey. 15Myr shen bee eh ny oltooan, as an-ghoo, as raaue, as yindys da ny ashoonyn ta mygeayrt-y-mood, tra neem’s my vriwnyssyn y chooilleeney ort’s, ayns corree, as ayns eulys, as ayns oghsan dewil; ta mish y Chiarn er loayrt eh. 16Tra lhig-yms orroo ny sideyn gyere dy ghortey, kiarit son y toyrt-mow oc, as shen ver-yms dy stroie shiu, as gowee yn ghortey niart erriu, as brish-yms bun nyn arran. 17Myr shen lhig-yms erriu yn ghortey, as drogh veishtyn, as ver ad oo naardey; as hed paitt as fuill dty hrooid, as ver-ym lhiam yn cliwe ort: ta mish y Chiarn er loayrt eh.