CAB. VII

1Ny-sodjey haink goo yn Chiarn hym’s, gra, 2As uss, vac y dooinney, myr shoh ta’n Chiarn Jee dy ghra rish thalloo Israel, Ta jerrey, eer jerrey er jeet er kiare corneilyn y thallooin. 3Nish ta’n jerrey er jeet ort, as ver-ym magh my chorree dt’oï, as neem’s uss y vriwnys rere dty raaidyn, as goym kerraghey ort son ooilley dty obbraghyn eajee. 4As cha jean my hooill lhiggey lhiat, chamoo vees chymmey aym ort, agh neem’s dty raaidyn y chooilleeney ort, as bee dty pheccaghyn eajee cheu-sthie jeed, as bee fys eu dy nee mish y Chiarn. 5Myr shoh ta’n Chiarn Jee dy ghra, Yn olk, yn ynrycan olk, cur-my-ner, te er jeet. 6Ta jerrey er jeet, ta’n jerrey er jeet, te freayll arrey ort; cur-my-ner te er jeet. 7Ta’n moghrey er verraghtyn ort’s, O uss chummaltagh y thallooin, ta’n traa er jeet, ta’n laa trome er-gerrey, as cha nee sheean boggoil ny sleityn. 8Nish neem’s dy gerrit my yymmoose y gheayrtey magh ort, as my chorree y chooilleeney ort, as neem’s uss y vriwnys cordail rish dty raaidyn, as goym kerraghey ort son ooilley dty obbraghyn eajee. 9As cha jean my hooill lhiggey lhiat, chamoo vees chymmey aym ort; cooilleen-yms oo cordail rish dty raaidyn, as ny peccaghyn eajee ta cheu-sthie jeed, as bee fys eu, dy nee mish y Chiarn ta dy woalley shiu. 10Cur-jee my-ner yn laa, cur-jee my-ner te er jeet, ta’n moghrey er n’gholl magh, ta’n clatt er vlaaghey, ta moyrn er chur magh. 11Ta tranlaase er n’irree seose dy ve lorg-reill dy vee-chairys: cha bee veg jeu er-mayrn jeh nyn earroo mooar, ny veg lhieu, chamoo vees dobberan er nyn son. 12Ta’n traa er jeet, ta’n laa tayrn er-gerrey, ny lhig da’n kionneyder goaill boggey, ny’n creckeyder dobberan: son ta jymmoose er y slane sheshaght. 13Son cha jig yn creckeyder stiagh reesht er shen t’eh er chreck, ga dy vel ad foast bio: son ta’n ashlish bentyn rish slane pobble, nagh jean chyndaa reesht: chamoo nee fer erbee eh-hene y niartaghey ayns mee-chairys e vea. 14T’ad er heidey yn trumpet, eer son ooilley dy ve aarloo, agh cha vel fer goll magh gys y chaggey: son ta my yymmoose er y slane ymmodee jeu. 15Ta’n cliwe cheu-mooie, as y phaitt, as yn ghortey cheu-sthie, eshyn t’ayns y vagher, yiow eh baase liorish y chliwe: as eshyn t’ayns yn ard-valley, nee gortey as paitt ad y stroie.

16Agh adsyn chosnys roue, nee ad scapail, as bee ad er ny sleityn cooagey myr calmaneyn, as ad ooilley dobberan dagh unnane son e vee-chairys. 17Bee dy chooilley laue faase, as dy chooilley ghlioon lhag myr ushtey. 18Nee ad myrgeddin ad-hene y chryssey lesh aanrit-sack, as nee atchim ad y choodaghey, as bee nearey er dy chooilley eddin, as meaylid er dy chooilley chione. 19Nee ad nyn argid y hilgey ersooyl ayns ny straïdyn, as bee nyn airh goit voue: cha vod nyn argid, ny nyn airh ad y livrey ayns laa jymmoose y Chiarn: cha jean ad nyn anmeenyn y yannoo magh, ny nyn gallinyn y lhieeney: son t’ad shoh oyr nyn duittym ayns mee-chairys.

20Er son aalid e choamrey, hrog eshyn eh ayns ard-ooashley; agh hoie adsyn seose nyn yallooyn eajee ayn, as nyn gaslyssyn dwoaiagh: shen-y-fa ta mee er scughey foddey voue eh. 21As livrey-yms eh gys laueyn joarreeyn son cragh, as gys mee-chrauee yn thallooin son spooilley, as nee ad eh an-chasherick. 22My eddin neem’s y hyndaa myrgeddin voue, as sollee ad my ynnyd’s smoo casherick: son hed roosteyryn stiagh ayn, as nee ad eh an-chasherick.

23Jean-jee geuley: son ta’n thalloo lane dy pheccaghyn folley, as ta’n ard-valley lane dy hranlaase. 24Shen-y-fa ver-ym lhiam y chooid smessey jeh ny ashoonee, as gowee ad ny thieyn oc daue hene: ver-yms sheese myrgeddin mooaralys y vooinjer niartal, as bee nyn ynnydyn casherick ny chaitnys. 25Ta’n chragh cheet, as shirree ad lurg shee, agh cha bee eh ry-gheddyn. 26Hig lhag-haghyrt er lhag-haghyrt, as naightyn trome er naightyn trome; eisht nee ad shirrey son ashlish yn adeyr: agh nee yn leigh cherraghtyn veih yn saggyrt, as coyrle veih yn chanstyr. 27Nee yn ree dobberan, as bee yn prince er ny choodagh lesh traartys, as bee laueyn pobble y cheer er ny lhaggaghey: neem’s y yannoo roosyn cordail rish nyn raaidyn, as cordail rish nyn doilliu neem’s ad y vriwnys, as yiow ad fys dy nee mish y Chiarn.