CAB. VII

1Nish lurg ny reddyn shoh, ayns reill Artaxerxes ree Phersia, Ezra mac Seraiah, mac Azariah, mac Hilkiah, 2Mac Shallum, mac Zadok, mac Ahitub, 3Mac Amariah, mac Azariah, mac Meraioth, 4Mac Zerahiah, mac Uzzi, mac Bukki, 5Mac Abishua, mac Phinehas, mac Eleazar, mac Aaron yn ard-saggyrt. 6Hie Ezra shoh seose veih Babylon, as v’eh ny scrudeyr slane ynsit ayns leigh Voses, va’n Chiarn Jee Israel er harey: as hug y ree daa ooilley e yeearree, myr va laue yn Chiarn e Yee mârish. 7As hie paart jeh cloan Israel, as jeh ny saggyrtyn, as ny Leviteyn, ny fir-chiaullee, ny porteryn, as ny Nethinimee seose gys Jerusalem, ayns y chiaghtoo vleïn jeh Artaxerxes y ree. 8As haink eh gys Jerusalem ayns y wheiggoo vee, ’sy chiaghtoo vleïn jeh reill y ree. 9Son er y chied laa, jeh’n chied vee, ren eh toshiaght er e yurnah veih Babylon, as er y chied laa jeh’n wheiggoo vee haink eh gys Jerusalem, myr va laue vie e Yee mârish. 10Son va Ezra er hoiaghey e chree, dy hoiggal leigh’n Chiarn, as dy chooilleeney eh, as dy ynsaghey ayns Israel slattyssyn as briwnyssyn.

11Nish shoh copy jeh’n screeuyn hug Artaxerxes y ree da Ezra, yn saggyrt, yn scrudeyr, eer scrudeyr ayns goan annaghyn y Chiarn, as e lattyssyn da Israel. 12Artaxerxes, ree dy reeaghyn, Gys Ezra, yn saggyrt, scrudeyr slane ynsit ayns leigh Yee t’ayns niau, shee dy row hood, as ec lheid y traa. 13Ta mee jannoo decree, adsyn ooilley ta jeh pobble Israel, as ny saggyrtyn, as ny Leviteyn, ayns my rheam, ta booiagh jeh nyn aigney arryltagh hene, dy gholl gys Jerusalem, dy jed ad mayrt. 14Son wheesh as dy vel uss er dty choyrt liorish y ree; as ny shiaght fir-choyrlee echey, dy vriaght mychione Judah as Jerusalem, cordail rish leigh dty Yee t’ayns dty laue: 15As dy chur lhiat yn argid as yn airh, ta’n ree as ny fir-choyrlee echey er hebbal dy arryltagh gys Jee Israel, yn ynnyd-vaghee echey t’ayns Jerusalem, 16As ooilley’n argid as yn airh, oddys oo troggal trooid slane rheam Vabylon, marish oural-arryltagh y pobble, as ny saggyrtyn, chebbal dy aggindagh gour thie’n Jee oc t’ayns Jerusalem: 17Dy vod oo kionnaghey ass laue lesh yn argid shoh, dew, reeaghyn, eayin, marish nyn ourallyn-arran, as nyn ourallyn-feeyney, dy hebbal ad er altar thie’n Jee eu ayns Jerusalem: 18As cre-erbee hee oo hene as dty vraaraghyn cooie dy yannoo rish yn chooid elley jeh’n argid, as yn airh, jean-jee shen lurg aigney yn Jee eu. 19Ny siyn myrgeddin, t’er ny choyrt dhyt son shirveish thie dty Yee, lhig daue v’er nyn livrey stiagh, fenish Yee ec Jerusalem. 20As cre-erbee sodjey vees ymmyrchagh son thie dty Yee, vees feme ad dy vaarail, bee eh lowit ass thie-tashtee yn ree. 21As ta mish, eer mee hene Artaxerxes y ree, cur magh sarey da ooilley ny resowryn ta cheu elley jeh’n awin, cre-erbee hirrys Ezra yn saggyrt, scrudeyr ayns leigh Yee flaunys, erriu, dy bee eh jeant ass laue; 22Choud’s keead talent dy argid as keead towse dy churnagh, as gys keead saagh feeyney, as keead saagh dy ooil, as sollan gyn towse. 23Cre-erbee t’er n’oardaghey liorish Jee t’ayns niau, lhig da ve jeant dy kiaralagh, son thie Yee niau: son cre’n-fa veagh jymmoose [Yee] noi rheam y ree as e vec. 24Ta shin myrgeddin cur currym erriu, mychione ooilley ny saggyrtyn as Leviteyn, ny fir-chiaullee, ny porteryn, ny Nethinimee, ny shirveishee thie Yee, cha bee eh lowal dy hroggal jeu mayle, keesh, ny custom. 25As uss Ezra, lurg creenaght dty Yee, t’ayns dty laue, jean soiaghey seose fir-oik, as briwnyn, dy vriwnys ooilley’n pobble t’er cheu elley jeh’n awin, ooilley lheid as ta toiggal leighyn dty Yee, as ynsee adsyn nagh vel toiggal ad. 26As quoi-erbee nagh der biallys da leigh dty Yee, as leigh yn ree, lhig da briwnys jeeragh ve cooilleenit er, edyr y ve gys baase, ny gys eebyrtys, ny gys goaill seose e chooid, ny gys pryssooney.

27Bannit dy row Chiarn Jee nyn ayraghyn, t’er choyrt lheid y red shoh ayns cree y ree, dy hoiaghey magh dy stoamey thie’n Chiarn, t’ayns Jerusalem. 28As t’er heeyney magh e vyghin orrym’s kiongoyrt rish y ree as e ir-choyrlee, as kiongoyrt rish ooilley ard phrinceyn y ree: as va mee er my niartaghey myr va laue vie’n Chiarn my Yee orrym; as haggil mee cooidjagh ass Israel, ard-gheiney dy gholl seose mârym.