CAB. VI

1As haink goo yn Chiarn hym’s, gra, 2Vac y dooinney, soie dty eddin noi sleityn Israel, as jean phadeyrys nyn ’oï. 3As abbyr, Shiuish sleityn Israel, clasht-jee rish goo yn Chiarn Jee, Myr shoh ta’n Chiarn Jee dy ghra rish ny sleityn, as rish ny croink, rish ny awinyn, as rish ny glionteenyn, Cur-my-ner, ver-yms, dy jarroo ver-yms lhiam cliwe erriu, as nee’m ny ard-ynnydyn eu y stroie. 4As bee ny altaryn eu treigit, as bee ny jallooyn eu er ny vrishey: as neem’s ny deiney marroo eu y hilgey sheese kiongoyrt rish nyn yallooyn. 5As lhie-yms kirp marroo cloan Israel kiongoyrt rish ny jallooyn eu, as neem’s ny craueyn eu y skeayley mygeayrt ny altaryn eu. 6Ayns ooilley nyn ynnydyn-vaghee, bee ny ard-valjyn er nyn goyrt-mow, as bee ny ard-ynnydyn follym-faase: dy vod nyn altaryn ve er ny choyrt naardey, as treigit: as ny jallooyn eu ve er ny vrishey sheese as scuirr, as nyn go-chaslyssyn giarit sheese, as nyn obbraghyn cherraghtyn. 7As nee ny merriu tuittym sheese ayns y vean eu, as bee fys eu dy nee mish yn Chiarn.

8Ny-yeih nee’m fooilliagh y aagail, dy vod sluight ’ve eu shaghnys yn cliwe mastey ny ashoonyn, tra vees shiu er nyn skeayley trooid ny cheeraghyn. 9As nee ny scapailtee jiuish cooinaghtyn orrym’s, mastey ny ashoonyn, ayns cheer nyn gappeeys, er-yn-oyr dy vel mee seaghnit lesh nyn greeaghyn maarderagh, t’er nyn scarrey voym’s, as lesh nyn sooillyn, ta geiyrt er maarderys lurg nyn yallooyn: as ver ad dwoaie daue hene son ooilley ny huilk shen t’ad er n’yannoo, lesh ooilley nyn obbraghyn eajee. 10As bee fys oc dy nee mish y Chiarn, as nagh vel mee er ghra gyn oyr, dy jinnin yn kerraghey shoh y ghoaill orroo.

11Myr shoh ta’n Chiarn Jee dy ghra, Bwoaill dty vassyn, as stamp lesh dty chass, as abbyr, Ah treih! son ooilley peccaghyn eajee thie Israel: son tuittee ad liorish y chliwe, as yn ghortey, as y phaitt. 12Eshyn ta foddey jeh, yiow eh baase jeh’n phaitt, as eshyn ta er-gerrey nee eh tuittym liorish y chliwe, as eshyn ta er-mayrn ayns chennid yn ard-valley, yiow eh baase lesh gortey: myr shoh neem’s my eulys y chooilleeney orroo. 13Eisht bee fys eu, dy nee mish y Chiarn, tra vees nyn gheiney marroo mastey ny jallooyn eu ooilley mygeayrt nyn altaryn, er dagh cronk ard, er mullagh ooilley ny sleityn, as fo dy chooilley villey glass, as fo dy chooilley gharragh vanglaneagh, raad heb ad nyn oural dy hoar millish da ooilley ny jallooyn oc. 14Myr shen sheeyn-yms magh my laue orroo, as nee’m yn thalloo ny hraartys, eer ny s’melley na faasagh Diblath, ayns ooilley nyn gummallyn, as bee fys oc, dy nee mish y Chiarn.