CAB. X

1Nish, lurg da Ezra v’er ghoaill padjer, as er ghoaill rish yn peccah shoh, dobberan, as lhie er y thalloo, kiongoyrt rish thie Yee, haggil huggey ass Israel sheshaght feer vooar dy gheiney, as mraane, as cloan: son ren y pobble keayney dy sharroo. 2As dreggyr Shechaniah mac Jehiel, fer jeh mec Elam, as dooyrt eh rish Ezra, Ta shin er n’yannoo peccah noi’n Jee ain, as er n’ghoaill mraane joarree jeh pobble y cheer: nish ta treishteil foast ayns Israel, mychione y chooish shoh. 3Nish er-y-fa shen, lhig dooin conaant y yannoo rish y Jee ain, dy chur ersooyl ooilley ny mraane, as y chloan ta ruggit jeu, cordail rish coyrle my hiarn, as y choyrle ocsyn t’er-creau ec sarey’n Jee ain: as lhig da ve jeant cordail rish y leigh. 4Trog ort, son ta’n chooish shoh bentyn dhyt: bee mayd myrgeddin mayrt; bee dunnal, as jean eh. 5Eisht dirree Ezra, as hug eh er ny ard-saggyrtyn, ny Leviteyn, as ooilley Israel loo, dy jinnagh ad cordail rish y goo shoh. As ren ad breearrey.

6Eisht dirree Ezra seose kiongoyrt rish thie Yee, as hie eh stiagh ayns shamyr Yohanan mac Eliashib; as tra haink eh gys shen, cha d’ee eh arran, chamoo diu eh ushtey: son ren eh dobberan kyndagh rish drogh-yannoo cloan y chappeeys. 7As ren ad fockley magh order, trooid Judah as Jerusalem, da ooilley cloan y chappeeys, dy haglym ad-hene cooidjagh ec Jerusalem; 8As quoi-erbee nagh darragh cheu-sthie jeh three laa, cordail rish coyrle ny princeyn as y chanstyr, dy beagh ooilley e chooid goit seose, as eh-hene giarit magh veih sheshaght cloan y chappeeys.

9Eisht haggil ooilley deiney Yudah as Venjamin ad-hene cooidjagh ec Jerusalem, cheu-sthie jeh three laa: ve er y nuyoo vee, as y feedoo laa jeh’n vee, as hoie ooilley’n pobble ayns straid thie Yee, er-creau son y chooish shoh, as son y fliaghey trome. 10As hass Ezra yn saggyrt seose, as dooyrt eh roo, Ta shiu er vrishey’n leigh, liorish goaill mraane joarree, dy vishaghey peccah Israel. 11Nish er-y-fa shen, gow-jee rish nyn beccaghyn gys y Chiarn, Jee nyn ayraghyn, as jean-jee e aigney, as scarr-jee shiu hene veih pobble y cheer, as veih mraane joarree. 12Eisht dreggyr ooilley’n cheshaght, as dooyrt ad lesh ard choraa, Myr t’ou er ghra, shen myr shegin dooin jannoo. 13Agh ta’n pobble ymmodee, as ta’n emshyr feer fluigh, as cha vel shin abyl shassoo mooie, chamoo ta shoh obbyr laa ny jees, son ta shin ymmodee t’er ny ve kyndagh ’sy chooish shoh. 14Lhig da nish fir-reill y slane sheshaght shassoo dy vriwnys, as lhig dauesyn ooilley t’er ghoaill mraane joarree ayns ny ard-valjyn ain cheet ec y traa pointit, as mâroosyn shanstyr dy chooilley ard-valley, as ny briwnyn, derrey vees jymmoose hrome y Jee ain son y chooish shoh chyndaït voïn.

15Jonathan mac Asahel, as Jahaziah mac Tikvah, va ny ynrycan briwnyn ayns y chooish shoh; as ren Meshullam as Shabbethai y Levite cooney lhieu. 16As ren cloan y chappeeys myr shen: as ren Ezra yn saggyrt marish paart jeh’n chanstyr son thie nyn ayraghyn, as dagh unnane oc liorish nyn ennym v’er nyn bointeil, soie sheese er y chied laa jeh’n jeihoo vee dy eysht y chooish. 17As hug ad jerrey er, roosyn ooilley v’er ghoaill mraane joarree, er y chied laa jeh’n chied vee.

18As mastey mec ny saggyrtyn, v’er ny gheddyn dy row paart er ghoaill mraane joarree; ta shen jeh mec Yeshua, mac Yozadak as e vraaraghyn; Maaseiah, as Eliezer, as Jarib, as Gedaliah. 19As hug ad nyn laueyn, dy jinnagh ad ersooyl nyn mraane, as myr v’ad oolee, heb ad rea jeh’n chioltane son nyn loght. 20As jeh mec Immer; Hanani as Zebadiah. 21As jeh mec Harim; Maaseiah, as Elijah, as Shemaiah, as Jehiel, as Uzziah. 22As jeh mec Pashur; Elioenai, Maaseiah, Ishmael, Nethaneel, Jozabad, as Elasah. 23Myrgeddin, jeh ny Leviteyn; Jozabad, as Shimei, as Kelaiah, (yn er cheddin Kelita) Pethahiah, Judah, as Eliezer. 24Jeh ny fir-chiaullee; Eliashib: as jeh ny porteryn; Shallum, as Telem, as Uri. 25Ny-sodjey jeh Israel: jeh mec Parosh; Ramiah, as Jeziah, as Malchiah, as Miamin, as Eleazar, as Malchijah, as Benaiah. 26As jeh mec Elam; Mattaniah, Zechariah, as Jehiel, as Abdi, as Jeremoth, as Eliah. 27As jeh mec Zattu; Elioenai, Eliashib, Mattaniah, as Jeremoth, as Zabad, as Aziza. 28Jeh mec Bebai myrgeddin; Jehohanan, Hananiah, Zabbai, as Athlai. 29As jeh mec Bani; Meshullam, Malluch, as Adaiah, Jashub, as Sheal, as Ramoth. 30As jeh mec Pahath-moab; Adna, as Chelal, Benaiah, Maaseiah, Mattaniah, Bezaleel, as Binnui, as Manasseh. 31As jeh mec Harim; Eliezer, Ishijah, Malchiah, Shemaiah, Shimeon, 32Benjamin, Malluch, as Shemariah. 33Jeh mec Hashum; Mattenai, Mattathah, Zabad, Eliphelet, Jeremai, Manasseh, as Shimei. 34Jeh mec Bani; Maadai, Amram, as Uel, 35Benaiah, Bedeiah, Chelluh, 36Vaniah, Meremoth, Eliashib, 37Mattaniah, Mattenai, as Jaasau, 38As Bani, as Binnui, Shimei, 39Shelemiah, as Nathan, as Adaiah, 40Machnadebai, Sheshai, Sharai, 41Azareel, as Shelemiah, Shemariah, 42Shallum, Amariah, as Joseph. 43Jeh mec Nebo; Jehiel, Mattithiah, Zabad, Zebina, Jadau, as Joel, Benaiah, 44V’ad shoh ooilley er ghoaill mraane joarree, as rish paart jeu va cloan oc.