CAB. VI

1Eisht doardee Darius y ree, ronsagh dy ve jeant ayns thie ny lioaryn, raad va ny tashtaghyn freilt ayns Babylon. 2As va lioar er ny gheddyn, ec Achmetha, ayns y phlaase t’ayns cheer ny Medeyn, as ayn va’n recort shoh scruit: 3Ayns y chied vleïn jeh Cyrus y ree, ren Cyrus y ree cheddin decree mychione thie Yee ec Jerusalem, Lhig da’n thie ve troggit, yn ynnyd raad heb ad ourallyn, as lhig da ny undinyn echey ve soit dy lajer, yn yrjid echey three-feed cubit, as y lheead echey three-feed cubit. 4Lesh three roaghyn dy chlaghyn mooarey, as roa dy fuygh noa: as lhig da’n cost ve lowit ass thie’n ree. 5As myrgeddin, lhig da ny siyn airh as argid v’ayns thie Yee, va Nebuchadnezzar er ghoaill ass y chiamble ec Jerusalem, as er choyrt lesh gys Babylon, v’er ny livrey seose, as er nyn goyrt lhieu reesht gys y chiamble ec Jerusalem, dagh saagh gys e ynnyd hene, as soie-jee ad ayns thie Yee. 6Nish er-y-fa shen, shiuish Tatnai, kiannoort cheu elley jeh’n awin, Shethar-bosnai, as y cheshaght eu, ny Apharsachiteyn ta cheu elley jeh’n awin, freill-jee shiu hene foddey voue. 7Faag-jee veue obbyr y thie shoh dy Yee, lhig da kiannoort ny Hewnyn, as shanstyr ny Hewnyn troggal y thie shoh dy Yee, er e ghrunt hene. 8Ny-sodjey, ta mee jannoo decree, cre nee shiuish y yannoo son shanstyr ny Hewnyn shoh, gour troggal y thie shoh dy Yee: dy bee cost yn obbyr shoh er ny yannoo mie ass cooid y ree, eer ass ny keeshyn cheu elley jeh’n awin, ass laue dy ve eeckit da ny deiney shoh nagh bee ad er nyn lhiettal. 9As cre-erbee vees ad feme, edyr ad ’ve dew aegey, ny reaghyn, ny eayin, son ourallyn-losht gys Jee t’ayns niau, ny curnagh, ny sollan, ny feeyn, ny ooil, lhig da v’er ny choyrt daue gyn failleil laa lurg laa, lurg oardagh ny saggyrtyn, t’ayns Jerusalem. 10Dy vod ad chebbal ourallyn dy hoar millish gys Jee niau, as padjer y ghoaill son bioys y ree as e vec. 11Ta mee myrgeddin er n’yannoo decree, Quoi-erbee hed noi’n order shoh, lhig da fuygh ve raipit neose jeh e hie, as soit seose: lhig da hene ve croghit er, as e hie ve jeant ny horran son shoh. 12As dy jean y Jee, ta’n ennym echey er ny ooashlaghey ayns shen, stroie dy chooilley ree as pobble, ver nyn laue dy chaghlaa, ny dy stroie yn thie shoh dy Yee, t’ec Jerusalem: ta mish Darius er n’yannoo decree, lhig da ve chelleeragh cooilleenit.

13Eisht ren Tatnai yn kiannoort er cheu shoh jeh’n awin, Shethar-bosnai as ny sheshaghyn oc, dy tappee cordail rish shen va Darius y ree er harey. 14As ghow shanstyr ny Hewnyn yn obbyr ayns laue, as hie ad er nyn doshiaght, greinnit liorish phadeyrys Haggai yn phadeyr, as Zechariah mac Iddo: as hrog ad y thie, as hug ad mullagh er, cordail rish sarey Yee Israel, as cordail rish decree Cyrus as Darius, as Artaxerxes ree Phersia. 15As va’n thie slane troggit er y trass laa jeh mee Adar, ’sy cheyoo vleïn jeh reill Darius y ree. 16As ren cloan Israel, ny saggyrtyn, as ny Leviteyn, as y chooid elley jeh cloan y chappeeys, freayll yn feailley son casherickey thie Yee lesh boggey. 17As heb ad ec casherickey yn thie shoh dy Yee, keead dow, daa cheead rea, kiare cheead eayn; as son oural-peccah ayns lieh ooilley Israel, daa ghoayr jeig fyrryn, cordail rish earroo tribeyn Israel. 18As hoie ad ny saggyrtyn ayns nyn order, as ny Leviteyn ayns nyn goorse, son shirveish thie Yee, ayns Jerusalem, myr te scruit ayns lioar Voses. 19As dreill cloan y chappeeys feailley ny caisht, er y chiarroo laa yeig jeh’n chied vee. 20Son va ooilley ny saggyrtyn as ny Leviteyn er n’yannoo ad-hene aarloo, lesh glennid dy reaylley’n feailley, as varr ad yn eayn-caisht, son ooilley cloan y chappeeys, as son nyn mraaraghyn ny saggyrtyn, as er nyn son hene. 21As ren cloan Israel, v’er jyndaa reesht veih’n chappeeys gee jeh, mâroosyn neesht v’er dreigeil cliaghtaghyn neu-ghlen ashoonee ny cheerey, dy hirveish y Chiarn Jee Israel. 22As dreill ad feailley yn arran-millish shiaght laa lesh boggey, son va’n Chiarn er choyrt daue gennallys liorish chyndaa cree ree Assyria huc, dy niartaghey nyn laueyn ayns obbyr thie Yee, Jee Israel.