CAB. V

1Shass-jee shickyr er-y-fa shen ’sy reamys ta Creest er chosney dooin, as ny bee-jee kianlt reesht fo’n whing dy vondiaght. 2Cur-jee my-ner, ta mish Paul dy ghra riu, my vees shiu er nyn ghiarey-chymmylt, cha bee vondeish erbee eu liorish Creest. 3Son ta mee gymmyrkey feanish reesht noi dy chooilley ghooinney ta er ny ghiarey-chymmylt, dy vel eh kianlt dy chooilleeney yn slane leigh. 4Cha vel Creest jeh veg y foays diu, quoi-erbee eu ta jerkal dy v’er ny heyrey liorish y leigh; ta shiu er duittym veih grayse. 5Son ta shinyn trooid y Spyrryd farkiaght son y treishteil dy chairys liorish credjue. 6Son ayns Yeesey Creest, cha vel giarey-chymmylt jeh veg y vondeish, ny an-ghiarey-chymmylt, agh credjue ta gobbraghey liorish graih. 7Hie shiu er nyn doshiaght dy mie, quoi ren shiu y lhiettal veih biallys ’choyrt da’n irriney? 8Cha vel y choyrle shoh voishyn ta er nyn eam. 9Ta red fardalagh dy hoorid goll trooid y slane theayst. 10Ta my varrant erriu ayns y Chiarn, nagh bee shiu jeh aigney erbee elley: agh nee eshyn ta dy voirey shiu, e cherraghey y ymmyrkey, quoi-erbee eh. 11As my ta mish, vraaraghyn, preacheil giarey-chymmylt, cre’n-fa ta mee foast surranse tranlaase? eisht ta scammylt ny croshey ec kione. 12Baillym dy beagh ad eer giarit magh ta dy voirey shiu. 13Son ta shiuish, vraaraghyn, er ve er nyn eam gys reamys [Creestee]; agh ny jean-jee yn reamys shoh leshtal son yn eill, agh ayns graih shirveish-jee yn derrey yeh yn jeh elley. 14Son ta’n slane leigh cooilleenit ’syn un raa shoh, ta shen, Ver oo graih da dty naboo myr dhyt hene. 15Agh my ta shiu lhottey as coyrt mow y cheilley, cur-jee twoaie nagh stroie-jee yn derrey yeh yn jeh elley. 16Shoh ta mee gra eisht, Ymmyrk-jee shiu hene lurg y Spyrryd, as cha jean shiu cooilleeney sayntyn ny foalley. 17Son ta’n eill geearree noi’n Spyrryd, as yn Spyrryd noi’n eill: as t’ad shoh soit yn derrey yeh noi’n jeh elley: myr shen nagh vel shiu jannoo myr bailliu. 18Agh my ta shiu er nyn leeideil liorish y Spyrryd, cha vel shiu fo’n leigh. 19Nish ta obbraghyn yn eill cronnal, as shoh ad, Brishey-poosey, maarderys, neu-ghlennid, rouanys, 20Ammys da jallooyn, obbeeys, dwoaie, anvea, goanlys, jymmoose, streeu, irree-magh, shaghrynys veih’n chredjue, 21Troo, dunverys, meshtyrys, glutteraght, as y lheid: my-nyn-gione ta mee ginsh diu ro-laue, myr ta mee myrgeddin er n’insh diu ayns y traa t’er n’gholl shaghey, nagh vow adsyn ta cur rish lheid ny reddyn, reeriaght Yee ayns eiraght. 22Agh ta mess y Spyrryd, graih, boggey, shee, surranse-foddey, ymmyrkey meiygh, mieys, firrinys, 23Meenid, sheeltys: noi nyn lheid cha vel leigh erbee. 24As adsyn ta lesh Creest, t’ad er chrossey yn eill, marish ny yeearreeyn as ny sayntyn. 25My ta shin baghey ayns y Spyrryd, lhig dooin myrgeddin gimmeeaght ayns y Spyrryd. 26Ny lhig dooin geearree gloyr fardalagh, brasnaghey yn derrey yeh yn jeh elley, troo yn derrey yeh mysh y jeh elley.