CAB. V

1Eisht ren ny phadeyryn, Haggai y phadeyr, as Zechariah mac Iddo, phadeyrys da ny Hewnyn v’ayns Judah, as Jerusalem, ayns ennym Yee Israel, eer dauesyn. 2Eisht dirree seose Zerubbabel mac Shealtiel, as Jeshua mac Yozadak, as ghow ad toshiaght dy hroggal thie Yee, t’ec Jerusalem; as va phadeyryn Yee cur ad er nyn doshiaght.

3Ec y traa cheddin haink huc Tatnai, kiannoort er cheu shoh jeh’n awin, as Shethar-bosnai, as ny sheshaghyn oc, loayr ad roo er yn aght shoh, Quoi doardee diu dy hroggal y thie shoh, as dy yannoo mie yn voalley shoh? 4As dênee ad ny-sodjey, Cre ta enmyn ny deiney, ta cur yn obbyr shoh er y hoshiaght? 5Agh va sooill y Jee oc harrish shanstyr ny Hewnyn, nagh voddagh ad shoh cur orroo scuirr, derrey harragh y chooish gys Darius: as dy voghe ad ansoor ayns screeuyn, mychione y chooish shoh.

6Copy jeh’n screeuyn, ren Tatnai kiannoort er cheu shoh jeh’n awin, as Shethar-bosnai, as e heshaghyn ny Apharsachiteyn, er cheu shoh jeh’n awin, y choyrt gys Darius y ree. 7Hug ad screeuyn huggey ayns ny goan shoh: Gys Darius y ree, dy row slane shee. 8Lhig da fys ’ve ec y ree, dy jagh shin gys cheer Yudea, gys thie yn ard Jee, ta troggit lesh claghyn mooarey, as ta fuygh soit ayns ny voallaghyn, as ta’n obbyr goll chion er y hoshiaght, as bishaghey ayns nyn laueyn. 9Eisht dênee shin jeh ny shanstyryn shen, as dooyrt shin roo er yn aght shoh, Quoi doardee diuish dy hroggal y thie shoh, as dy yannoo seose ny voallaghyn shoh? 10Dênee shin son nyn enmyn myrgeddin, dy choyrt shickyrys dhyt, dy voddagh shin cur stiagh enmyn ny deiney va nyn leeideilee. 11As shoh’n ansoor hug ad dooin, Ta shinyn sharvaantyn y Jee chroo niau as thalloo, as cha vel shin agh troggal reesht y thie, va troggit ymmodee bleeantyn er-dy-henney, ren ree mooar ayns Israel troggal, as soiaghey seose. 12As lurg da nyn ayraghyn v’er vrasnaghey Jee t’ayns niau gys corree, livrey eh ad gys laue Nebuchadnezzar ree Vabylon, yn Chaldean, ren y thie cheddin y stroie, as hug lesh y pobble ersooyl gys Babylon. 13Agh ayns y chied vleïn jeh Cyrus ree Vabylon, ren y ree Cyrus cheddin decree, dy hroggal y thie shoh dy Yee. 14As siyn airh as argid thie Yee, va Nebuchadnezzar er ghoaill ass y chiamble v’ayns Jerusalem, as er chur lesh ad gys chiamble Vabylon, ad shen, ren Cyrus y ree goaill ass chiamble Vabylon, as v’ad er nyn livrey gys fer va enmyssit Sheshbazzar, eh v’er n’yannoo ny chiannoort. 15As dooyrt eh rish, Gow ny siyn shoh, immee royd, as cur lhiat ad gys y chiamble t’ayns Jerusalem, as lhig da thie Yee ve troggit er e ghrunt hene. 16Eisht, haink Sheshbazzar cheddin, as hoie eh undin thie Yee t’ayns Jerusalem. As er-dyn traa shen, eer derrey nish, te er ny ve ayns troggal, as cha vel foast kione er. 17Nish er-y-fa shen, my s’gooidsave lesh y ree, lhig da ronsagh ve jeant ayns thie recortyssyn y ree, t’ayns Babylon, nee myr shoh te, dy row decree jeant liorish Cyrus y ree, dy hroggal y thie shoh son Jee ec Jerusalem, as lhig da’n ree soilshaghey dooin e aigney, ayns y chooish shoh.