CAB. IX

1Deïe eh myrgeddin ayns my chlashtyn lesh ard-choraa, gra, Lhig dauesyn ta currym yn ard-valley orroo, tayrn er-gerrey, eer dy chooilley ghooinney lesh e ghreïe ghunveragh ny laue. 2As cur-my-ner, haink shey deiney veih raad y yiat syrjey ta lesh y twoaie, as dy chooilley ghooinney lesh greïe-chaggee ny laue: as va un dooinney ny mast’ oc v’er ny choamrey lesh aanrit, lesh inkhorn scrudeyr rish e lhiattee, as hie ad stiagh, as hass ad liorish yn altar prashey. 3As hie gloyr Yee Israel seose veih yn cherub raad v’eh, gys dorrys thie [Yee] as deïe eh er y dooinney, v’ayns coamrey aanrit, echey va’n inkhorn scrudeyr ry-lhiattee. 4As dooyrt y Chiarn rishyn, Immee trooid mean yn ard-valley, trooid mean Yerusalem, as soie cowrey er glaare eddin ny deiney shen, ta gosnaghey, as gaccan son ooilley ny obbraghyn dwoaiagh t’er ny yannoo cheu-sthie j’ee.

5As rish yn vooinjer elley dooyrt eh ayns my chlashtyn, Gow-jee geiyrt ersyn trooid yn ard-valley, as bwoaill-jee: ny lhig da nyn sooill sparail, chamoo gow-jee chymmey jeu. 6Stroie-jee dy bollagh shenn as aeg, chammah moidynyn as cloan veggey, as mraane: agh ny tar-jee coair dooinney erbee ta cowrit; as gow-jee toshiaght ec my ynnyd casherick: eisht, ghow ad toshiaght rish y chenndeeaght va kiongoyrt rish y thie. 7As dooyrt eh roosyn, Lhieen-jee yn thie lesh broïd, as ny cooyrtyn lesh ny merriu: immee-jee magh: as hie ad magh, as varr ad ayns yn ard-valley.

8As haink eh gy-kione myr v’ad dy stroie ad, as mish faagit, dy huitt mee er my eddin, as deïe mee, as dooyrt mee, Ah Hiarn Yee! jean uss ooilley ny ta faagit jeh Israel y stroie, ayns deayrtey magh dty eulys er Jerusalem? 9Eisht dooyrt eh rhym, Ta mee-chraueeaght thie Israel as Judah erskyn-earroo mooar, as ta’n cheer roie harrish lesh fuill, as ta’n ard-valley lane dy vee-chairys: son t’ad gra, Ta’n Chiarn er hreigeil y thalloo, as cha vel y Chiarn cur-my-ner. 10As er my hon’s myrgeddin, cha jean my hooill sparail, chamoo goym erreeish, agh neem’s nyn raad y chooilleeney er nyn ghing hene. 11As cur-my-ner, yn dooinney v’er ny choamrey lesh aanrit, as inkhorn ry-lhiattee, hoilshee eh yn chooish, gra, Ta mee er n’yannoo myr doardee oo dou.