CAB. VIII

1As haink eh gy-kione ayns y cheyoo vleïn, ayns y cheyoo vee, er y wheiggoo laa jeh’n vee, myr hoie mee ayns my hie, as shanstyr Yudah soie kiongoyrt rhym, dy huitt laue yn Chiarn orrym ayns shen. 2Eisht yeeagh mee, as cur-my-ner co-chaslys ayns cummey aile: veih e vean sheese, v’eh aile; as veih e vean seose, casley rish sollyssid, myr cullyr yn amber. 3As heeyn eh magh cummey jeh laue, as ghow eh mee er skeog my ching, as hrog yn spyrryd mee seose eddyr y thalloo as yn aer, as hug eh lesh mee ayns ashlishyn Yee gys Jerusalem, gys dorrys yn yiat sodjey stiagh, ta jeeaghyn lesh y twoaie, raad va stoyl yn jalloo dy eadolys, ta dy vrasnaghey gys eadolys. 4As cur-my-ner va gloyr Yee Israel ayns shen, cordail rish yn ashlish honnick mee ayns y choan.

5Eisht dooyrt eh rhym, Vac y dooinney, trog seose dty hooillyn nish lesh ard y twoaie: myr shen hrog mee seose my hooillyn lesh y twoaie, as cur-my-ner my-hwoaie ec giat yn altar, va’n jalloo shoh dy eadolys ec y dorrys. 6Dooyrt eh ny-sodjey rhym, Vac y dooinney, vel oo fakin cre t’ad mysh? eer ny obbraghyn eajee ta thie Israel cur-rish ayns shoh, dy chur orrym scughey foddey jeh veih my ynnyd’s casherick? agh chyndaa uss foast reesht, as nee oo eajeeys smoo y akin.

7As hug eh lesh mee gys dorrys ny cooyrtey; as tra yeeagh mee, cur-my-ner, towl ayns y voalley. 8Eisht dooyrt eh rhym, Vac y dooinney, jean baarney nish ’sy voalley, as tra va mee er chleigh stiagh ’sy voalley, cur-my-ner dorrys. 9As dooyrt eh rhym, Immee stiagh, as cur uss my-ner yn eajeeys mee-chrauee t’ad dy yannoo ayns shoh. 10Myr shoh hie mee stiagh, as yeeagh mee, as cur-my-ner dy chooilley cho-chaslys jeh reddyn snauee, as maase dwoaiagh, as ooilley jallooyn thie Israel, cowrit er y voalley ooilley mygeayrt. 11As hass kiongoyrt roo three-feed as jeih deiney jeh shanstyr thie Israel, as ayns y vean oc hass Jaazaniah mac Shaphan, dagh dooinney lesh e henser ny laue, as hrog bodjal choo dy incense seose voue. 12Eisht dooyrt eh rhym, Vac y dooinney, vel oo er vakin shen ny ta shanstyr thie Israel dy yannoo ’sy dorraghys, dagh dooinney ayns shamyryn nyn yallooyn hene? son t’ad gra, Cha vel y Chiarn fakin shin, ta’n Chiarn er hreigeil y cheer.

13Dooyrt eh rhym myrgeddin, Chyndaa uss foast reesht, as nee oo fakin eajeeys foddey smoo t’ad dy yannoo. 14Eisht hug eh lesh mee gys dorrys giat thie yn Chiarn my-hwoaie, as cur-my-ner, ayns shen va ny hoie mraane dobberan son Tammuz.

15Eisht dooyrt eh rhym, Vel oo er vakin shoh, O vac y dooinney? chyndaa uss foast reesht, as ver oo my-ner eajeeys smoo na ad shoh. 16Eisht hug eh lesh mee gys y chooyrt sodjey stiagh jeh thie yn Chiarn, as cur-my-ner, ec dorrys chiamble y Chiarn, eddyr y phorch as yn altar, va mysh queig deiney as feed, as nyn ghreeym er chiamble y Chiarn, as nyn oaie lesh y niar, as hug ad ooashley da’n ghrian lesh y niar.

17Eisht dooyrt eh rhym, Vel oo er vakin shoh, O vac y dooinney? nee red eddrym eh da thie Yudah, dy vel ad cur-rish lheid yn eajeeys, as t’ad dy yannoo ayns shoh? son t’ad er lhieeney yn thalloo lesh tranlaase, as t’ad er chur cooyl rhym, dy my vrasnaghey; as cur-my-ner ta’n broïd oc er chur feoh aynym. 18Shen-y-fa neem’s myrgeddin dellal roosyn ayns jymmoose; cha jean my hooill gymmyrkey lhieu, chamoo vees chymmey aym orroo: as ga dy vel ad geamagh ayns my chleayshyn lesh ard-choraa, ny-yeih cha der-ym clashtyn daue.