CAB. III

1Er y chiaghtoo vee, tra va cloan Israel ec fea ayns ny baljyn, ren y pobble ad-hene y haglym cooidjagh, myr un dooinney, ec Jerusalem. 2Eisht hass seose Jeshua mac Yozadak, as e vraaraghyn ny saggyrtyn, as Zerubbabel mac Shealtiel, as e vraaraghyn, as hrog ad altar Yee Israel, dy hebbal ourallyn-losht er, myr te scruit ayns leigh Voses, dooinney Yee. 3As hoie ad yn altar er e ghrunt hene, (ga dy row ad ayns aggle roish sleih ny cheerey) as heb ad er ourallyn-losht gys y Chiarn, moghrey as fastyr. 4Dreill ad myrgeddin feailley ny cabbaneyn, cordail rish y leigh, as heb ad ny ourallyn-losht gagh-laa rere nyn earroo, cordail rish y cliaghtey, myr va currym gagh-laa dy hirrey. 5As lurg shen heb ad yn oural-losht kinjagh, chammah jeh ny eaystyn-noa, as jeh ooilley feaillaghyn pointit y Chiarn, v’er ny chasherickey, as jeh dy chooilley unnane va chebbal dy aggindagh oural-arryltagh gys y Chiarn. 6Veih’n chied laa jeh’n chiaghtoo vee ghow ad toshiaght dy hebbal ourallyn-losht gys y Chiarn, agh cha row undin chiamble y Chiarn foast er ny hoiaghey. 7Hug ad argid myrgeddin da ny masoonee as ny seiyr, as bee, as jough, as ooil dauesyn jeh Zidon, as dauesyn jeh Tyre, dy choyrt lhieu biljyn-cedar veih Lebanon gys faarkey Joppa; cordail rish sarey Cyrus ree Phersia.

8Nish, ayns y nah vleïn lurg daue v’er jeet dy hroggal thie Yee ec Jerusalem, ayns y nah vee, ghow Zerubbabel mac Shealtiel toshiaght marish Jeshua mac Yozadak, as y chooid elley jeh nyn mraaraghyn, ny saggyrtyn, as ny Leviteyn, as ooilley ny v’er jeet ass y chappeeys gys Jerusalem, as doardee ad ny Leviteyn, veih feed bleïn dy eash, as erskyn, dy choyrt er y hoshiaght obbyr thie’n Chiarn: 9Eisht hass Jeshua, marish e vec as e vraaraghyn, Kadmiel as e vec, mec Yudah lesh y cheilley, dy choyrt er nyn doshiaght ny obbreeyn ayns thie Yee: mec Henadad, marish nyn mec as nyn mraaraghyn ny Leviteyn. 10As myr va ny masoonee layal undin chiamble y Chiarn, hass ny saggyrtyn ayns nyn goamraghyn, lesh trumpetyn, as ny Leviteyn mec Asaph lesh cymballyn, dy choyrt moylley da’n Chiarn, lurg oardagh Ghavid ree Israel. 11As hie ad lesh arraneyn-moyllee gansoor y cheilley, coyrt moylley as booise da’n Chiarn; er-yn-oyr dy vel eh graysoil, son ta e vyghin farraghtyn son dy bragh gys Israel. As dyllee ooilley’n pobble lesh ard choraa, tra hug ad moylley da’n Chiarn, er-yn-oyr dy row undin thie’n Chiarn layit. 12Agh ren ymmodee jeh ny saggyrtyn as Leviteyn, as ny ard-ayraghyn, ny shenn gheiney v’er vakin y chied chiamble, tra va undin y thie shoh layit kiongoyrt rish nyn sooillyn, keayney lesh ard choraa, choud as va ymmodee elley gyllagh dy ard son boggey. 13Myr shen nagh voddagh y pobble baght y ghoaill jeh feiyr yn eam son boggey, shaghey feiyr yn yllagh son trimshey: son dyllee yn pobble lesh ard choraa, as va’n feiyr er ny chlashtyn foddey jeih.